မန္တလေး၊ ချမ်းအေးသာစံမြို့နယ်က တိုင်းအကူရဲတပ်ဖွဲ့ရဲ့ ရဲလိုင်းခန်း ဇန်နဝါရီ ၁၀ ရက် မနက် ၁၀ နာရီလောက်က မီးလောင်ခဲ့တယ်လို့ သိရပါတယ်။
လမ်း ၃၀ နဲ့ ၆၈ လမ်း ၆၉ လမ်းကြားမှာ မီးမလာတာကြောင့် ဂက်စ်မီးဖိုနဲ့ ဟင်းချက်ရာကနေ မန္တလေး၊ တိုင်းအကူရဲတပ်ဖွဲ့ပိုင် သွပ်မိုး၊ ပျဉ်ကာ ၄ ခန်းတွဲ အဆောင် ၂ ခုစလုံး မီးကူးစက်လောင်သွားခဲ့တာ ဖြစ်ပါတယ်။
မြို့ခံတယောက်က “ဝါယာရှော့ခ်မဟုတ်ပါဘူး။ ဂက်စ်နဲ့ ဟင်းချက်ရင်းလောင်တာ။ ထိခိုက်မိသူ မရှိပါဘူး။ အားလုံးပေါင်း အခန်း ၈ ခန်း လောင်သွားတယ်။ ဟင်းချက်တဲ့သူ အဖမ်းခံရတယ်။ ရဲတော့ မဟုတ်ဘူး မိသားစုဝင်” လို့ ပြောပါတယ်။
မီးလောင်မှုကို level 1 အဆင့်မီးသတ်ယာဉ် အုပ်စုတွေနဲ့ သက်ဆိုင်ရာမီးသတ်၊ အရပ်ဘက်အသင်းတွေ လာရောက်ငြှိမ်းသတ်ခဲ့ကြလို့ မနက် ၁၀ နာရီ ၃ မိနစ်မှာ မီးငြိမ်းသွားပါတယ်။
မီးလောင်မှုကြောင့် ထိခိုက်ဒဏ်ရာရရှိသူ မရှိဘဲ မီးစလောင်တဲ့အိမ်က လိုင်းခန်းနေ အမျိုးသား ၁ ယောက်ကို မီးပေါ့ဆမှုနဲ့ ချမ်းအေးသာစံမြို့နယ်ရဲတပ်ဖွဲ့က ဖမ်းဆီးထားပါတယ်။
ပြီးခဲ့တဲ့ ဇန်နဝါရီ ၈ ရက် ညနေပိုင်းကလည်း ချမ်းမြသာစည်မြို့နယ်၊ ကံသာယာရပ်ကွက်၊ ၁၁၂ လမ်းနဲ့ ၅၉ လမ်းကြားမှာ ဆိုင်ကယ်အရောင်းဆိုင်အပါအဝင် အိမ် ၃ လုံး မီးလောင်ခဲ့ပါတယ်။
