၂၀‌၂၄ -၂၀၂၅ ခုနှစ်အတွက် ပြက္ခဒိန်တွေမှာ အများပြည်သူ ရုံးပိတ်ရက်တွေကို မှားယွင်းဖော်ပြမိလို့ ပြက္ခဒိန်ထုတ်ဝေသူတချို့ကို စစ်ကောင်စီက ခေါ်ယူသတိပေးခဲ့ကြောင်း နိုဝင်ဘာ ၁၀ ရက်ထုတ် ကြေးမုံသတင်းစာမှာ ဖော်ပြပါတယ်။

မှားယွင်းဖော်ပြမိတဲ့ ပြက္ခဒိန်တွေမှာ အများပြည်သူ ရုံးပိတ်ရက်တွေအဖြစ် ၂၀၂၄ ခုနှစ် နိုဝင်ဘာ ၁၄ ရက်၊ ၂၀၂၅ ခုနှစ် ဇွန် ၁၀ ရက်၊ ဒီဇင်ဘာ ၄ ရက်၊ စက်တင်ဘာ ၂၉ ရက်နဲ့ ဒီဇင်ဘာ ၂၉ ရက်နေ့တွေ ဖြစ်တယ်လို့ သတင်းမှာ ပါရှိပါတယ်။

ခေါ်ယူသတိပေးခံခဲ့ရတဲ့ ထုတ်ဝေသူတယောက်က “အမှားပြင်ဆင်ချက်အနေနဲ့ တောင်းပန်စာလေးတော့ ထည့်ပေးထားပါတယ်။ နောက်တစ်ခုက ရှေ့ပိုင်းက နေရာလေးတွေပဲ မှားသွားတာပါ။ နောက်ပိုင်းက နေရာလေးတွေကတော့ အမှန်ပြန်ပြင်လိုက်နိုင်ပါတယ်။ အခုလို ဖြစ်သွားတဲ့အတွက် နောက်နှစ်တွေမှာ ဒီလို အမှားလေးတွေကအစ သင်ခန်းစာယူပြီးတော့ ထုတ်တဲ့ Production လေးတွေ အမှားမပါဖို့နဲ့ စားသုံးတဲ့ပြည်သူတွေ မှန်မှန်ကန်ကန် သိရှိဖို့ ဒါလေးတွေကို ကျနော်တို့ ကြိုးစားပြင်ဆင်သွားပါမယ်” လို့ ပြောပါတယ်။

အစိုးရ ရုံးပိတ်ရက်မှားယွင်းမှုနဲ့ ပတ်သက်ပြီး ရွှေနိုင်ငံ ပိုစတာနဲ့စာပေဖြန့်ချိရေး၊ ရွှေဝါဝင်းစာပေ၊ ဦးအောင်မျိုးစာပေ၊ အစ္စလာမ့်မီးအိမ်စာပေတိုက်၊ မြတ်သဇင်စာပေနဲ့ ဆွေမဟာစာပေက ထုတ်ဝေသူတွေကို မှန်ကန်စွာ ဖော်ပြထုတ်ဝေဖို့ ခေါ်ယူသတိပေးပြီး ဝန်ခံကတိပြု လက်မှတ်ရေးထိုးစေခဲ့ကြောင်း သိရပါတယ်။

ပြက္ခဒိန်ထုတ်ဝေသူတွေအနေနဲ့ မြန်မာနိုင်ငံပြက္ခဒိန်အကြံပေးအဖွဲ့ပညာရှင်တွေ ရေးဆွဲထားတဲ့ မြန်မာ-ရခိုင်-အင်္ဂလိပ် မူမှန်ပြက္ခဒိန်ပါ ရုံးပိတ်ရက်တွေ၊ စစ်ကောင်စီက အမိန့်ကြေညာစာနဲ့ ထုတ်ပြန်တဲ့ အများပြည်သူရုံးပိတ်ရက်တွေ၊ စစ်ကောင်စီ ပြန်ကြားရေးဝန်ကြီးဌာနက ထုတ်ဝေတဲ့ ပြက္ခဒိန်ပါ အများပြည်သူ ရုံးပိတ်ရက်တွေအတိုင်းသာ ဖော်ပြထုတ်ဝေရမှာ ဖြစ်ကြောင်းလည်း စစ်ကောင်စီက သတိပေးထားတာပါ။

ရုံးပိတ်ရက် မှားယွင်းဖော်ပြခဲ့တဲ့ ပြက္ခဒိန်အမည်တွေမှာ ၂၀၂၄ ခုနှစ် ရွှေနိုင်ငံပြက္ခဒိန်၊ စန်းမြမြ တရုတ်-အင်္ဂလိပ်-မြန်မာ သုံးဘာသာပြက္ခဒိန်၊ ရွှေနှစ်သစ်ပြက္ခဒိန်၊ ဝေဒိကပြက္ခဒိန်၊ ရှေးဟောင်း သမိုင်းဝင် မွေတော်ကက္ကူဘုရားပြက္ခဒိန်နဲ့ အစ္စလာမ့်မီးအိမ်ပြက္ခဒိန်တို့ ဖြစ်ကြောင်း စစ်ကောင်စီ ပြန်ကြားရေးဝန်ကြီးဌာနက သိရပါတယ်။

ဒါ့အပြင် စစ်ကောင်စီ သတ်မှတ်ချက်အရ လာမယ့် ၂၀၂၅ ခုနှစ် ပြက္ခဒိန်နှစ်အတွက် အများပြည်သူ အလုပ်ပိတ်ရက်တွေထဲမှာ တရုတ်နှစ်သစ်ကူးနေ့လည်း ပါဝင်လာမှာဖြစ်ကြောင်း သိရပါတယ်။