ဧရာဝတီတိုင်း၊ ပုသိမ်မြို့နယ် ရွှေသောင်ယံကမ်းခြေနားမှာ ရခိုင်ပြည်နယ်ကလာတဲ့ စစ်ဘေးရှောင် ၅ ယောက်ကို နိုဝင်ဘာ ၂၃ ရက် ညနေပိုင်းမှာ စစ်ကောင်စီတပ်က ဖမ်းဆီးလိုက်တယ်လို့ စစ်ကောင်စီတပ်နဲ့ နီးစပ်သူတွေဆီက သိရပါတယ်။

စစ်ကောင်စီတပ်နဲ့ နီးစပ်သူတယောက်က “အဖမ်းခံရတဲ့ ကောင်လေးတွေက ရခိုင်ပြည်နယ်က လာတာ။ စစ်ကောင်စီတပ်နဲ့ ရဲတွေက ကင်းလှည့်လာရင်း မသင်္ကာလို့ ဖမ်းတာ။ ဝင်းဇော် ဆိုတဲ့ ကောင်လေး အပါအဝင် ၅ ယောက်ပါ။ ကောင်လေးတွေက အာဏာပိုင်တွေကို သူတို့ဟာ စစ်ရှောင်တွေပါ ဆိုပြီး အထောက်အထားပြတာ မရဘူး။ ရခိုင်မှတ်ပုံတင် တွေ့တာနဲ့ ဖမ်းတာ” လို့ ပြောပါတယ်။

ဖမ်းဆီးခံရသူ ၅ ယောက်ဟာ ရခိုင်ပြည်နယ်၊ ဂွမြို့နယ်ကနေ တိမ်းရှောင်လာတဲ့ စစ်ဘေးရှောင် လူငယ်တွေ ဖြစ်ပြီး  အသက် ၁၉ နှစ်ဝန်းကျင် လူငယ်အမျိုးသား ၂ ယောက်နဲ့ အသက် ၂၀ ကျော် အမျိုးသား ၃ ယောက်ဖြစ်ပါတယ်။

ဧရာဝတီတိုင်းထဲကို စစ်ဘေးရှောင်တွေနဲ့ PDF အပါအဝင် လက်နက်ကိုင်အဖွဲ့တွေ ဝင်မလာစေဖို့ ဆိုပြီး ချောင်းသာ၊ ငွေဆောင်၊ ရွှေသောင်ယံမြို့နားက အဝင်အထွက်ဂိတ်တွေနဲ့ ကမ်းခြေတွေမှာ စစ်ကောင်စီတပ်က အင်အားအများအပြားနဲ့ တင်းတင်းကျပ်ကျပ် စစ်ဆေးနေတယ်လို့ သိရပါတယ်။

နိုဝင်ဘာ ၁၆ ရက်ကလည်း ဂွမြို့နယ်ကနေ စစ်ရှောင်လာသူ ၅ ယောက်ကို ရေကြည်မြို့နယ်မှာ စစ်ကောင်စီက ဖမ်းဆီးခဲ့ပြီး စက်တင်ဘာ ၁၂ ရက်လည်း ရခိုင်ပြည်နယ်ကနေလာတဲ့ စစ်ဘေးရှောင် ၃ ယောက်ကို AA တပ်ဖွဲ့ဝင်ဆိုပြီး ဖမ်းဆီးခဲ့သေးသလို တချို့ကိုတော့ ထောင်ချထားပါတယ်။

ရခိုင်ပြည်နယ်ထဲမှာ AA ရဲ့ ထိုးစစ်ကို အလူးအလဲခံနေရတဲ့ စစ်ကောင်စီဟာ ထိစပ်နေတဲ့ ဧရာဝတီတိုင်းထဲကို တော်လှန်ရေးတပ်တွေ ရောက်မလာစေဖို့ နည်းမျိုးစုံနဲ့ ကြိုးစားနေပြီး ရခိုင်ရိုးမဝန်းကျင်မှာ စစ်ကြောင်းထိုး နယ်မြေရှင်းတာတွေလည်း လုပ်နေပါတယ်။