ရန်ကုန်၊ မြောက်ဥက္ကလာပမြို့နယ်၊ သုဓမ္မာလမ်းမနဲ့ ခေမာသီလမ်းထောင့်ရှိ ကန်သာယာပန်းခြံမှာ အပန်းဖြေနေတဲ့ လူငယ် ၉ ယောက်ကို စစ်ကောင်စီရဲနဲ့ ပန်းခြံလုံခြုံရေးအဖွဲ့က အမှုဆင်ဖမ်းဆီးပြီး တရားရုံးတင်ကာ ငွေညှစ်ပြန်လွှတ်ပေးလိုက်တယ်လို့ မြို့ခံတွေက ပြောပါတယ်။
နိုဝင်ဘာ ၅ ရက် ညနေ ၆ နာရီခွဲကျော်က ပန်းခြံအတွင်းက ရေကန်ဘေးမှာ ထိုင်နေတဲ့ အသက် ၁၈ နှစ်မှ ၂၄ နှစ်အတွင်း လူငယ်တွေ ဖမ်းဆီးခံလိုက်ရတာပါ။
ပန်းခြံအနီးအနားနေထိုင်သူတဦးက “ရဲကား ၂ စီး၊ တစီးက ဥဇ္ဇနာထိပ်မှာ၊ တစီးက ပန်းခြံအဝမှာ ထားပြီး ကလေးတွေကို ဝင်ဖမ်းတာ။ ပန်းခြံက ၆ နာရီဆို ပိတ်တာ။ ဝီစီမှုတ်ပြီး လူလိုက်ထုတ်တာ မသွားလို့ လုံခြုံရေးက ရဲခေါ်လိုက်တာ”လို့ ပြောပါတယ်။
မိသားစုဝင်တွေက သိသိချင်း မြောက်ဥက္ကလာပ ရဲစခန်းကို လိုက်သွားခဲ့ပေမဲ့ နောက်နေ့မနက်မှာ တရားရုံးတင်မှာဖြစ်တာကြောင့် ဆောက်လက်စ တရားရုံး ၃ ထပ် အဆောက်အဦရဲ့ အနောက်ဘက်ဝန်းထဲမှာ ငွေဒဏ်လာဆောင်ပေးဖို့ မြို့နယ်ရဲတပ်ဖွဲ့ဝင်က ပြောခဲ့တယ်လို့ သိရပါတယ်။
မတရားဖမ်းဆီးခံလိုက်ရတဲ့ လူငယ်တွေဟာ (က) ရပ်ကွက်နဲ့ (ဋ) ရပ်ကွက်တို့က အလုပ်ပြန် လူငယ်တွေဖြစ်ပြီး နိုဝင်ဘာ ၆ ရက်၊ မနက် ၁၁ နာရီလောက်မှာ ရဲစခန်းကနေ လက်ထိပ်အတွဲလိုက်ခတ်ပြီး တရားရုံးဘက် လမ်းလျှောက်ခေါ်လာတာဖြစ်ပါတယ်။
မိသားစုနဲ့နီးစပ်သူတယောက်က “လက်ထိပ်တွေ အတွဲလိုက်ကြီးခတ်ပြီး ခေါ်လာတာ။ ကလေးတွေက ဘာရာဇဝတ်သားမှလည်း မဟုတ်ဘူး။ အားလုံး ၉ ယောက်။ တယောက် ၂ သိန်း။ ရဲက တသိန်း၊ တရားသူကြီးက တသိန်း။ သူတို့အလုပ်ကအပြန် ညနေပိုင်းလောက် ပန်းခြံထဲ ဝင်ထိုင်မိတာ။ ဘာလက်နက်၊ မူးယစ်ဆေး၊ ဘာမှ မဟုတ်တာ လုပ်ထားတာ မရှိဘူး။ ဘာအမှုနဲ့ဆွဲလည်း ဘာမှ မပြောဘူး”လို့ ပြောပါတယ်။
အမှုစစ်ရဲက ကျပ်ငွေ ၁ သိန်း၊ တရားသူကြီး ကျပ်ငွေ ၁ သိန်း စုစုပေါင်း လူငယ်တဦးကို ကျပ်ငွေ ၂ သိန်းပေးပြီး ခံဝန် တနှစ်ထိုးခိုင်းကာ ပြန်လွှတ်ခဲ့တာဖြစ်ပါတယ်။
မြောက်ဥက္ကလာပရဲတပ်ဖွဲ့ဟာ လူငယ်တွေကို အမှုဆင်ဖမ်းဆီးနေပေမဲ့ မြို့နယ်အတွင်း ရပ်ကွက် ၁၉ ခုက ပေါ်ပေါ်တင်တင်လုပ်လာတဲ့ လောင်းကစားလုပ်ငန်းတွေနဲ့ တုတ်ဓားအမည်ရှိ ငွေတိုးပေးဂိုဏ်းတွေကိုတော့ လိုင်းကြေးယူထားတာကြောင့် ဖမ်းဆီးအရေးယူတာမျိုး မတွေ့ရပါဘူး။
