ဧရာဝတီတိုင်း ပုသိမ်မြို့အခြေစိုက် အနောက်တောင်တိုင်းစစ်ဌာနချုပ်က စစ်ကောင်စီတပ်အရာရှိ ၆ ယောက်ရဲ့ လာဘ်စားမှုမှာ ပါဝင်ပတ်သက်တယ်လို့ဆိုပြီး စစ်ကောင်စီက တပ်ရင်းမှူးနဲ့ ဗိုလ်မှူးတွေအပါအဝင် ၅ ယောက်ကို ဖမ်းဆီးစစ်ဆေးနေတယ်လို့  စစ်တပ်အသိုက်အဝန်းနဲ့ နီးစပ်သူတွေဆီကနေသိရပါတယ်။ 

ဧရာဝတီတိုင်း၊ ရေကြည်မြို့နယ်၊ ငါးသိုင်း ချောင်းမြို့၊ ပုသိမ်-မုံရွာလမ်းမကြီးနဲ့  ဂွ-ငါးသိုင်းချောင်းလမ်းဆုံမှာရှိ ရေနံ့သာစစ်ဆေးရေးဂိတ်မှာ စက်သုံးဆီ၊ စားနပ်ရိက္ခာ၊ ဆေးဝါး အပါအဝင် ကုန်ပစ္စည်းတွေကို လာဘ်ငွေသိန်း ထောင်ပေါင်းများစွာရယူပြီး ရခိုင်ဘက် သယ်ယူခွင့်ပြုခဲ့တာကြောင့်ဆိုကာ ဖမ်းဆီးစစ်ဆေး စွဲချက်တင်ခံထားရတဲ့ ဗိုလ်မှူးကြီး မျိုးညွန့်ဦး၊ ဗိုလ်မှူးကြီးအောင်ဆန်းလွင်၊ ဒုတိယ ဗိုလ်မှူးကြီးကျော်စွာထွန်း၊ ဗိုလ်မှူး စိုးရန်နိုင်ပါအဝင် ၆ ယောက်ကို စစ်ခုံရုံးက အောက်တိုဘာ ၇ ရက်က စွဲချက်တင်ခဲ့ပါတယ်။ 

အဆိုပါလာဘ်စားတဲ့အမှုမှာ ပါဝင်နေတယ်လို့ ဆိုပြီး အောက် တိုဘာ ၃၀ ရက်က တပ်ရင်းမှူးနဲ့ ဗိုလ်မှူး အပါအဝင် ၅ ယောက်ကို ထပ်မံဖမ်းဆီးစစ်ဆေးနေတာလို့ စစ်ကောင်စီတပ်နဲ့ နီးစပ်သူ တယောက်က ပြောပါတယ်။ 

“ပထမ ၆ ယောက်ကို စစ်ဆေးချက်များအရ လာဘ်ပေးလာဘ်ယူမှုထင်ရှားလို့ အောက်တိုဘာလ ၇ ရက်ကစစ်ခုံရုံးက စွဲချက်တင်ထားတယ်။ အခုထပ်ပြီးလာဘ်စားမှုမှာ ပါဝင်တယ်လို့ဆိုပြီးတော့ တပ်ရင်းမှူးတွေ၊ ဗိုလ်မှူးတွေကို ခေါ်ယူစစ်ဆေးနေတယ်လို့ သိရတယ်။ စစ်ဘက်ရေးရာလုံခြုံ ရေးတပ်ဖွဲ့ (စရဖ) ကပဲ စစ်ဆေးနေတာပါ။ ဘယ်တပ်က ရင်းမှူးတွေလည်းတော့ မသိသေးဘူး။”

စစ်ဘက်ရေးရာလုံခြုံရေးတပ်ဖွဲ့ (စရဖ)ကဗိုလ်မှူးကြီး မျိုးညွန့်ဦးအပါအဝင် ၆ ယောက်ကို စစ်ဆေးစွဲချက်တင်ခဲ့ပြီး နောက်အခြေအနေအသေးစိတ်ကို စစ်ကောင်စီဥက္ကဋ္ဌ မင်းအောင်လှိုင်ထံ တင်ပြခဲ့လို့ မင်းအောင်လှိုင်က လာဘ်စားမှုမှာ ဆက်စပ်ပါဝင်သူတွေကို စစ်ဆေးဖို့ အမိန့် ချခဲ့တာလို့ ဆိုပါတယ်။ 

ပုသိမ်မြို့နေ စစ်ကောင်စီတပ်နဲ့နီးစပ်တဲ့ တပ်မိသားစုဝင်တယောက်က “ထပ်စစ်ဆေးနေတာက ၅ ယောက်ပါ။ ၅ ယောက်လုံးကို ပုသိမ်မြို့တိုင်းစစ်ရုံးမှ စစ်ဆေးနေတာလို့ သိရတယ်။ သူတို့ကိုလည်း အကျင့်ပျက်ခြစားမှု နဲ့ ဖမ်းဆီးခဲ့တာ ပြောတယ်။ သူတို့ကို လက်ကိုင်ဖုန်းတွေပါ သိမ်းထားတာ” လို့ ပြောပါတယ်။ 

စစ်ကောင်စီက အကျင့်ပျက်ခြစားတယ်လို့ဆိုပြီး ပထမ စွဲချက်တင်ခံထားရတဲ့ စစ်ကောင်စီတပ်ရဲ့ အရာရှိကြီး ၆ ယောက်ရဲ့ပိုင်ဆိုင်မှုတွေကိုပါ စစ်ဆေးခဲ့တာကြောင့် လာဘ်စားမှုနဲ့ ရရှိထားတဲ့ အိမ်ခြံမြေ၊ KTV နဲ့ ဘဏ်စာအုပ် စတဲ့ပိုင်ဆိုင်မှုတွေပါ သိမ်းဆည်းထားတယ်လို့ သိရပါတယ်။ 

ဒါ့အပြင် ဖမ်းဆီးခံထားရတဲ့ စစ်ကောင်စီတပ် အရာရှိကြီးတွေရဲ့ ပိုင်ဆိုင်မှုတွေကို စစ်ကောင်စီက ချိပ်ပိတ်သိမ်းဆည်းထားတဲ့အပြင် သက်ဆိုင်ရာမိသားစုတွေကိုလည်း တပ်တွင်းနေရာတွေကနေ ဖယ်ရှားထားတယ်လို့ သိရပါတယ်။