မကွေးတိုင်း၊ မြိုင်မြို့နယ်က သရက်ကွပျူစောထီးကျေးရွာစခန်းသိမ်းတိုက်ပွဲနဲ့ စစ်ကူလာတဲ့ စစ်ကောင်စီစစ်ကြောင်းကို တိုက်ခိုက်ခဲ့တဲ့တိုက်ပွဲအတွင်း စစ်ကောင်စီတပ်ဖွဲ့ဝင် ၁၄ ယောက် သေဆုံးပြီး ဒဏ်ရာရသူတွေလည်းများပြားသလို PDF ရဲဘော် ၂ ယောက် ကျဆုံးခဲ့တယ်လို့ သိရပါတယ်။

Myaing Underground Defence Force (MUGDF) ရဲ့ ပြန်ကြားရေးတာဝန်ခံက “အဲဒီ ပျူရွာစခန်းသိမ်းတိုက်ပွဲနဲ့ စစ်တပ်စစ်ကူစစ်ကြောင်းကို တိုက်ခိုက်ခဲ့တာတော့ တိုက်ပွဲကာလ ၃ ရက်လောက် ကြာတယ်ပေါ့ဗျာ။ စစ်ကူလာတဲ့သူတို့စစ်ကြောင်းကိုလည်း တိုက်ခိုက်ခဲ့ကြသေးတယ်ပေါ့။ အဲဒီတိုက်ပွဲတွေထဲမှာ စစ်သားနဲ့ပျူ ၁၄ ယောက်သေတယ်။ ၃၀ လောက်ဒဏ်ရာရတယ်ဗျ။ ကျနော်တို့ တပ်ပေါင်းစုဘက်ကတော့ ရဲဘော် ၂ ယောက် ကျဆုံးခဲ့ရသလို ရဲဘော် ၁၂ ယောက်လည်း  ဒဏ်ရာရရှိခဲ့ကြတယ်” လို့ ပြောပါတယ်။

တော်လှန်ရေးတပ်ပေါင်းစုတွေဟာ သရက်ကွပျူစောထီးကျေးရွာစခန်းနဲ့ စစ်ကူလာတဲ့ စစ်ကောင်စီစစ်ကြောင်းကို ဒီဇင်ဘာ ၁၉ ရက်နေ့ မနက်ပိုင်းကနေ စတင်ထိုးစစ်ဆင်တိုက်ခိုက်ခဲ့ကြပြီး ဒီဇင်ဘာ ၂၁ ရက်နေ့မှာ ပျူစောထီးကျေးရွာကို အပြီးသတ်သိမ်းပိုက်နိုင်ခဲ့ကြတယ်လို့ဆိုပါတယ်။

အညာမြေတပ်ပေါင်းစု သတင်းနဲ့ပြန်ကြားရေး တာဝန်ခံ ကိုဘိုဘိုသန့်ဇင် က “ပခုက္ကူမြို့နယ်ထဲက ရွာတွေကိုမီးရှို့ခဲ့တဲ့စစ်ကြောင်းက ဒီဘက်က ပျူရွာစခန်းသိမ်းတိုက်ပွဲကိုစစ်ကူလာတာဗျ။ ၁၉ ရက်နေ့ တရက်တည်း တိုက်ပွဲ ၂ ကြိမ်မှာ ကြာချိန် ၄ နာရီလောက်တိုက်ပွဲဖြစ်ခဲ့ကြတာပါ။ သူတို့ဘက်က လေကြောင်းပစ်ကူကလည်း ၅ ကြိမ်လောက်လုပ်သွားတယ်။ အဲဒီလေကြောင်းပစ်ကူကြောင့် သရက်ကွပျူရွာက လူနေအိမ် ၁၀ လုံးလောက် မီးလောင်ပျက်စီးသွားခဲ့တယ်” လို့ DVB ကို ပြောပါတယ်။

ဒီဇင်ဘာ ၂၂ ရက်နေ့၊ နေ့လယ်ပိုင်းမှာတော့ သရက်ကွပျူစောထီးကျေးရွာက ပျူစောထီးတွေနဲ့ စစ်ကောင်စီတပ်ဖွဲ့ဝင်တွေဟာ ကျေးရွာအတွင်းကနေ ထွက်ပြေးသွားကြပြီး မြိုင် စက်မှု ၂ မှာ အထိုင်ချတပ်စွဲနေတဲ့ စစ်ကောင်စီတပ်ဖွဲ့ဝင်တွေနဲ့ သွားရောက်ပူးပေါင်းကြတဲ့အတွက် သရက်ကွကျေးရွာကို တော်လှန်ရေးအင်အားစုတွေက ရာနှုန်းပြည့်ထိန်းချုပ်ထားပြီး ဖြစ်တယ်လို့လည်း သူက ဆက်ပြောပါတယ်။

သရက်ကွပျူစောထီးကျေးရွာနဲ့ စစ်ကောင်စီစစ်ကူစစ်ကြောင်းကို အညာမြေ‌တပ်ပေါင်းစုနဲ့အတူ မြိုင် ပကဖ၊ ပေါက် ပကဖ၊ မြိုင် ပေါက် ကမ္မ ပကဖ တပ်ရင်းအမှတ် ၁ နဲ့ ၂၊ ပခုက္ကူခရိုင်အမှတ် ၂၊ ၆၊ ၇၊ ၁၄၊ ၁၀၊ ၁၅၊ ၁၇ တပ်ရင်း၊ ကမ္မတပ်ပေါင်းစု၊ PLC တပ်ပေါင်းစု၊ 8+စုဖွဲ့မှု၊ ပခုက္ကူစုဖွဲ့မှုတပ်ရင်း၊ ဝံပုလွေပြောက်ကျားတပ်ဖွဲ့၊ ဂဠုန်ပြည်သူ့ကာကွယ်ရေးတပ်ဖွဲ့၊ ဓားမင်းကြီးတပ်ဖွဲ့နဲ့ ကိုအောင်ကြီးတပ်ဖွဲ့ စတဲ့ ပူးပေါင်းတပ်ဖွဲ့တွေက ချေမှုန်းရေး၊ ဖြတ်တောက်ရေး၊ ဒရုန်းစစ်ဆင်းရေး၊ ထောက်ပို့၊ သတင်းထောက်၊ စစ်သားအလောင်း မီးရှို့တာ စတဲ့ တာဝန်အသီးသီးကို သူ့နေရာနဲ့သူ တာဝန်ကျရာနေရာကနေ ပူးပေါင်းလုပ်ဆောင်ခဲ့တာဖြစ်တယ်လို့ သိရပါတယ်။

မြိုင်မြို့နယ်အတွင်းမှာ စစ်ကောင်စီလက်အောက်ခံပျူစောထီးကျေးရွာ ၅ ရွာရှိတဲ့အနက် ပျူစောထီးကျေးရွာ ၂ ရွာကို တော်လှန်ရေးတပ်ပေါင်းစုတွေက သိမ်းပိုက်ရရှိထားပြီးဖြစ်တယ်လို့ သိရပါတယ်။