အိန္ဒိယနိုင်ငံက မတ်ပဲနဲ့ ပဲစင်းငုံ လွတ်လပ်စွာတင်သွင်းခွင့်ပြုတဲ့ ကာလကို ၂၀၂၆ ခုနှစ် မတ်လကုန်အထိ ထပ်မံတိုးမြှင့်လိုက်တာကြောင့် ပြည်တွင်း ပဲဈေးနှုန်းတွေ မြင့်တက်လာပါတယ်။
အလားတူ ပဲစင်းငုံကလည်း ဇန်နဝါရီ ၂၀ ရက်နေ့က ပဲစဉ်းငုံ Red/RC အမျိုးအစား တတန်ကို ကျပ် ၂,၈၈၈,၀၀၀ ရှိခဲ့တဲ့ ဈေးနှုန်းက ဇန်နဝါရီ ၂၂ ရက်နေ့မှာ ကျပ် ၃,၀၈၈,၀၀၀ အထိ မြင့်တက်လာပါတယ်။
ရက်ပိုင်းအတွင်း မတ်ပဲ တတန်ကို ကျပ် ၁ သိန်းခန့်မြင့်တက်လာပြီး ပဲစင်းငုံဈေးက တတန်ကို ကျပ် ၂ သိန်းထိ မြင့်တက်လာတာပါ။
မြန်မာနိုင်ငံဟာ အိန္ဒိယနိုင်ငံကို မတ်ပဲနဲ့ ပဲစင်းငုံ အဓိကတင်ပို့နေတဲ့ နိုင်ငံဖြစ်တာကြောင့် အခု ပဲတင်သွင်းခွင့်သက်တမ်းတိုးမြှင့်မှုအရ မြန်မာ့ပဲစိုက်တောင်သူတွေနဲ့ ပဲတင်ပို့သူတွေအတွက် ဈေးကွက်အလားအလာကောင်း ရှိလာတယ်လို့ ပဲကုန်သည်တယောက်က ဆိုပါတယ်။
လက်ရှိမှာလည်း မြန်မာ-အိန္ဒိယ နားလည်မှုစာချုပ် (MoU) အရ၊ ၂၀၂၅-၂၆ ဘဏ္ဍာနှစ်အထိ မတ်ပဲ တန်ချိန် ၂ သိန်းခွဲနဲ့ ပဲစင်းငုံတန် ၁ သိန်းကို နှစ်စဉ် တင်ပို့ခွင့်ရရှိထားပါတယ်။
ဒါ့အပြင် အဆိုပါ MOU သက်တမ်းကုန်ဆုံးမယ့် ၂၀၂၆ ခုနှစ်ကစပြီး တနှစ်ကို မတ်ပဲ တန်ချိန် ၅ သိန်းနဲ့ ပဲစင်းငုံ ၂ သိန်းထိ တိုးမြှင့်တင်ပို့နိုင်ဖို့ကိုလည်း ထပ်မံရေးထိုးမယ့် MOU မှာ ထည့်သွင်းချုပ်ဆိုဖို့ စီစဉ်ထားတယ်လို့ စစ်ကောင်စီ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနက သိရပါတယ်။
