စစ်အာဏာသိမ်းလိုက်တဲ့ ၂၀၂၁ ဖေဖော်ဝါရီကနေ ၂၀၂၄ ဒီဇင်ဘာအထိ ကရင်နီပြည်နယ် တခုတည်းကို စစ်ကောင်စီတပ်က လေကြောင်းတိုက်ခိုက်မှု အကြိမ်ပေါင်း ၁,၇၆၅ ကြိမ် လုပ်ခဲ့တယ်လို့ တိုးတက်သော ကရင်နီပြည်သူ့အင်အားစု (PKPF) က ဒီကနေ့ ဇန်နဝါရီ ၁ ရက်မှာ ထုတ်ပြန်ပါတယ်။

ဒါ့အပြင် စစ်တပ် သတ်ဖြတ်မှုကြောင့် အရပ်သားပြည်သူ ၅၃၆ ဦးသေဆုံးခဲ့သလို စစ်ရှောင်နေရင်း သေဆုံးသူဟာလည်း ၁၇၃ ဦးအထိရှိတယ်လို့ ဆိုပါတယ်။

ကရင်နီမှာ ၂၀၁၂ မေလကတည်းက စစ်ကောင်စီနဲ့ ကာကွယ်ရေးတပ်တွေကြား တိုက်ပွဲဖြစ်ပွားမှု ၁၂၆၅ ကြိမ်ရှိခဲ့သလို KNDF/PDF/KA က ကျဆုံးရဲဘော် ၆၇၄ ဦးရှိတယ်လို့ PKPF က လေးနှစ်နီးပါးကာလအတွင်း စာရင်းပြုစုထားတာဖြစ်ပါတယ်။

ဒါ့အပြင် ဘာသာရေးအဆောက်အဦတွေ ၅၄ လုံး၊ ဆေးရုံ၊ ဆေးခန်း ၁၆ လုံးနဲ့ စာသင်ကျောင်း ၂၆ လုံး ဖျက်ဆီးခံခဲ့ရပါတယ်။

တဖက်မှာ အခုကာလအတွင်း အရပ်သားဖမ်းဆီးခံရမှု ၁၅၈ ဦးရှိသလို စစ်ဘေးရှောင်နေရသူဟာလည်း ၂ သိန်းဝန်းကျင်ရှိနေတယ်လို့ ကရင်နီအရပ်ဘက်အဖွဲ့အစည်းတွေက ထုတ်ပြန်ထားပါတယ်။

ကရင်နီပြည်နယ်က တိုက်ပွဲတွေအတွင်းမှာ ကာကွယ်ရေးတပ်တွေရဲ့ တိုက်ခိုက်မှုကြောင့် စစ်ကောင်စီယာဥ်တန်းပျက်စီးမှု ၆၈ စီး၊ တိုက်လေယာဥ်ပျက်စီးမှု ၃ စီး ရှိခဲ့သလို စစ်ကောင်စီတပ်သား ၃၆၀၁ ဦး သေဆုံးတယ်လို့ တိုးတက်သောကရင်နီပြည်သူ့အင်အားစု (PKPF) က ထုတ်ပြန်ထားပါတယ်။