နိုင်ငံတဝန်း တိုက်ပွဲတွေမှာ စစ်ကောင်စီတပ်တွေ ရှုံးနိမ့်ပြီး စခန်းတွေ တခုပြီးတခု အသိမ်းခံနေရချိန် စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က DSA ကျောင်းဆင်းပွဲ ၄၇ နှစ်မြောက် နှစ်ပတ်လည်အခမ်းအနားမှာ သီချင်းဆိုဖျော်ဖြေခဲ့တယ်လို့ စစ်တပ်အသိုင်းအဝိုင်းကနေ သိရပါတယ်။

အဲဒီပွဲကို ဒီဇင်ဘာ ၂၃ ရက် ညပိုင်းက   ၈ မိုင် စစ်ရုံးထဲမှာ  ညနေ ၆ နာရီကနေ ၉ နာရီအထိ ပြုလုပ်ခဲ့တာဖြစ်ပြီး  ပွဲနေရာအနီးတဝိုက်ကို လုံခြုံရေးတင်းကျပ်ထားခဲ့တယ်လို့ သိရပါတယ်။

စစ်တပ်နဲ့ နီးစပ်သူတယောက်က “အခမ်းအနားတက်မယ့်သူနဲ့ လိုက်မယ့်မိသားစု မှတ်ပုံတင်၊ တော်စပ်ပုံ၊ မိန်းမ၊ သားသမီး၊ မြေးတွေပဲ တက်ခွင့်ရတယ်။ လူနဲ့ မှတ်ပုံတင် လာမယ့်ကားနံပါတ်ကို တပတ်အလိုတည်းက ကြိုပေးထားရတယ်။ တယောက် ၂ သိန်းဖိုး ကျွေးတယ်။ လူ‌စေ့ မဲနှိုက်ခွင့်ရတယ်။ နောက်ဆုံးပေါ် iPhone ကစ​​ပြီး ဘာညာပါ။ ဗလာမပါ ကံစမ်းမဲ လုပ်တယ်၊ မဲက အရင်နှစ်တွေဆို ငွေသားနဲ့ ကားတွေပါ ဖောက်ပေးတာလို့ သိရတယ်” လို့ ပြောပါတယ်။

DSA ကျောင်းဆင်းတွေက နှစ်တိုင်း သူတို့အပတ်စဉ်အလိုက် တွေ့ဆုံပွဲလုပ်ကြပြီး ကျန်တဲ့ OTS, OTC တွေလည်း သူတို့အပတ်စဉ်အလိုက် လုပ်ကြတယ်လို့ သိရ​ပါတယ်။

စစ်ကောင်စီတပ်က အာဏာသိမ်းပြီးနောက် DSA နှစ်ပတ်လည်အခမ်းနားတွေမှာ စစ်ခေါင်းဆောင် မင်းအောင်လှိုင်က သီချင်းဆို ဖျော်ဖြေလေ့ရှိတယ်လို့ သိရပါတယ်။

အခုနှစ်မှာတော့ ရခိုင်၊ ကချင်နဲ့ ချင်းပြည်နယ် အပါအဝင် ဒေသတော်များများမှာ စစ်ကောင်စီ တပ်တွေ အရေးနိမ့်နေပြီး စခန်းတွေ အသိမ်းခံနေရချိန်နဲ့ တိုက်ဆိုင်နေတာ ဖြစ်ပါတယ်။