ရှမ်းပြည်တောင်ပိုင်း၊ အင်းလေးဒေသ၊ မန်ကျည်းစင်ရွာမှာ နိုဝင်ဘာ ၁၅ ရက် မနေ့ညပိုင်းက မီးပုံးပျံ ပြုတ်ကျလို့ မီးလောင်ရာကနေ ဟိုတယ်တလုံး မီးလောင်ပျက်စီးခဲ့တယ်လို့ ဒေသတွင်း သတင်းတွေအရ သိရပါတယ်။
မီးပုံးပျံ ပြုတ်ကျရာကနေ Inle Princess Resort စတင်မီးလောင်ကျွမ်းခဲ့တာဖြစ်ပြီး ဟိုတယ်တခုလုံးနီးပါး မီးလောင်ပျက်စီးခဲ့ကြောင်း၊ ချက်ချင်းဝိုင်းဝန်းမီးငြှိမ်းသတ်ခဲ့ပေမဲ့ လူနည်းလို့ မီးကိုမနိုင်ကြောင်း ရှမ်းပြည်အခြေစိုက် မဲခေါင်သတင်းမှာ ဖော်ပြထားပါတယ်။
မီးသတ်ဦးစီးဌာနကတော့ မနေ့ည ၇ နာရီခွဲလောက်က ညောင်ရွှေမြို့နယ်၊ မန်ကျီးစင်ရွာမှာ မီးလောင်မှုဖြစ်ပွားကြောင်း သတင်းရလို့ ညောင်ရွှေမြို့နယ်မီးသတ်စခန်းက မီးငြှိမ်းသတ်ယာဉ် ၁ စီး၊ မီးသတ်ရေသယ်ယာဉ် ၁ စီး၊ နဲ့ မီးငြှိမ်းသတ်ရာမှာ ည ၁၀ နာရီ ၁၅ မိနစ်မှာ မီးငြိမ်းသွားကြောင်း ထုတ်ပြန်ထားပါတယ်။
အဆိုပါမီးလောင်မှုနဲ့ပတ်သက်ပြီး လူထိခိုက်တာ ရှိ/မရှိနဲ့ ပျက်စီးဆုံးရှုံးတဲ့အခြေအနေ အသေးစိတ်တော့ မသိရသေးပါဘူး။
