ရန်ကုန်၊ မှော်ဘီမြို့နယ်က စစ်ကောင်စီရဲ့ လေတပ်စခန်းကို တာဝေးပစ်ဒုံးနဲ့ ပစ်ခတ်ခဲ့တယ်လို့ တော်လှန်ရေးအဖွဲ့တခုက ထုတ်ပြန်ပြီး အဲဒီဒုံးတွေဟာ မင်္ဂလာဒုံနဲ့ ထောက်ကြန့်ဘက်ကို ကျရောက်ပေါက်ကွဲခဲ့တယ်လို့ ဒေသခံတွေက ပြောပါတယ်။
မြို့ပြတော်လှန်ရေးတပ်ဖွဲ့တဖွဲ့ဖြစ်တဲ့ Urban Special Operations USO အဖွဲ့က နိုဝင်ဘာ ၉ ရက် မနက် ၁၂ နာရီ ၅၅ မိနစ်မှာ မှော်ဘီလေတပ်ကို တာဝေးပစ်မစ်ဇိုင်းဒုံး ၄ လုံးနဲ့ ပစ်ခတ်ခဲ့ပြီး စစ်ကောင်စီတပ်ရဲ့ လေယာဉ်ဂိုထောင်နဲ့ အရာရှိအိမ်တွေပျက်စီးနိုင်တာကြောင့် ဒေသခံတွေ သတိရှိကြဖို့ သူတို့ရဲ့ သတင်းပြန်ကြားရေးဌာန တယ်လီဂရမ်ချန်နယ်ကနေ ထုတ်ပြန်ခဲ့ပါတယ်။
ထောက်ကြန့်မြို့ခံတယောက်က “လမ်းဆုံနဲ့တော့ဝေးမယ်။ ထောက်ကြန့်အစပ် မှော်ဘီ တိုးဂိတ်အကျော်က ကွင်းထဲလောက်မှာ။ တပ်ထဲတော့ မဟုတ်ဘူး။ ည ၁ နာရီထိုးကာနီး ၂ ခါ။ ၂ ခါစလုံး အသံတော်တော်ကျယ်တယ်။ မင်္ဂလာဒုံဘက်ကဆို ရန်ကုန်- ပြည်လမ်းဘက်ခြမ်း” လို့ ပြောပါတယ်။
ဒီနေ့မနက်မှာ မှော်ဘီလေတပ်ထဲ ပုံမှန်ကားအဝင်အထွက်၊ လူအဝင်အထွက်ရှိနေသလို ဝန်းအနီးက ကုန်းတန်းကြီးရွာ၊ ရှမ်းကုန်းရွာတို့က ဈေးနဲ့ ဆိုင်တွေပုံမှန်ဖွင့်ထားတယ်လို့ ဒေသခံတွေဆီက သိရပါတယ်။
မှော်ဘီမြို့ခံတယောက်က “အဲအချိနိ ကျနော်တို့ မအိပ်သေးဘူး။ ည ၁၂ နာရီ ၅၅ မှာ တကြိမ် အသံကြားရတာ။ နောက်တလုံးက ၁၂ နာရီ ၅၆ မိနစ်မှာ။ အသံ ၂ သံပဲ ကြားရတာ။ ညက ကြားရတာ အသံတော့ တော်တော်ကျယ်တယ်။ ထောက်ကြန့်ဘက်နားမှာပဲ ကျကွဲတာ။ ဒီလေတပ်ဝန်းထဲတော့ ပေါက်ကွဲတာမျိုးမရှိဘူး။ ပေါက်ကွဲပြီဆို ဒီလို နေလို့လည်း မရဘူး” လို့ ပြောပါတယ်။
ဒီဖြစ်စဉ်နဲ့ပတ်သက်လို့ မြို့ပြစစ်ဆင်ရေးအထူးတပ်ဖွဲ့ Urban Special Operations USO ကို ဆက်သွယ်မေးမြန်းဖို့ ကြိုးစားပေမဲ့ အဆက်အသွယ်မရသေးပါဘူး။
နိုဝင်ဘာ ၈ ရက် ညပိုင်းကလည်း မြောက်ဥကလာပမြို့နယ်၊ အဝိုင်းကြီး(EPC) လျှပ်စစ်ရုံး၊ ကင်းတဲအနီးမှာ လက်ပစ်ဗုံး ၂ လုံးပေါက်ကွဲခဲ့ပြီး ဒီတိုက်ခိုက်မှုကို မြောက်ဥက္ကလာပမြို့နယ်(ပကဖ)နဲ့ Yangon UG People Army တို့က ပြုလုပ်ခဲ့တာ ဖြစ်ပါတယ်။
