တနင်္သာရီတိုင်း၊ မြိတ်မြို့၊ မြို့သစ်စာသင်ကျောင်းရှေ့မှာ မီးလောင်မှုဖြစ်ပွားခဲ့ပြီး နေအိမ် ၂ ဆောင် ပျက်စီးခဲ့တယ်လို့ မြို့ခံတွေက ပြောပါတယ်။
ဒီဇင်ဘာ ၁၇ ရက် မနက် ၇ နာရီခွဲဝန်းကျင်မှာ စာသင်ကျောင်းရှေ့ရှိ ဆိုင်ခန်းတွဲမှာ စပြီး မီးလောင်ခဲ့တယ်လို့ မြို့ခံတွေက ပြောပါတယ်။
မြို့သစ်ရပ်ကွက်မှာနေထိုင်သူတယောက်က “ဘယ်လိုစပြီးလောင်တာလဲတော့ အတိအကျ မသိရသေးဘူး။ နေအိမ်တွေက တဆက်တည်း ပူးနေကြတော့ မီးကူးမြန်သွားတယ်” လို့ ပြောပါတယ်။
မီးလောင်မှုဖြစ်ပြီး ၁၀ မိနစ်အကြာမှာ မီးသတ်ကား ၇ စီးလောက် ရောက်လာပြီး ၈ နာရီခွဲဝန်းကျင်လောက်မှ မီးငြှိမ်းသတ်နိုင်ခဲ့ပါတယ်။
အခင်းဖြစ်နေရာရှိ နေအိမ်တွေအောက်မှာ ဆိုင်ခန်းတွဲပြုလုပ်ထားပြီး အဆိုပါမီးလောင်မှုကြောင့် နေအိမ် ၂ ဆောင် ပျက်စီးခဲ့တယ်လို့ မြို့ခံတွေဆီကနေ သိရပါတယ်။
အဆိုပါမီးလောင်မှုနဲ့ ပတ်သက်ပြီး မြိတ်မီးသတ်ဦးစီးဌာနကို ဆက်သွယ်မေးမြန်းခဲ့ရာ “မီးလောင်မှုက စုံစမ်းနေတုန်းပဲ ရှိသေးတယ်။ ကျနော်တို့ ပြောလို့မရသေးဘူး” လို့ ပြောပါတယ်။
