မွန်ပြည်နယ်၊ သထုံမြို့နယ် မြေနီကုန်းကျေးရွာ ရန်ကုန်-မော်လမြိုင်ကားလမ်းမဘေးရှိ Puma Power စက်သုံးဆီဆိုင်မှာ နိုဝင်ဘာ ၈ ရက် နေ့လယ်က ဆိုင်မန်နေဂျာအမျိုးသမီးကို လက်နက်ကိုင် ၄ ယောက်က ဖမ်းဆီးခေါ်ဆောင်သွားတယ်လို့ ဒေသခံတွေဆီက သိရပါတယ်။
သထုံမြို့နယ် မြေနီကုန်းကျေးရွာရှိ Puma Power စက်သုံးဆီဆိုင်ကို နိုဝင်ဘာ ၈ ရက် နေ့လယ် ၁၂ ခွဲလောက်မှာ အမည်မသိ လက်နက်ကိုင် ၄ ယောက်က Probox မော်တော်ယာဥ် အမဲရောင်တစီးနဲ့ ရောက်ရှိလာပြီး အသက် ၃၈ နှစ်အရွယ် မန်နေဂျာ ဒေါ်သိမ့်သူဇာကို ဖမ်းဆီးခေါ်ဆောင်သွားတာလို့ ဆီဆိုင်တာဝန်ရှိသူတယောက်က ပြောပါတယ်။
“ကားပေါ်မှာ ၄ ယောက်ပါလာတာ။ ၂ ယောက်က ဆိုင်ထဲဝင်လာပြီး ဆိုင်က ဝန်ထမ်း ကောင်လေး ၂ ယောက်ကို ဆိုင်အနောက်ခေါ်သွားပြီး လက်ကိုကြိုးချည်တယ်၊ ပါးစပ်ကိုလည်း တိပ်အကြည်ရောင်နဲ့ ပတ်ပြီးချုပ်ထားခဲ့တာ။ ၂ ယောက်လုံးကိုလည်း မိုင်းပေါက်ကွဲသံကြားမှ ထွက်လာဆိုပြီး ထားခဲ့တာ”
လက်နက်ကိုင်တယောက်က မန်နေဂျာရုံးခန်းထဲကိုဝင်ရောက်ပြီး ရုံးခန်းအတွင်းက လက်ပတော့ကွန်ပြူတာတလုံးနဲ့ ငွေကျပ် ၆ သိန်းကိုယူဆောင်ကာ မန်နေဂျာဖြစ်သူ ဒေါ်သိမ့်သူဇာကို ဖမ်းဆီးသွားပြီးနောက် သုဝဏ္ဏဝတီမြို့ဘက်ကို မောင်းနှင်ထွက်ပြေးသွားတယ်လို့ ဆီဆိုင် CCTV မှတ်တမ်းတွေအရ သိရပါတယ်။
လက်နက်ကိုင်ဆောင်ထားသူတွေ ထွက်ခွာသွားပြီး ၁၅ မိနစ်လောက်အကြာမှာ မန်နေဂျာရုံးခန်းအတွင်း အသံမိုင်းတလုံးပေါက်ကွဲခဲ့သေးကြောင်း နယ်ခံတွေဆီက သိရပါတယ်။
ပြီးခဲ့တဲ့ နိုဝင်ဘာ ၆ ရက် မွန်းလွဲပိုင်းကလည်း မုဒုံမြို့နယ်၊ ကျိုက်ရွဲကျေးရွာရှိ သစ်ပါးလွှာစက်ရုံက တရုတ်နိုင်ငံသားပညာရှင်တဦးအပါအဝင် စက်ရုံမှူးနဲ့ မန်နေဂျာတို့ကို လက်နက်ကိုင်အဖွဲ့တခုက ဖမ်းဆီးခေါ်ဆောင်သွားတယ်လို့ သိရပါတယ်။
