နေပြည်တော်၊ ဒက္ခိဏသီရိမြို့နယ်၊ သံတမန်ဇုန်ထဲက ရွှေပြည်တော်ဝင်လမ်းနဲ့ သဇင်လမ်းဆုံမှာ ဒီဇင်ဘာ ၂ ရက် ည ၇ နာရီက အိမ်စီးကားနဲ့ ရဲကားတစီး တိုက်မိပြီး ရဲ ၂ ယောက် သေဆုံးကာ ၁၅ ယောက် ဒဏ်ရာရခဲ့တယ်လို့ နေပြည်တော် သတင်းအရင်းအမြစ်တွေဆီက သိရပါတယ်။
ဒီဇင်ဘာ ၂ ရက် ည ၇ နာရီက သံတမန်ဇုန်ထဲမှာ လှည့်ကင်းလှည့်နေတဲ့ လုံခြုံရေးရဲကားတစီးနဲ့ ပုပ္ဗသီရိမြို့နယ်က အိမ်စီးကားတစီး တိုက်မိခဲ့တာလို့ သတင်းအရင်းအမြစ်က DVB ကို ပြောပါတယ်။
“အိမ်စီးကားက အမျိုးသမီးလည်း ဒဏ်ရာရတယ်၊ ရဲ ၁၇ ယောက် ဒဏ်ရာရတယ်၊ ၂ ယောက် သေတယ်၊ ၁၅ ယောက်က ဆေးရုံမှာပဲ။”
ကား ၂ စီး မျက်နှာချင်းဆိုင်တိုက်မှုကြောင့် ဒဏ်ရာရခဲ့တဲ့ ရဲအရာရှိ ၃ ယောက်နဲ့ အခြားအဆင့် ၁၄ ယောက်ကို နေပြည်တော် ခုတင် ၁၀၀၀ ကို ပို့ခဲ့ရာ ဒီဇင်ဘာ ၃ ရက် မနက်မှာ ဒုရဲအုပ်တယောက်နဲ့ တပ်ကြပ်ကြီးတယောက် သေဆုံးခဲ့တာလို့ မြို့နယ်ရဲစခန်းနဲ့ နီးစပ်တဲ့ သတင်းအရင်းအမြစ်က DVB ကို ပြောပါတယ်။
“ကားခေါင်းခန်းမှာထိုင်တဲ့ ဒုရဲအုပ်တယောက်နဲ့ တပ်ကြပ်ကြီး ဒီနေ့မနက် ဆုံးသွားတယ်၊ ကျန်တဲ့သူတွေက လက်ကျိုး ခြေကျိုး ဒဏ်ရာတွေချည်းပဲ၊ အခုချိန်ထိ ဆေးရုံမှာပဲ။”
လတ်တလောမှာ အဆိုပါယာဥ်တိုက်မှုနဲ့ ပတ်သက်ပြီး ဒက္ခိဏသီရိ မြို့မရဲစခန်းက အိမ်စီးကားမောင်းနှင်သူကို အမှုဖွင့် စစ်ဆေးနေပါတယ်။
