လတ်ဗီးယားဟာ ရုရှားနိုင်ငံကနေ လျှပ်စစ်ဓာတ်အားလိုင်း ချိတ်ဆက်ထားတာကို ဖေဖော်ဝါရီ ၈ ရက်မှာ ဖြတ်တောက်လိုက်ပါတယ်။ 

ဘော်တစ် ၃ နိုင်ငံထဲမှာပါဝင်တဲ့ လတ်ဗီးယားဟာ ဥရောပသမဂ္ဂထဲကို ဝင်ရောက်ဖို့နဲ့ လုံခြုံရေးတိုးမြှင့်ဖို့အစီအစဉ်ရှိပြီး ရုရှားဆီက လျှပ်စစ်ဓာတ်အားယူထားတာကို ဖြတ်တောက်ခဲ့တာပါ။ 

အက်စတိုးနီးယား၊ လတ်ဗီးယား နဲ့ လစ်သူရေးနီးယားတို့ဟာ IPS/UPS ဆိုတဲ့ လျှပ်စစ်ဓာတ်အား ပြတ်တောက်ချိန်မှာအသုံးပြုရတဲ့ ပူးပေါင်းစနစ်ကနေခွဲထွက်ခဲ့ပြီး ဖေဖော်ဝါရီ ၉ ရက်မှာ ဥရောပဓာတ်အားလိုင်းနဲ့ ချိတ်ဆက်မှာဖြစ်ပါတယ်။ 

ဒီနိုင်ငံ ၃ နိုင်ငံဟာ ဆိုဗီယက်ယူနီယံပြိုကွဲပြီး ၁၉၉၀ အစောပိုင်းမှာ လွတ်လပ်တဲ့နိုင်ငံတွေအဖြစ် ပေါ်ထွက်လာခဲ့တာဖြစ်ပြီး ရုရှားဆီကဓာတ်အားလိုင်းရယူထားတဲ့ လက်ကျန်နိုင်ငံတွေပဲ ဖြစ်ပါတယ်။ 

ဒီနိုင်ငံတွေဟာ ၂၀၀၄ ခုနှစ်မှာ ဥရောပသမဂ္ဂအဖွဲ့ဝင် ဖြစ်ခဲ့သလို နေတိုးအဖွဲ့ဝင်လည်း ဖြစ်ခဲ့ပြီး ၃ နိုင်ငံစလုံးဟာ ၂၀၂၂ ခုနှစ်က ယူကရိန်းကို ရုရှားရဲ့ ကျူးကျော်မှုအတွက် ယူကရိန်းနိုင်ငံကို ထောက်ခံတဲ့နိုင်ငံတွေဖြစ်ပြီး ရုရှားဆီက လျှပ်စစ်ဝယ်ယူမှုကို ရပ်တန့်ခဲ့ပါတယ်။ 

ဒါပေမဲ့ လျှပ်စစ်ဓာတ်အား တည်ငြိမ်ဖို့၊ ထိန်းချုပ်ဖို့နဲ့ မီးမပျက်ဖို့ ရုရှားရဲ့ဓာတ်အားလိုင်းတွေကို အသုံးပြုခဲ့ရပါတယ်။ 

လတ်ဗီးယားစွမ်းအင်ဝန်ကြီး ကတ်စပါက “ဒီစနစ်က တည်ငြိမ်ပါတယ်။ သူ့ရဲ့လုပ်ဆောင်မှုကလည်း သိမ်မွေ့ပါတယ်။ ပြောင်းလဲမှုဖြစ်မှန်းတောင် ဘယ်သူကမှ သိမှာမဟုတ်ပါဘူး”လို့ ရိုက်တာကို ပြောပါတယ်။ 

လတ်ဗီးယား-ရုရှား နယ်စပ်အနီးမှာရှိတဲ့ ရီဇက်နီဓာတ်အားခွဲရုံနဲ့ လမ်းခွဲပြီးတဲ့နောက် ကတ်စပါက ရိုက်တာကို ပြောကြားခဲ့တာပါ။ 

ရုရှားဆီက ဓာတ်အားလိုင်းရယူမှု ဖြတ်တောက်ခဲ့ပြီးနောက် ဓာတ်အားပေးစက်ရုံအနီးမှာ စစ်ကားတစီး လှည့်လည်နေသလို လက်နက်ကိုင်တပ်ဖွဲ့တွေလည်း အနီးအနားက မြို့တွေထဲမှာ ချထားတာတွေ့ရပါတယ်။ 

ဘော်တစ်နိုင်ငံတွေဟာ ဓာတ်အားပေးရုံတွေကို ဖျက်ဆီးမှာကို စိုးရိမ်မှုကြောင့် အခုလို လုံခြုံရေးတွေ တင်းကျပ်ထားတာ ဖြစ်ပါတယ်။ 

Source: Reuters