၇၇ ကြိမ်မြောက် လေတပ်နှစ်ပတ်လည်နေ့မှာ စစ်ကောင်စီက ထုတ်လုပ်ထားတဲ့ ကင်းထောက်လေယာဉ် MTX-1A နဲ့ MTX-1B ၂ စီး အပါအဝင် တခြားလေယာဉ်တွေနဲ့အတူ တပ်တော်ဝင်ခဲ့ပါတယ်။
မိတ္ထီလာတပ်နယ် လေကြောင်းအတတ်သင် လေတပ်စခန်းဌာနချုပ်မှာ ဒီဇင်ဘာ ၁၅ ရက်က ပြုလုပ်တဲ့ ၇၇ ကြိမ်မြောက် လေတပ်နှစ်ပတ်လည်နေ့မှာ MTX-1A နဲ့ MTX-1B ၂ စီးနဲ့ တိုက်ခိုက်ရေးရဟတ်ယာဉ်၊ သယ်ယူပို့ဆောင်ရေး ရဟတ်ယာဉ်နဲ့ ထောက်ပို့လေယာဉ်တို့ တပ်တော်ဝင်ခဲ့ပါတယ်။
၇၇ ကြိမ်မြောက် လေတပ်နှစ်ပတ်လည်နေ့ တပ်တော်ဝင်ပွဲကို စစ်ခေါင်းဆောင် တက်ရောက်ခဲ့ပြီး “ပိုင်ဆိုင်ထားတဲ့ လေယာဥ်တွေနဲ့ လက်နက်စနစ်ကို အပြည့်အဝ အသုံးချစစ်ဆင်နိုင်ဖို့အတွက် လေကျင့်သားပြည့်ဝနေမှာဖြစ်ပြီး လေကြောင်းကနေ ထိုးစစ်ဆင်ဖို့ အကြိမ်ကြိမ် လေကျင့်ဖို့” မိန့်ခွန်းမှာ ထည့်သွင်းပြောဆိုခဲ့ပါတယ်။
စစ်ကောင်စီက ထုတ်ထားတဲ့ ကင်းထောက်လေယာဥ်အမျိုးအစား ဖြစ်တဲ့ MTX-1A နဲ့ Turboprop အင်ဂျင်နဲ့ Glass Cockpit System အခြေခံထားတဲ့ MTX-1B လေယာဥ် ၂ စီးဟာ အာဏာသိမ်းပြီး ၄ နှစ်တာအတွင်း ထုတ်ခဲ့တာဖြစ်ပြီး ဒီနှစ် တပ်တော်ဝင်အခမ်းအနားမှာ စမ်းသပ်ပျံသန်းတာ ဖြစ်ပါတယ်။
၂၀၂၃ ခုနှစ် ၇၆ နှစ်မြောက် လေတပ်နှစ်ပတ်လည်နေ့မှာ Su-30 SME စတုတ္ထမျိုးဆက်လွန် ဘက်စုံသုံး အကြီးစားတိုက်လေယာဉ် ၂ စင်း တပ်တော်ဝင်ခဲ့သလို ၇၅ နှစ်မြောက် လေတပ်နှစ်ပတ်လည်နေ့က တပ်တော်ဝင်ခဲ့တဲ့ Su-30 SME တိုက်လေယာဉ် ၂ စီးလည်း ရှိပါတယ်။
