ရခိုင်ပြည်နယ်၊ မောင်တောမြို့ အမှတ်(၅) နယ်ခြားစောင့်ရဲတပ်ဖွဲ့ခွဲ (နခခ ၅) က ထွက်ပြေးလွတ်မြောက်သွားတဲ့ စစ်ဆင်ရေးကွပ်ကဲရေးမှူး ဗိုလ်မှူးချုပ် သူရိန်ထွန်း အပါအဝင် စစ်တပ်အရာရှိတချို့ကို အာရက္ခတပ်တော် (AA) လက်ရဖမ်းဆီးမိတယ်လို့ စစ်ရေးသတင်းရင်းမြစ်က ပြောပါတယ်။

ဒီဇင်ဘာ ၈ ရက် ညနေ ၅ နာရီလောက်က ကျောက်ပန္ဒူဘက်ကို ထွက်ပြေးတဲ့ လမ်းခုလတ်တနေရာမှာ ဗိုလ်မှူးချုပ်သူရိန်ထွန်း အပါအဝင် ARSA၊ RSO စတဲ့ စစ်ကောင်စီ ပူးပေါင်းလက်နက်ကိုင် အင်အား ၈၀ ကျော်နဲ့ တိုက်ပွဲဖြစ်ပွားပြီး တိုက်ပွဲအတွင်းမှာပဲ လက်ရဖမ်းဆီးမိတာလို့ ဆိုပါတယ်။

ရခိုင်စစ်ရေးသတင်းရင်းမြစ်က “မနေ့က ၅ နာရီလောက်ဖြစ်မယ် တိုက်ပွဲထဲမှာပဲ ဖမ်းဆီးရမိတာပါ။ ကျောက်ပန္ဒူဘက်ကို သွားရင် သီဟိုဠ်ခြံရှိတယ် အဲဒီမှာပဲ တိုက်ပွဲဖြစ်ရင်း ဖမ်းဆီးမိခဲ့တာ။ သူရိန်ထွန်းအပါအဝင် အရာရှိတချို့ရယ် မွတ်ဆလင်လက်နက်ကိုင်အင်အား ၈၀ လောက်ပါတယ်" လို့ ပြောပါတယ်။

မောင်တောမြို့နယ် တခုလုံးကို AA က သိမ်းပိုက်ရရှိပေမဲ့ ထွက်ပြေးလွတ်မြောက်သွားတဲ့ ARSA ၊ RSO စတဲ့ စစ်ကောင်စီပူးပေါင်းလက်နက်ကိုင်တချို့ရှိနေသေးတာကြောင့် တိုက်ပွဲက ဆက်လက်ရှိနေမယ်လို့ ဒေသခံက ဆိုပါတယ်။

ဒီဇင်ဘာ ၈ ရက် ၉ နာရီခွဲလောက်မှာ မောင်တောမြို့ အမှတ် (၅) နယ်ခြားစောင့် ရဲတပ်ဖွဲ့ခွဲ (နခခ ၅) ကို အာရက္ခတပ်တော် (AA) က  အပြီးသတ်သိမ်းပိုက်ရရှိခဲ့တယ်လို့ ထုတ်ပြန်ထားပါတယ်။