ဘင်္ဂလားဒေ့ရှ်နိုင်ငံက ငါးဖမ်းသမား ၄ ယောက်ကို နတ်မြစ်ဝမှာ အာရက္ခတပ်တော် (AA) က ဖေဖော်ဝါရီ ၁၁ ရက် မနက်ပိုင်းမှာ ဖမ်းဆီးသွားတယ်လို့ ဘင်္ဂလားဒေ့ရှ်အခြေစိုက် Dhaka Tribune သတင်းမှာ ရေးသားပါတယ်။
နတ်မြစ်အတွင်း ငါးဖမ်းနေကြတဲ့ တက္ကနက်ဖ်ဒေသခံ ၅ ယောက်ကို အာရက္ခတပ်တော်ရဲ့ တပ်ဖွဲ့ဝင်တွေက ဖမ်းဆီးသွားခဲ့တာဖြစ်ပြီး လက်ရှိမှာ ဘင်္ဂလားဒေ့ရှ် နယ်ခြားစောင့်တပ်ကို အသိပေး တိုင်ကြားထားတယ်လို့ တက္ကနဖ်မြို့ တာဝန်ရှိသူတယောက်ဖြစ်တဲ့ ဘာရှာအာမက်က ပြောပါတယ်။
“နတ်မြစ်အတွင်း ငါးဖမ်းနေကြတဲ့ ငါးဖမ်းသမား ၄ ဦးကို အာရက္ခတပ်တော်က သူတို့ရဲ့ စက်လှေနဲ့အတူ ဖမ်းဆီးသွားတာ ဟုတ်ပါတယ်။ အခုလို ဖမ်းဆီးမှုတွေကြောင့် ကျေးရွာတွင်း စိုးရိမ်မှုတွေတော့ ရှိနေကြတယ်။ ဒီဖြစ်စဥ်ကိုလည်း နယ်ခြားစပ်တပ် BGB နဲ့ ဒေသအုပ်ချုပ်ရေး အဖွဲ့တွေဆီ တိုင်ကြားထားတယ်။”
အာရက္ခတပ်တော် (AA) က ဖမ်းဆီးသွားခဲ့တဲ့သူတွေဟာ အသက် ၁၆ ကနေ ၃၀ ကြား တက္ကနဖ်ဒေသခံ ငါးဖမ်းသမား ၄ ယောက် ဖြစ်ကြတယ်လို့ သိရပါတယ်။
အခု ငါးဖမ်းသမား ၅ ယောက် ဖမ်းဆီးခံရမှုနဲ့ ပတ်သက်ပြီး စုံစမ်းစစ်ဆေးမှုတွေ ပြုလုပ်နေတယ်လို့ အမည်မဖော်လိုတဲ့ တက္ကနဖ်အခြေစိုက် နယ်ခြားစောင့်တပ် (BGB) အရာရှိတယောက်က ပြောပါတယ်။
“ဘင်္ဂလားဒေ့ရှ်နယ်စပ်ကို ဖြတ်ကျော်ပြီး ငါးဖမ်းသမား ၄ ဦးကို သူတို့ရဲ့လှေတွေနဲ့အတူ နတ်မြစ်ထဲကနေ ဖမ်းဆီးခေါ်ဆောင်သွားတယ်ဆိုတဲ့ သတင်းတွေ ရရှိထားပါတယ်။ သူတို့ လွတ်မြောက်နိုင်ဖို့ စုံစမ်းစစ်ဆေးမှုတွေ လုပ်နေပါတယ်။”
ငါးဖမ်းသမား ၄ ယောက် ဖမ်းဆီးခံရမှုနဲ့ပတ်သက်ပြီး တက္ကနဖ်ဒေသ အုပ်ချုပ်ရေးမှူးကလည်း အတည်ပြုထားပြီး သူတို့ကို ပြန်ခေါ်ဖို့ လုပ်ဆောင်နေတယ်လို့ ဒေသအုပ်ချုပ်ရေးမှူး ရှိတ်ခ်အာဆန်အူဒင်က ပြောပါတယ်။
“ငါးဖမ်းသမားတွေ ဖမ်းဆီးခံရမှု ကျနော်တို့ သိထားပြီးပါပြီ။ သူတို့ပြန်လွတ်လာစေဖို့ ကျနော်တို့ အုပ်ချုပ်ရေးအဖွဲ့တွေက ကြိုးပမ်းနေတာတွေ ရှိပါတယ်။”
၂၀၂၄ ခုနှစ် အောက်တိုဘာ ၆ ရက်ကလည်း တက္ကနက်ဖ်မြို့နယ်က ငါးဖမ်းသမား ၅၈ ယောက်ကို စစ်ကောင်စီရေတပ်က မြန်မာရေပိုင်နက်ကျူးကျော်ပြီး ငါးဖမ်းမှုနဲ့ ဖမ်းဆီးခေါ်ဆောင်ခဲ့ပါတယ်။
ဒါ့အပြင် အောက်တိုဘာ ၉ ရက်ကလည်း မြန်မာရေတပ်ရဲ့ ကင်းလှည့်သင်္ဘောတစင်းက ဘင်္ဂလားဒေ့ရှ် ငါးဖမ်းသင်္ဘောကို ပစ်ခတ်ခဲ့တာကြောင့် ငါးဖမ်းသမားတယောက် သေဆုံးပြီး ၃ ယောက် ဒဏ်ရာရရှိခဲ့ပါတယ်။
အလားတူ အောက်တိုဘာ ၁၅ ရက်ကလည်း အာရက္ခတပ်တော်က ဖမ်းဆီးခဲ့တဲ့ ဘင်္ဂလားဒေ့ရှ် ငါးဖမ်းသမား ၁၆ ယောက်ကို ဘင်္ဂလာဒေ့ရှ် နယ်ခြားစောင့်တပ် (BGB) က ပြန်ခေါ်နိုင်ခဲ့တယ်လို့ ဆိုပါတယ်။
ဘင်္ဂလားဒေ့ရှ်က ငါးဖမ်းသမားတွေဟာ ရခိုင်ရေပိုင်နက်အတွင်း နေ့တိုင်း ဝင်ရောက်ပြီး ငါးခိုးဖမ်းတာတွေ ရှိတယ်လို့ မောင်တောဒေသခံတွေက ပြောပါတယ်။
အာရက္ခတပ်တော်ရဲ့ ၂၀၂၄ ခုနှစ် နိုဝင်ဘာ ၂၀ ရက်က ထုတ်ပြန်ချက်မှာ ရခိုင်ရေပိုင်နက်အတွင်း ဝင်ရောက်ပြီး ငါးခိုးဖမ်းတဲ့ ဘယ်သူ့ကိုမဆို ဥပဒေအရ ဖမ်းဆီးအရေးယူသွားမယ်လို့ ပြောထားပါတယ်။
