မကွေးတိုင်း၊ ဆိပ်ဖြူမြို့နယ်မှာ စစ်ကောင်စီယာဉ်တန်းကို နိုဝင်ဘာ ၂၃ ရက် ညနေ ၅ နာရီဝန်းကျင်မှာ ကြားဖြတ်တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၆ ယောက်ထက်မနည်း သေဆုံးခဲ့​တယ်လို့ မကွေးတိုင်း ပကဖ ရွေ့လျားစစ်ကြောင်း (Yenanthar Column) ရဲ့ ပြန်ကြားရေးတာဝန်ခံက ပြောပါတယ်။

“မြင်းခြံ ကပစ ၂၂ ကနေ ထွက်လာတဲ့ စစ်ကား ၃ စီးနဲ့ စစ်ယာဉ်တန်းကို တိုက်ခိုက်ခဲ့လို့ သူတို့ဘက်က ၆ ကောင်ထက်မနည်း သေတယ်။ ဒဏ်ရာရတဲ့သူတွေလည်း များတယ်။”

အဆိုပါစစ်ယာဥ်တန်းကို ဆိပ်ဖြူမြို့နဲ့ ၁၀ မိုင်လမ်းဆုံကြားမှာ မိုင်းဆွဲ ပစ်ခတ်တိုက်ခိုက်ခဲ့တာလို့ ဆိုပါတယ်။

Yenanthar Column ရဲ့ အဆိုပါစစ်ဆင်ရေးတာဝန်ခံက “သူတို့ စစ်ကား ၃ စီးလာတာ အင်အားဘယ်လောက်ပါလဲတော့ မသိဘူး။ မိုင်းအရင်ဆွဲပြီးမှ မီတာ ၁၀၀ လောက် အကွာကနေ လက်နက်ကြီး လက်နက်ငယ်တွေနဲ့ ပစ်ခဲ့တာပါ။ သူတို့ဘက်က ရမ်းပစ်တာတွေတော့ ရှိတယ်။ ကျနော်တို့ရဲဘော်တွေ ထိခိုက်သူမရှိဘဲနဲ့ ပြန်ဆုတ်လာခဲ့ပါတယ်။ စစ်ယာဥ်တန်းက စခ ၆ ကောင် သေတာ မြင်ခဲ့ရတယ်” လို့ DVB ကို ပြောပါတယ်။

အဲဒီတိုက်ခိုက်မှုကို မကွေးတိုင်း ပြည်သူ့ကာကွယ်ရေးတပ်ဖွဲ့နဲ့အတူ Yenanthar Column၊ ပခုက္ကူခရိုင်တပ်ရင်း ၁၉၊ ဆိပ်ဖြူ ဘာမထီ တပ်ခွဲ ၁၊ တပ်ခွဲ ၂၊ ဆိပ်ဖြူမြို့နယ် ပကဖ အနောက်ပိုင်းဇုန် ၁ တို့ ပူးပေါင်းလုပ်ဆောင်ခဲ့​ကြတာလို့ သိရပါတယ်။

အဆိုပါ တော်လှန်ရေးတပ်ပေါင်းစုတွေဟာ ပြီးခဲ့တဲ့ နိုဝင်ဘာ ၂၂ ရက် ည ၁၂ နာရီခွဲ ဝန်းကျင်ကလည်း ဆိပ်ဖြူမြို့အနီးက ဆော-ဆိပ်ဖြူ ကားလမ်းပိုင်းပေါ်မှာရှိတဲ့ စစ်ကောင်စီ စစ်ဆေးရေးဂိတ်ကို ဝင်ရောက်ပစ်ခတ်ခဲ့လို့ စစ်ကောင်စီတပ်ဖွဲ့ဝင် တပ်ကြပ်တ‌ယောက်နဲ့ တပ်သားတယောက်တို့ သေဆုံးခဲ့သလို ၃ ယောက်ထက်မနည်း ဒဏ်ရာရရှိခဲ့တယ်လို့ Yenanthar Column ကနေ သိရပါတယ်။

တိုက်ခိုက်မှုတွေကြောင့် စစ်ကောင်စီတပ်ဖွဲ့ဝင်တွေ သေဆုံး ဒဏ်ရာရကြတယ်လို့ တော်လှန်ရေးတပ်ပေါင်းစုတွေဆီကနေ သိရပေမဲ့ စစ်ကောင်စီဘက်က သတင်းထုတ်ပြန်လာတာ မတွေ့ရသလို DVB အနေနဲ့လည်း သီးခြား အတည်မပြုနိုင်သေးပါဘူး။