ချင်းပြည်နယ်၊ မင်းတပ်မြို့နယ်ကို စစ်ကောင်စီက ၂ ရက်ဆက်တိုက် လေကြောင်းကနေ ဗုံးကြဲအကြိမ်ကြိမ်ကြဲခဲ့သလို လက်နက်ကြီးနဲ့ပစ်ခတ်ပြီး မီးလည်း ရှို့ခဲ့တယ်လို့ ဒေသခံတွေဆီက သိရပါတယ်။

နီးစပ်သူဒေသခံတယောက်က “ဒီနေ့ မနက် ၅ နာရီကနေ ၆ နာရီခွဲလောက်အထိ မင်းတပ်မြို့ပေါ်ကို Y-12 နဲ့ ၁ နာရီကျော်ကြာ ၄ လုံးတတွဲစီ ဗုံးအလုံး ၅၀ ကျော် ကြဲချတိုက်ခိုက်သွားတယ်။ အပျက်အစီးကိုတော့ စုံစမ်းနေတုန်းပဲ။ ဖုန်းလိုင်းတွေက မကောင်းလို့ ဆက်မရဘူး” လို့ ပြောပါတယ်။

နိုဝင်ဘာ ၉ ရက် မနေ့ ညနေ ၄ နာရီလောက်ကလည်း လောင်းရှည် ကပစ က တာဝေးပစ်ဒုံးတွေနဲ့ မင်းတပ်မြို့အနီးဝန်းကျင်ကို ၄ ကြိမ် ပစ်ခတ်တိုက်ခဲ့ပြီး ညနေ ၅ နာရီလောက်မှာလည်း အေလာ  လေတပ်ကတက်လာတဲ့ ဂျက်ဖိုက်တာ တစင်းက မင်းတပ်မြို့အနီးဝန်းကျင်ကို ပေါင် ၂၅၀ ဗုံး ၄ လုံးနဲ့ ၂ ကြိမ်ကြဲချတိုက်ခိုက်ခဲ့သေးတယ်လို့ သူက ပြောပါတယ်။

ပြီးတော့ ကျောက်ထုအမြောက်တပ်ကနေ မင်းတပ်မြို့ကို ၁၂၀ မမ တွေနဲ့ ၅ ကြိမ်ပစ်ခတ်တိုက်ခိုက်ပြီး ဒရုန်းနဲ့လည်း ဗုံးတွေကြဲသေးတယ်လို့ ဒေသခံတွေ ပြောပါတယ်။

ဒါ့အပြင် ည ၇ နာရီကျော်မှာလည်း တံတားဦးလေဆိပ်က တက်လာတဲ့ ဂျက်ဖိုက်တာက ဗုံး ၄ လုံးကြဲချခဲ့သေးတယ်လို့ သိရပါတယ်။

နီးစပ်သူဒေသခံတယောက်က “ည ၈ နာရီ ၅၅ မိနစ်နဲ့ ၉ နာရီ ၅ မိနစ်လောက်မှာ တံတားဦးလေဆိပ်က တက်လာတဲ့ ဂျက်ဖိုက်တာက မင်းတပ်ဝန်းကျင်ကို ပေါင် ၂၅၀ ဗုံး ၄ လုံး၊ ၂ ကြိမ်ကြဲသွားတယ်။ ည ၈ နာရီခွဲလောက်မှာလည်း Y-12 ထောက်ပို့လေယာဉ်က မင်းတပ်မြို့မှာရှိတဲ့ ခလရ ၂၇၄ ထဲကို ရိက္ခာထုပ်တွေ ချပေးခဲ့တဲ့အပြင် ကင်းထောက်သွားသေးတယ်” လို့ ပြောပါတယ်။

နိုဝင်ဘာ ၉ ရက် မနေ့ကပဲ မင်းတပ်မြို့ ဆောက်လုပ်ရေးလမ်းခွဲနားက ဒေသခံအိမ် ၃၀ လောက်နဲ့   ခေါနူးရိပ်သာ တောင်ဘက်ခြမ်းက အိမ် ၁၀ လုံးကျော်၊ ထွေအုပ်ရုံးနားက အိမ်တချို့ကို စစ်ကောင်စီတပ်က မီးရှို့ခဲ့သေးတယ်လို့ ဒေသခံတွေဆီကသိရပြီး ပျက်စီးတဲ့ အသေးစိတ်ကိုတော့ မသိရသေးပါဘူး။

နိုဝင်ဘာ ၅ ရက်နဲ့ ၆ ရက်ကလည်း စစ်ကောင်စီတပ်က ဂျက်ဖိုက်တာနဲ့ ၄ ကြိမ် လာရောက်ဗုံးကြဲ ပစ်ခတ်တိုက်ခိုက်ခဲ့လို့ ဘုရာကျောင်းအပါအဝင် အိမ်တချို့ ထိခိုက်ပျက်စီးခဲ့ပါသေးတယ်။