မကွေးတိုင်းအ​ရှေ့ခြမ်း၊ နတ်မောက်မြို့နယ်မှာ စစ်ရေးလှုပ်ရှားနေတဲ့ ဗိဿနိုး ပြည်သူ့ကာကွယ်ရေးတပ်ဖွဲ့ရဲ့ ကြိုးကြာနီတပ်ရင်းဆီကို စစ်ကောင်စီတပ်ရဲ့ ပေါ်တာဆွဲ ဖမ်းဆီးခံရပြီး တပ်သားသစ် ဖြစ်လာသူ ၂ ယောက်ဟာ လက်နက်ခဲယမ်းတွေနဲ့အတူ ထပ်မံ အလင်းဝင်ရောက်လာပါတယ်။

ကြိုးကြာနီတပ်ရင်းရဲ့ ပြန်ကြားရေးတာဝန်ခံတယောက်က “အခု အလင်းဝင်လာတဲ့သူ ၂ ယောက်က ပြီးခဲ့တဲ့နှစ် ဒီဇင်ဘာလထဲက အလင်းဝင်လာကြတာ ဖြစ်ပါတယ်။ ပြီးခဲ့တဲ့နှစ် စက်တင်ဘာလ ကလည်း စစ်ကောင်စီဘက်က တပ်သား ၂ ဦး လက်နက်ခဲယမ်းတွေနဲ့ အလင်းဝင်လာကြပါသေးတယ်။ အခြေအနေ အကြောင်းကြောင်းကြောင့် အခုမှ သတင်းထုတ်ပြန်ရတာ” လို့ ပြောပါတယ်။

အခု ထပ်မံအလင်းဝင်ရောက်လာကြသူတွေဟာ ကယားပြည်နယ်၊ မိုးဗြဲမြို့အခြေစိုက် ခလရ ၄၂၂ တပ်ရင်းကနေ စစ်မှုထမ်းသင်တန်း အပတ်စဥ် ၁ နဲ့ အပတ်စဥ် ၅ က သင်တန်းဆင်းတွေဖြစ်ကြပြီး သူတို့ ၂ ယောက်ဟာ MA1 သေနတ် ၁ လက်၊ MA11 သေနတ် ၁ လက်၊ MA1 ကျည် ၁၀၀ နီးပါး၊ MA11 ကျည် ၁၀၀ နီးပါးတို့နဲ့အတူ အလင်းဝင်ရောက်လာခဲ့ကြတာလို့ ဆိုပါတယ်။

ကြိုးကြာနီတပ်ရင်းရဲ့ ပြောရေးဆိုခွင့်ရှိသူ ရဲဘော်ပလာတာက “အခု အလင်းဝင်လာတဲ့သူ ၂ ယောက်က အရင်နှစ် စက်တင်ဘာလထဲက အလင်းဝင်လာသူ ၂ ယောက်ကနေတဆင့် ဆက်သွယ်ပြီးတော့မှ ထပ်ပြီးအလင်းဝင်လာကြတာပါ။ အပတ်စဥ် ၁ တယောက်က စစ်ကိုင်းတိုင်း၊ ရွှေဘိုမြို့နယ်ထဲကပါ။ သူတို့ရွာရဲ့ စစ်ကောင်စီခန့် အုပ်ချုပ်ရေးမှူးက ဇွတ်အတင်း ငွေယူပြီး ထည့်ပေးလိုက်လို့ ပါလာခဲ့တာ။ နောက် အပတ်စဥ် ၅ က တယောက်က မကွေးတိုင်း၊ စလင်းနယ်ထဲကပါ။ သူက လယ်စိုက်ပျိုးထောင်နေရင်း သူ့အလုပ်သူလုပ်နေတာကို အဆွဲခံခဲ့ရတာပါ။ အဲဒီ ၂ ယောက်တည်းက တယောက်က သူ့ဇာတိမှာရှိတဲ့ တော်လှန်ရေးတပ်ဖွဲ့ထဲကို ဝင်ပြီး စကစကိုတိုက်ထုတ်ဖို့ ပြောလာတာကြောင့် သူတို့နယ်ဘက်က တော်လှန်ရေးတပ်ဖွဲ့တွေနဲ့ ချိတ်ဆက်ပေးနေပါတယ်။ နောက်တယောက်ကတော့ သူ့မိသားစုတွေနဲ့ ဆုံစည်းခွင့်ရဖို့ တောင်းဆိုထားတာကြောင့်လည်း အဲဒါကို စီစဥ်ဆောင်ရွက်ပေးနေ​ပါတယ်” လို့ ပြောပါတယ်။

စက်တင်ဘာလထဲက အလင်းဝင်ရောက်လာသူ ၂ ယောက်ကတော့ သူတို့ရဲ့ စိတ်ဆန္ဒအရ စစ်အာဏာရှင် အမြစ်ဖြတ်ချေမှုန်းရေး လုပ်ငန်းစဥ်တွေမှာ ပါဝင်လိုတာကြောင့် ကြိုးကြာနီတပ်ရင်းက ရဲဘော်တွေနဲ့အတူ တာဝန်ထမ်းဆောင်ခွင့် ပြုထား​ပါတယ်။

၂၀၂၄ ခုနှစ်၊ နိုဝင်ဘာ ၂၄ ရက်က စစ်အာဏာရှင်ကို တော်လှန်ရင်း ပဲခူးရိုးမထဲက တိုက်ပွဲတခုမှာ ဗိဿနိုး ပြည်သူ့ကာကွယ်ရေးတပ်ဖွဲ့ လက်အောက်ခံ ကြိုးကြာနီတပ်ရင်းရဲ့ တပ်ရင်းမှူး ဇိုးကြီး ကျဆုံးသွားခဲ့ပေမဲ့ ကြိုးကြာနီတပ်ရင်းဟာ စစ်အာဏာရှင် အမြစ်ပြတ်သည်အထိ တိုက်ထုတ်သွားမှာဖြစ်ပြီး စစ်ကောင်စီလက်အောက်မှာ တာဝန်ထမ်းဆောင်နေကြသူတွေ အနေနဲ့လည်း အမြန်ဆုံးအလင်းဝင်ကြဖို့ တိုက်တွန်းထားတယ်လို့လည်း သိရပါတယ်။