(က)
“မအလကြီး တရားအားထုတ်ပြီး ပြန်လာပြီကွ စိမ်းမောင်ရ။”
“အဲ . . . သူက တရားစခန်း ဝင်တာလား။”
“အေးပေါ့ကွ၊ မိုးကုတ်တို့ စွန်းလွန်းတို့မှာတော့ မဟုတ်ဘူး။”
“ဒါဆို ဘယ်မှာ ဝင်ခဲ့တာလဲ မူးသာရဲ့။”
“ဘယ်မှာဖြစ်ရမလဲဟ စိမ်းမောင်ရ၊ တရုတ်နိုင်ငံမှာ ‘တရုတ်အားထား’ ပြီး ပြန်လာတာပါဗျား။”
“ဝါး . . . ဟားဟား ဟားဟား ဟားဟား။”
“စိမ်းသရဖူစိမ်း အဘစိမ်းမောင်က “သေနာတွေ ဟုဆိုကာ ‘တင်း’ သွားပါလေ၏။ အရွှင်အဘ တွေက တဟားဟားဖြင့် ဆက်ပါ၏။
“သူ အသွားတုန်းက လေယာဉ်ကွင်းမှာ ဗုံးကွဲခဲ့သေးတာ ကြားတယ်နော်။”
“အေး . . . အဲ့ဒါ ဘာဖြစ်လဲ။”
“အဲ့ဒါ လုံခြုံရေးအတွင်းစည်းထဲက လူတွေရဲ့ လက်ချက်ပေါ့ ဟကောင်ရ။”
“ဟေ . . .”
“ဒါပေမယ်လို့ သူပြန်လာတော့ ဘာမှမဖြစ်ဘူးကွ။”
“အဲ . . .”
“အသွားတုန်းက တိတ်တဆိတ်သွားခဲ့ပေမဲ့ အပြန်ကျတော့ ဆူဆူညံညံဟ။”
“ဘာတွေ ဆူညံလို့လဲဟ။”
“ဘာတွေဆူညံရမလဲကွ၊ လေဆိပ်မှာ ဆိုင်းတွေ၊ ဗုံတွေနဲ့ တရုတ်နဂါးတွေနဲ့ တဒုန်းဒုန်းဟ။
“အေး . . . ရုပ်ရှင်မင်းသား မင်းသမီးတွေ၊ ဒါရိုက်တာတွေ၊ လူရွှင်တော်တွေ အဖွဲ့လိုက် အဖွဲ့လိုက် မြိုင်မြိုင်ဆိုင်ဆိုင်ကိုးကွ”
“ဟုတ်ပ စိမ်းမောင်ရာ၊ အခု သတင်းတခုထွက်နေတယ်ကွ၊ မအလကို လေဆိပ်ထဲ လေယာဉ်နားအထိ သွားကြိကြတဲ့ မင်းသား မင်းသမီးတွေ၊ ဒါရိုက်တာတွေ၊ လူပြက်တွေကို ‘သူရ’ ဘွဲ့ ပေးမယ်လို့ ကြားရတယ်။
“ဟေ . . . ‘သူရ’ ဘွဲ့ဆိုတာ ကျည်ဆန်တွေ ဗုံးတွေကြားမှာ တိုင်းပြည်နဲ့လူမျိုးအတွက် သက်စွန့်ဆံဖျား ရဲရဲရင့်ရင့်လှုပ်ရှားကာကွယ်ခဲ့ကြတဲ့သူတွေကို ပေးတာမဟုတ်လားဟ။”'
“အေးလေကွာ၊ အခုလည်း ဘောမအနုပညာရှင်လူသိုက်က ကြင်စိုး သာ၀ မအလကို ကျည်ဆန်တွေ ဒရုန်းတွေ ဗုံးတွေကြားမှာ အသက်ကို ပဓာနမထားဘဲ သွားကြိုကြလို့ သူတို့ကို မအလ က ‘သူရ’ ဘွဲ့တွေ ကိုယ်စီပေးဖို့ ညွှန်ကြားထားပါသတဲ့ ဗျား။”
“ဝါး . . . ဟားဟား ဟားဟား ဟားဟား။”
(ခ)
အဘစောမူးသာနှင့် စစ်ပြန်ကြီးအဘလုံးတုံးတို့၏ အတိုင်အဖောက်ကို အဘစိမ်းမောင် ကျွဲမြီး တိုနေလေပြီ။ “ငါတို့က နောက်တာပါကွာ” ဟုပြောတော့ “အေးပါ” ဟု ဘုဆတ်ဆတ် ပြန်ပြောပါ၏။
“မင်းတို့အဘရဲ့ အိမ်အပြန်လေဆိပ်မှာ တကယ့်ကို အေးအေးချမ်းချမ်းပါကွာ။”
“အင်း . . .”
“ဘာပေါက်ကွဲမှုမှလည်း မဖြစ်ခဲ့ဘူး၊ ဘယ်အဖွဲ့ကမှလည်း မတိုက်ခိုက်ခဲ့ဘူး။”
“ဒီလိုပဲ ဖြစ်ရမှာပေါ့ကွ။”
“ဘာဗုံးမှမကွဲတာ ဘာဖြစ်လို့လဲ သိလား။”
“လုံခြုံရေး ကောင်းလို့ပေါ့ဟ။”
“မဟုတ်ဘူးကွ စိမ်းမောင်ရ၊ ‘လူသားတံတိုင်း’ ကြောင့်ကွ။”
“ဟမ် . . . ဘယ် . . ဘယ်လို။”
“မအလဟာ ရှေ့တန်းစစ်မျက်နှာတွေမှာချည်း ‘လူသားတံတိုင်း’ ခံတာမဟုတ်ဘူး၊ လေဆိပ်မှာလည်း ‘လူသားတံတိုင်း’ ခံထားနေပြီကွ။”
“ဟေ . . .”
“သူလုံခြုံဖို့အတွက် ကျောင်းသား ကျောင်းသူ လူမမယ်ကလေးတွေကို ချောဆွဲပြီး သူ့ရှေ့ကကာဖို့ ‘လူသားတံတိုင်း’ လုပ်ခဲ့တယ်ကွာ။”
“အာ . . .”
“ဒီကောင်ဟာ စိတ်ထားကယုတ်သလောက် အကျင့်ကလည်း မကောင်းဘူး။”
“ဟားဟား ဟားဟား ဟားဟား။”
“အသွားတုန်းကလည်း သူ့အောက်က ဗိုလ်ချုပ်မယားတွေကို ‘ဓားစာခံ’ ခေါ်သွားတယ်။”
“အပြန်ကျတော့လည်း ‘ကလေးတွေ’ ကို ‘ဓားစာခံ’ ထားပြန်တယ်ပေါ့ မူးသာ။”
“မှန်လိုက်လေ လုံးတုံးရာ။”
“ဘုရားရှင်လက်ထက်တော်ဆိုရင်တော့ ‘အယုတ်ညံ့ဆုံး’ မှာ ‘ဧတဒဂ်’ ရမယ့် တကယ့် မိစ္ဆာကောင်။”
“ဟားဟား ဟားဟား ဟားဟား”
“နောက်ဆို ကြည့်နေ၊ ဒီကောင်ကြီး ဘယ်နေရာသွားသွား ကလေးသူငယ်တွေကို လူသားတံတိုင်းလုပ်ပြီး ကာဗာယူတော့မှာ။”
“ဘောမ ရုပ်ရှင်၊ သဘင်၊ ဂီတလုလင်တွေလည်း အဲသည်လို ကြိုဆိုရေးလာဖို့ အိမ်ကအထွက်မှာ သရဏဂုံတင်ပြီး ကြောက်ကြောက်လန့်လန့်နဲ့ လာခဲ့ရပုံပဲ။”
“ဟဲဟဲ ဟဲဟဲ ဟဲဟဲ။”
“အခုတော့ ကြိုရကျိုး နပ်သွားကြပြီပေါ့။”
“ဘာ့ကြောင့်လဲဟ။”
“ခုတော့ ‘သူရဘွဲ့’ တွေ ကိုယ်စီ ရကြတော့မှာမို့တဲ့ဗျား။”
“ဟား ဟား ဟား ဟား ဟား ဟား”
(ဂ)
“ဒါနဲ့ မအလ တရုတ်မှာ အဆင်ပြေခဲ့ပုံပဲလား။”
“အဆင်ပြေမပြေတော့ မသိဘူး၊ သွေးလေခြောက်ခြားပြီး ‘ခေါင်းမွေးတွေ’ အကုန်လုံး ‘ဖြူ’ သွားတယ်လို့ အတွင်းသတင်းအရ သိရတယ် မူးသာရ။”
“ဟေ . . . အရင်က မဖြူဘူးလား။”
“တပ်တွင်း ဆံသဆရာရဲ့သတင်းအရ မအလဟာ အာဏာသိမ်းပြီးတဲ့နေ့ကစလို့ ခေါင်းမွေးတွေ ဆက်တိုက်ကြီး ဖြူလာလိုက်တာ ဆံပင်ဆိုးဆေး အမြဲဆိုးပေးရသတဲ့ဟ။”
“ဟေ . . . ဒီလိုလား။”
“အေးကွ၊ တရုတ်မသွားခင် အနက်ဆိုးသွားသေးတာ၊ ဟိုလည်းရောက်ရော ရုတ်တရက်ကြီးကို တခေါင်းလုံး ထဖြူ တာတဲ့ဟ။”
“ဆေးပညာသဘောအရ အဲသည်လို ဖြစ်ရပ်တွေ ကမ္ဘာမှာလည်း ရှိခဲ့ဘူးတယ်ကွ။”
“ငါလည်း ဖတ်ဖူးတယ်၊ လူတစ်ယောက်ဟာ စိတ်ဖိစီးမှုဒဏ်ကြောင့် ညပိုင်း ဆံပင်အနက်ကနေ မနက်လည်းကျရော တခေါင်းလုံး ဆွတ်ဆွတ်ဖြူသွားခဲ့တဲ့ သာဓက ရှိသကွ။”
“ဟုတ်တယ်ကွ၊ အခုလည်း မြန်မာနိုင်ငံမှာ စိတ်အညစ်ဆုံးလူ၊ စိတ်အဖိစီးဆုံးလူဟာ ကြင်စိုး သာ၀ မအလပဲ။”
“အမှန်ပဲဟ လုံးတုံးရ၊ အခု ဒီကောင်ကြီး ခေါင်းတွေ မတရားကိုခြောက်ပြီး ကမူးရှူးထိုး ဂယောက်ဂယက် ဂယောင်ချောက်ချားတွေ ဖြစ်လို့ ခေါင်းမွေးတွေပါ ဆွတ်ဆွတ်ဖြူနေပြီလေ။”
“သူ့အမွေးလိုပဲ သူ့လက်ပါးစေ ဖက်ဆစ်တပဟာလည်း ဖြူကာပြာကာ ဖြစ်နေပြီ။”
“တပ်ထဲမှာ လူမရှိတော့သလောက် ဖြစ်နေပြီဆိုတော့ လူသစ်စုဆောင်းဖို့ ဒီကောင်ကြီး ဘာတွေဘယ်လို ကြံဖန်ဦးမလဲ မသိဘူး။”
“သူ့တပ်အတွက် တပ်သားသစ်တွေ ဝေးဝေးသွားရှာစရာမလိုပါဘူး၊ နီးနီးနားနားမှာ ရှိတယ်။”
“ဘယ်သူတွေလဲဟ။”
“ဘယ်သူတွေကမလဲဟ၊ ‘သူရဘောမ’ အဖွဲ့ကို တပ်ထဲဆွဲသွင်းလိုက်ရုံပါတဲ့ဗျား။”
“ဝါး . . . ဟားဟား ဟားဟား ဟားဟား”
ဖေကြီး(လေရှီး)
