ထိုင်းနိုင်ငံ၊ ကန်ကျနပူရီခရိုင်နဲ့ မယ်ဟောင်ဆောင်ခရိုင်တွေထဲမှာ တရားမဝင် ဝင်ရောက်လာတဲ့ မြန်မာနိုင်ငံသား ၂၆ ယောက် ဖမ်းဆီးခံရတယ်လို့ ထိုင်းသတင်းတွေအရ သိရပါတယ်။
ကန်ကျနပူရီခရိုင်၊ ဆန်ခလပူရီမြို့နယ် ရဲတပ်ဖွဲ့၊ စစ်တပ်၊ အုပ်ချုပ်ရေးနဲ့ နယ်ခြားစောင့်တပ်က တာဝန်ရှိသူတွေပါတဲ့ ပူးပေါင်းအဖွဲ့ဟာ ဆန်ခလပူရီမြို့နယ်ထဲမှာ တရားမဝင် ဝင်ရောက်လာတဲ့ မြန်မာနိုင်ငံသား ၂၃ ယောက်ကို ဖမ်းဆီးရမိတယ်လို့ ကန်ကျနပူရီဒေသတွင်း သတင်းက နိုဝင်ဘာ ၅ ရက်မှာ ဖော်ပြပါတယ်။
ဒါ့အပြင် သူတို့ကို ခေါ်ဆောင်လာတဲ့ လမ်းပြတယောက်ကိုပါ ဖမ်းဆီးထားပြီး နိုင်ငံတွင်းကို တရားမဝင် ဝင်ရောက်သူများအား အပြစ်မှကင်းလွတ်ရန် အကာအကွယ်ပေးမှုနဲ့ အရေးယူသွားမယ်လို့ ဆိုပါတယ်။
မယ်ဟောင်ဆောင်ခရိုင်၊ မဲ့စရီးယန်းမြို့နယ်၊ မဲ့ခုန်းအုပ်စု နောင်တဟိတ်ဒဲန်ရွာ အနီးမှာလည်း အောက်တိုဘာ ၄ ရက် ညနေ ၅ နာရီခွဲလောက်က တရားမဝင် မြန်မာနိုင်ငံသား ၃ ယောက် အဖမ်းခံရတယ်လို့ ကျိုးချိုထိုင်းသတင်းမှာ ဖော်ပြပါတယ်။
မြန်မာနိုင်ငံမှာ စစ်အာဏာသိမ်းပြီးတဲ့နောက် နိုင်ငံရေး၊ စီးပွားရေး၊ လုံခြုံရေး အခက်အခဲတွေကြောင့် ပြည်သူအမြောက်အမြား ပြည်ပထွက်ပြီး လုပ်ကိုင်စားသောက်နေတာမှာ ခုလို ဖမ်းဆီးခံရတာတွေလည်း နေ့စဉ်နဲ့အမျှ ကြုံတွေ့နေရတာပါ။
Source: ကန်ကျနပူရီသတင်း / ဂျိုးချိုထိုင်းသတင်း
