အခုနှစ်ရာသီမှာ အာဆင်နယ်အသင်း ချန်ပီယံဖြစ်ဖို့ ခက်ခဲကြောင်း အသင်းနောက်ခံလူဟောင်း မာတင်ကီယွန်က သုံးသပ်သွားပါတယ်။
အာဆင်နယ်ဟာ မနေ့ညက ကစားခဲ့တဲ့ ဘရန့်ဖို့ဒ်နဲ့ ပွဲစဉ်မှာ ၃ ဂိုး ၁ ဂိုးနဲ့ အနိုင်ရခဲ့ပြီး အမှတ်ပေးဇယား ထိပ်ဆုံးနေရာက လီဗာပူးထက် တပွဲပိုကစားအပြီး ဒုတိယနေရာ ၆ မှတ်ကွာ အနေအထား ရောက်ရှိလာခဲ့ပါတယ်။
ဒါပေမဲ့ နောက်ခံလူဟောင်း မာတင်ကီယွန်ကတော့ ဒဏ်ရာပြဿနာတွေ ရှိနေတဲ့ အာဆင်နယ်အနေနဲ့ ချန်ပီယံဖြစ်ဖို့ ခက်ခဲမယ်လို့ သုံးသပ်ခဲ့တာပါ။
လီဗာပူးတိုက်စစ် ၃ ယောက်ရဲ့ အရည်အချင်းက အာဆင်နယ်တိုက်စစ်မှူးတွေထက် ကောင်းမွန်နေပြီး လက်ကျန် ရာသီဝက်မှာ အာဆင်နယ်တိုက်စစ်ပိုင်းက သွင်းဂိုးတွေ ပိုမိုရယူနိုင်ဖို့လိုအပ်ကြောင်း မာတင်ကီယွန်က ပြောပါတယ်။
ဒါ့အပြင် အားထားရတဲ့ တောင်ပံတိုက်စစ်မှူး ဆာကာက လချီပြီး အနားယူရမှာကလည်း အာဆင်နယ်အတွက် ခက်ခဲစေလိမ့်မယ်လို့ မာတင်ကီယွန်က သုံးသပ်သွားပါတယ်။
