ပြီးခဲ့တဲ့ စက်တင်ဘာလအတွင်း ရေကြီးရေလျှံမှု ဖြစ်ပွားခဲ့ပြီး စိုက်ပျိုးရေးကဏ္ဍ ထိခိုက်ခဲ့ပေမဲ့ အောက်တိုဘာလမှာ ဆန်နဲ့ ဆန်ကွဲတန်ချိန် ၄ သိန်းကျော်ထိ တင်ပို့ထားပါတယ်။

မြန်မာနိုင်ငံရဲ့ ဆန်တင်ပို့မှုက အခုဘဏ္ဍာနှစ် အစောပိုင်းကာလ‌တွေမှာ တလကို တန်ချိန်  ၇ သောင်းကနေ ၂ သိန်းစွန်းစွန်းဝန်းကျင်သာ ရှိခဲ့ရာကနေ အခုလို ဆန်တင်ပို့မှု မြင်တက်လာခဲ့တာပါ။

ပြီးခဲ့တဲ့ အောက်တိုဘာလအတွင်း မြန်မာနိုင်ငံဟာ ဆန်နဲ့ ဆန်ကွဲတန်ချိန် စုစုပေါင်း ၄ သိန်း ၂ သောင်းကျော် တင်ပို့ထားတယ်လို့ မြန်မာနိုင်ငံဆန်စပါးအသင်းချုပ် (MRF) က ထုတ်ပြန်တဲ့ ကိန်းဂဏန်းတွေအရ သိရပါတယ်။

ဆန်တန်ချိန် ၂၃၀,၀၀၀ ကျော်တင်ပို့ခဲ့ပြီး ဆန်ကွဲတန်ချိန် စုစုပေါင်း ၁၉၀,၀၀၀ ကျော်ကို ကုမ္ပဏီပေါင်း ၆၀ ခုက တင်ပို့ခဲ့တာဖြစ်ပြီး ပြီးခဲ့တဲ့ စက်တင်ဘာလကထက် ၂ ဆကျော် မြင့်တက်လာခဲ့ပါတယ်။

ဒါ့အပြင် ဒီဘဏ္ဍာနှစ်အတွင်းမှာလည်း အောက်တိုဘာလက လအလိုက် တင်ပို့မှုပမာဏ အမြင့်ဆုံးလည်းဖြစ်ပြီး ပို့ကုန်ဝင်‌ငွေ အမေရိကန်ဒေါ်လာ ၁၈၉ သန်းထိ ရှိပါတယ်။

အောက်တိုဘာလအတွင်း မြန်မာနိုင်ငံက အဓိကဆန်တင်ပို့ခဲ့တဲ့ နိုင်ငံတွေက အင်ဒိုနီးရှား၊ ဘယ်လ်ဂျီယံ၊ တရုတ်နဲ့  ဖိလစ်ပိုင်နိုင်ငံတို့ ဖြစ်ပါတယ်။

မြန်မာနိုင်ငံအနေနဲ့ တနှစ်ကို ဆန်နဲ့ ဆန်ကွဲတန်ချိန် ၂ သန်းအထက် ပြည်ပကို ပုံမှန်တင်ပို့နေတာ ဖြစ်ပြီး ပြီးခဲ့တဲ့ ၂၀၂၃-၂၀၂၄ ဘဏ္ဍာနှစ်မှာ ပြည်ပကို ဆန်နဲ့ ဆန်ကွဲ တန်ချိန် ၁ ဒသမ၇ သန်း နီးပါးသာ တင်ပို့နိုင်ခဲ့ပါတယ်။

အခု ၂၀၂၄-၂၀၂၅ ဘဏ္ဍာနှစ်ရဲ့ ပထမ  ၇ လအတွင်း ဆန်တင်ပို့မှုကတော့ ၁ ဒသမ ၃၆ သန်းကျော်ရှိပါတယ်။ အရင်နှစ်ကာလတူထက် တန်ချိန် ၈ သိန်းဝန်းကျင် ပိုတင်ပို့နိုင်ပြီး တန်ဖိုးအနေနဲ့လည်း အမေရိကန်ဒေါ်လာ ၃၆၇ သန်းထိ မြင့်တက်လာပါတယ်။