ရန်ကုန်မြို့ကနေ ဘင်္ဂလားဒေ့ရှ်နိုင်ငံ၊ တက္ကနက်ဖ်ဆိမ်ကမ်းကို လာတဲ့ ကုန်တင်သင်္ဘောတွေကို အာရက္ခတပ်တော် (AA) က ထိန်းသိမ်းခဲ့ပြီး ၄ ရက်အကြာ ဇန်နဝါရီ ၂၀ ရက်မှာ ပြန်လွှတ်ပေးလိုက်တယ်လို့ ဘင်္ဂလားဒေ့ရှ်အခြေစိုက် Dhaka Tribune သတင်းမှာ ရေးသားပါတယ်။
ရန်ကုန်ကလာတဲ့ အဲဒီကုန်တင်သင်္ဘော ၃ စီးအနက် ၂ စီးကို ဇန်နဝါရီ ၂၀ ရက်မှာ အာရက္ခတပ်တော်က ပြန်လွှတ်ပေးလိုက်ပြီး ဘင်္ဂလားဒေ့ရှ်နိုင်ငံ တက္ကနက်ဖ်ဆိပ်ကမ်းကို ရောက်ရှိလာတယ်လို့ သတင်းမှာ ဖော်ပြပါတယ်။
ပြန်လွှတ်ပေးလိုက်တဲ့ သင်္ဘောတွေဟာ ဇန်နဝါရီ ၁၆ ရက်က နတ်မြစ်ဝ ရခိုင်ရေပိုင်နက်အတွင်းမှာ အာရက္ခတပ်တော်က ထိန်းသိမ်းခဲ့တာဖြစ်ပြီး ၄ ရက်အကြာမှာ ပြန်လွှတ်ပေးခဲ့တာပါ။
လွတ်လာတဲ့ သင်္ဘော ၂ စင်းဟာ ဇန်နဝါရီ ၁၀ ရက် မနက် ၁၀ နာရီမှာ နတ်မြစ်နယ်နိမိတ်အတွင်းက ထွက်ခွာလာပြီး ကျန်တစင်းဟာ အာရက္ခတပ်တော်က ထိန်းချုပ်ထားဆဲ ဖြစ်တယ်လို့လည်း ပြောပါတယ်။
လွှတ်ပေးလိုက်တဲ့ သင်္ဘော ၂ စီးဟာ တက္ကနက်ဖ်ဆိပ်ကမ်းကို ရောက်ရှိနေပြီလို့ ဆိပ်ကမ်းအာဏာပိုင်ဖြစ်တဲ့ United Land Port မန်နေဂျာ ဆာယက်ဒ်မိုဟာမက်အန်ဝါဟော့စ်စိန်က အတည်ပြုထားပါတယ်။
ကျန်ရှိနေသေးတဲ့ တစင်းကိုလည်း မကြာခင်မှာ အသေးစိတ် ထုတ်ပြန်သွားမယ်လို့လည်း ပြောပါတယ်။
အာရက္ခတပ်တော် ထိန်းသိမ်းခဲ့တဲ့ သင်္ဘော ၃ စီးဟာ ငါးခြောက်၊ ကွမ်းသီးနဲ့ ကော်ဖီ အပါအဝင် ကုန်ပစ္စည်းမျိုးစုံ အိတ်ပေါင်း ၅၀,၀၀၀ နီးပါး တင်ဆောင်လာကြတာဖြစ်ပြီး နတ်မြစ်ဝမှာ ထိန်းသိမ်းခံရတာ ဖြစ်ပါတယ်။
မောင်တောမြို့နယ်ကို အာရက္ခတပ်တော်က ဒီဇင်ဘာ ၈ ရက်မှာ အပြီးသတ် သိမ်းပိုက်လိုက်ပြီးနောက် ရန်ကုန်ကပို့ဆောင်တဲ့ ကုန်သင်္ဘောတွေဟာ တလကျော်ကြာ ကုန်စည်ပို့ဆောင်ခြင်းမရှိဘဲ ရပ်တန့်နေရာက ပထမဆုံးအကြိမ် ပို့ဆောင်လာတာ ဖြစ်ပါတယ်။
Ref: Dhaka Tribune
