ထိုင်ဝမ်တောင်ပိုင်းမှာ ဇန်နဝါရီ ၂၁ ရက် ညသန်းခေါင်ကျော်က ပြင်းအား ၆ ဒသမ ၄ ရစ်ချ်တာစကေးရှိ ငလျင်တခု လှုပ်ခတ်ခဲ့ပြီး ထိုင်နန်မြို့ ဧရိယာမှာ အဆောက်အဦနည်းနည်း ပျက်စီးပြီး လူတချို့ ဒဏ်ရာအနည်းငယ် ရခဲ့ပါတယ်။

ထိုင်နန်မြို့ မီးသတ်ဌာနက ဖြန့်ချိတဲ့ ဗီဒီယိုဖိုင်ထဲမှာ ကယ်ဆယ်ရေးသမားတွေက ပျက်စီးနေတဲ့ အဆောက်အအုံတခုကနေ ကလေးငယ်တယောက်နဲ့ ခွေးတကောင်ကို ကယ်ဆယ်ခဲ့ရပါတယ်။

ဒရုန်းမှတ်တမ်းတွေအရ အင်္ဂါနေ့က ဖြစ်ခဲ့တဲ့ ငလျင်ကြောင့် ခေါင်မိုးတွေနဲ့ အဆောက်အဦနံရံတွေ ပြိုကျနေတာကို တွေ့ရပါတယ်။

ငလျင်လှုပ်ခတ်မှုကြောင့် တထပ်အိမ် ၁၀ လုံးကျော် မျက်နှာကျက်တွေ နံရံတွေ ပြိုကျခဲ့ပြီး ပိတ်မိနေသူတွေ ထိခိုက်ဒဏ်ရာရရှိခဲ့ပါတယ်။

မီးသတ်သမားတွေက လူ ၁၅ ယောက်ကို အောင်အောင်မြင်မြင် ကယ်ဆယ်နိုင်ခဲ့ပြီး ၃ ယောက်ကို ဆေးရုံပို့ဆောင်ခဲ့ပါတယ်။ မီးသတ်ယာဉ် ၁၈ စီးနဲ့ ဝန်ထမ်း ၄၄ ယောက်ပါတဲ့ ကယ်ဆယ်ရေးအဖွဲ့ကိုလည်း စေလွှတ်ခဲ့ပါတယ်။

Apple နဲ့ Nvidia အပါအဝင် ကုမ္ပဏီတွေဆီ အဓိကပေးသွင်းတဲ့ အဆင့်မြင့်ချစ်ပ်တွေ ထုတ်လုပ်တဲ့ ထိုင်ဝမ် တပိုင်းလျှပ်ကူးပစ္စည်းများ ထုတ်လုပ်ရေး ကုမ္ပဏီက ငလျင်လှုပ်ခတ်ပြီးတဲ့နောက် ကြိုတင်ကာကွယ်တဲ့အနေနဲ့ ထိုင်ဝမ်အလယ်ပိုင်းနဲ့ တောင်ပိုင်းက တချို့နေရာတွေမှာ အလုပ်သမားတွေကို ရွှေ့ပြောင်းပေးခဲ့ရပေမဲ့ လုပ်ငန်းခွင်တွေ အားလုံးလည်ပတ်နေပြီလို့ ပြောခဲ့ပါတယ်။

Source : Reuters