ဆီးရီးယားနိုင်ငံမှာ အစ္စလာမ္မစ်နိုင်ငံတော် (IS) အဖွဲ့က သူတို့အာဏာပါဝါတွေကို ပြန်ထူထောင်ဖို့ ကြိုးစားလာနိုင်တယ်လို့ အမေရိကန်နိုင်ငံခြားရေးဝန်ကြီး အန်တိုနီဘလင်ကန်က ဒီဇင်ဘာ ၉ ရက်မှာ သတိပေးလိုက်ပြီး အမေရိကန်ပြည်ထောင်စုကတော့ ဒီလိုဖြစ်မလာစေဖို့ ဆုံးဖြတ်ထားကြောင်းလည်း ပြောကြားခဲ့ပါတယ်။ 

ဒီအစိုးရရဲ့ အဆုံးသတ်ဟာ သမိုင်းဝင်အခွင့်အရေးတရပ်ကို ပေးစွမ်းနိုင်ပေမဲ့ အန္တရာယ်များစွာကိုလည်း သယ်ဆောင်လာနိုင်တဲ့ အခိုက်အတန့်လည်း ဖြစ်ကြောင်း ဘလင်ကန်က ပြောပါတယ်။ 

အိုက်ဆစ်စ်အဖွဲ့ဟာ ဒီကာလမှာ သူတို့ရဲ့စွမ်းရည်တွေကို ပြန်ထူထောင်ပြီးတော့ သူတို့အတွက် လုံခြုံတဲ့ ခိုလှုံရာကို ဖန်တီးဖို့ ကြိုးစားလိမ့်မယ်လို့လည်း ဆိုပါတယ်။

အရပ်သားတွေကို ကာကွယ်ဖို့၊ လူ့အခွင့်အရေးကို လေးစားလိုက်နာဖို့၊ အထူးသဖြင့် ထိခိုက်လွယ်တဲ့ လူနည်းစုတွေကို လေးစားဖို့၊ နိုင်ငံတော်ရဲ့ အင်စတီကျူးရှင်းတွေနဲ့ ဝန်ဆောင်မှုတွေကို ထိန်းသိမ်းဖို့၊ ဆီးရီးယားပြည်သူတွေရဲ့ လိုအပ်ချက်တွေကို ဖြည့်ဆည်းပေးပြီး ပါဝင်တဲ့ အုပ်ချုပ်ရေးကို တည်ဆောက်ဖို့အတွက် ပါဝင်သူတွေအားလုံးက လုပ်ဆောင်ဖို့က အရေးကြီးတယ်လို့ ဘလင်ကန်က ပြောပါတယ်။ 

ဆီးရီးယားပြည်သူတွေဟာ သူတို့အနာဂတ်ကို ရွေးချယ်ရမှာ ဖြစ်တယ်လို့လည်း ဘလင်ကန်က ပြောသွားပြီး အားလုံးပါဝင်တဲ့ အုပ်ချုပ်မှုတည်ဆောက်ရေးနဲ့ ပတ်သက်လို့ သူပုန်ခေါင်းဆောင်တွေရဲ့ ပြောကြားချက်တွေကို ကြိုဆိုပေမဲ့ အမှန်တကယ် အစီအမံကတော့ သူတို့ပြောနေတာကိုသာ မဟုတ်ဘဲ သူတို့ လုပ်ဆောင်ရမယ့် လုပ်ရပ်သာ ဖြစ်တယ်လို့လည်း ဆိုပါတယ်။

အခုသီတင်းပတ်ကုန်မှာ ဒမတ်စကတ်ကို သူပုန်တပ်တွေ သိမ်းပိုက်ပြီးနောက် အာဆတ်ကို ဖြုတ်ချခြင်းဟာ အရှေ့အလယ်ပိုင်းမှာ အီရန်ရဲ့ သြဇာလွှမ်းမိုးမှုကွန်ရက်ကို ဖြိုခွဲလိုက်နိုင်တာ ဖြစ်ပေမဲ့ အစ္စရေး၊ အမေရိကန်နဲ့ အာရပ်စတဲ့ အင်အားကြီးနိုင်ငံတွေဟာ အာဆတ် နေရာကို အစားထိုးလာမယ့် စရိုက်စုံရှိ တပ်ဖွဲ့ဝင်တွေဆီကနေ မတည်ငြိမ်မှုနဲ့ အစွန်းရောက်ဝါဒရဲ့ အန္တရာယ်ကို ရင်ဆိုင်ရတော့မှာ ဖြစ်ပါတယ်။ 

အစ္စလာမ္မစ်နိုင်ငံတော်အကြမ်းဖက်အဖွဲ့ဟာ ၂၀၁၄ ခုနှစ်မှာ ဆီးရီးယားနဲ့ အီရတ်နိုင်ငံ အများအပြားကို ဖြတ်ကျော်ဝင်ရောက်ခဲ့ပြီး အစ္စလမ္မစ်နိုင်ငံတော်ကို ထူထောင်ခဲ့တာပါ။ ၂၀၁၉ ခုနှစ်မှာတော့ အမေရိကန် ဦးဆောင်တဲ့ ညွန့်ပေါင်းအဖွဲ့မှ တိုက်ထုတ်ခဲ့တာ ဖြစ်ပါတယ်။

Source: Reuters