ဒီဇင်ဘာ ၃၁ ရက် နှစ်သစ်ကူးညမှာ စစ်ကောင်စီက မန္တလေးတိုင်းနဲ့ ကရင်နီပြည်နယ်ဘက်မှာ လေကြောင်းတိုက်ခိုက်မှုတွေ လုပ်ခဲ့တာကြောင့် လူ ၆ ယောက် သေဆုံးပြီး ထိခိုက်ဒဏ်ရာရသူတွေလည်း ရှိခဲ့ပါတယ်။
မနေ့ညက မန္တလေးတိုင်း၊ ငါန်းဇွန်မြို့နယ်ထဲကို စစ်ကောင်စီက ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် မိသားစုဝင် ၅ ယောက် သေဆုံးခဲ့ပါတယ်။
ဒီဇင်ဘာ ၃၁ ရက် ည ၈ နာရီလောက်မှာ ငါန်းဇွန်မြို့နယ်၊ သားကျင်ကျေးရွာကို ဗုံးကြဲခံရမှုကြောင့် သားကျင်ရွာက အသက် ၅၂ နှစ်အရွယ် ဦးသန်းတင့် အပါအဝင် ဇနီးဖြစ်သူနဲ့ သား ၃ ယောက်တို့ ပွဲချင်းပြီး သေဆုံးပြီး ၂ ယောက် ဒဏ်ရရခဲ့တယ်လို့ သိရပါတယ်။
ငါန်းဇွန်အခြေစိုက် ကာကွယ်ရေးတပ်ဖွဲ့ဝင်တယောက်က “မိသားစုဝင် ၇ ဦးရှိတာ ဗုံးကြဲတော့ သေတဲ့ ၅ ယောက်မှာ ၂ ယောက်ပဲ အလောင်းပြန်ရတယ်။ ၃ ယောက်ကတော့ အစအနတွေဖြစ်ပြီး အလောင်းရှာမရဘူး။ ဒဏ်ရာရတဲ့သူတွေကလည်း စိုးရိမ်ရတယ်’’ လို့ ပြောပါတယ်။
ဒါ့အပြင် လေကြောင်းတိုက်ခိုက်ခံရမှုကြောင့် လူနေအိမ် ၆ လုံး ပျက်စီးခဲ့ပြီး နွား ၈ ကောင်လည်း သေဆုံးခဲ့တယ်လို့ သိရပါတယ်။
အလားတူ ကရင်နီပြည်နယ်၊ မြို့တော် လွိုင်ကော်ရဲ့ အရှေ့ဘက်ခြမ်းမှာရှိတဲ့ စစ်ရှောင်စခန်းတခုကို ဒီဇင်ဘာ ၃၁ ရက် ညနေပိုင်းက ဗုံး ၃ လုံး ကြဲချတိုက်ခိုက်ခဲ့တာကြောင့် အမျိုးသမီးတယောက် သေဆုံးတယ်လို့ Job For Kayah တာဝန်ရှိသူက ပြောပါတယ်။
မနေ့ညက ကရင်နီပြည်နယ်ထဲမှာ လေကြောင်းတိုက်ခိုက်မှု ၃ ကြိမ်ထက်မနည်း ရှိခဲ့ပြီး ဖြစ်စဉ်အတိအကျကို စုံစမ်းထုတ်ပြန်သွားမယ်လို့လည်း သူကဆိုပါတယ်။
စစ်အာဏာသိမ်းပြီးနောက်ပိုင်း စစ်ကောင်စီက နိုင်ငံတဝန်းမှာ လေကြောင်းတိုက်ခိုက်မှု အကြိမ် ၇,၀၀၀ ကျော်ထက်မနည်း ပြုလုပ်ခဲ့ပြီး နိုင်ငံအနှံ့ မြို့နယ်ပေါင်း ၁၅၀ ကျော်ဟာ လေကြောင်းတိုက်ခိုက်ခံခဲ့ရတယ်လို့ ISP Myanmar က ထုတ်ပြန်ထားပါတယ်။
ဒီလေကြောင်းတိုက်ခိုက်မှုတွေကြောင့် အာဏာသိမ်း ၄ နှစ်တာနီးပါး ကာလအတွင်း အရပ်သား ၂,၀၀၀ ဝန်းကျင် သေဆုံးခဲ့တယ်လို့လည်း ISP Myanmar ရဲ့ ထုတ်ပြန်ချက်က ဆိုထားပါတယ်။
