ကချင်ပြည်နယ်၊ ဟူးကောင်းချိုင့်ဝှမ်းဒေသ၊ တနိုင်းမြို့နယ်၊ စံလွန်ကျေးရွာက လပူခရွှေမှော်ဘက်ကို စစ်ကောင်စီတပ်က ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် အရပ်သား ၁၅ ယောက်ထက်မနည်း သေဆုံးခဲ့တယ်လို့ သိရပါတယ်။

ဇန်နဝါရီ ၁၁ ရက်နေ့ မနက်ပိုင်း ၁၁ နာရီလောက်မှာ တိုက်ပွဲမဖြစ်ဘဲ လပူခရွှေမှော်နဲ့ စန်လွန်ရွှေမှော် နေရာတွေတို့ကို ၂ ကြိမ်တိတိ လာရောက်ဗုံးကြဲတိုက်ခိုက်ခဲ့တယ်လို့ ဒေသခံတွေက ပြောပါတယ်။

စစ်ကောင်စီရဲ့ ဗုံးကြဲတိုက်ခိုက်မှုကြောင့် စန်လွန်ရွှေမှော်ထဲက စျေးဆိုင် ၉ ဆိုင် တစစီပျက်စီးသွားပြီး အရပ်သား ၁၅ ယောက်ထက်မနည်း သေဆုံးခဲ့တဲ့အပြင် ၁၀ ယောက်လောက် ထိခိုက်ဒဏ်ရာရရှိခဲ့တယ်လို့ ဆိုပါတယ်။

ဒဏ်ရာပြင်းထန်သူတွေကို‌တော့ နီးစပ်ရာ KIO ဆေးခန်းဆီကို ပို့ဆောင်ထားပြီး သေဆုံးသူတွေဟာ ဒေသခံတွေနဲ့ ရွှေမော်မှာ လာ‌ရောက်ရွှေတူး‌လုပ်ကိုင်‌နေကြသူတွေဖြစ်ပါတယ်။

လက်ရှိအချိန်အထိ ထိခိုက်သေဆုံးသူအ‌‌ရေအတွက်ကို အတည်မပြုနိုင်သေးသလို အလောင်း‌ပျောက်သွားတာလည်း ရှိနိုင်‌‌သေးတယ်လို့ မျက်မြင်ကြုံတွေ့ရသူတယောက်က ပြောပါတယ်။

KIA တပ်မဟာ ၂ နယ်မြေဖြစ်တဲ့ တနိုင်းမြို့နယ်က စစ်ကောင်စီတပ်ရဲ့ ရွှေနဲ့ ပယင်းမှော်တွေကို ထိန်းချုပ်ထားတဲ့ နမ်ဗျူတပ်စခန်းကို ပြီးခဲ့တဲ့ ၂၀၂၄ ခုနှစ် မေလအတွင်း KIA ပူးပေါင်းတပ်က ပြန်လည်တိုက်ခိုက်သိမ်းပိုက်ထားခဲ့တာ ဖြစ်ပါတယ်။