မန်ချက်စတာယူနိုက်အသင်းဟာ မန်နေဂျာ အဲရစ်တန်ဟတ်ဂ်ကို ထုတ်ပယ်လိုက်ကြောင်း  အောက်တိုဘာ ၂၈ ရက်မှာ ကြေညာလိုက်ပါတယ်။

မန်ယူအသင်းဟာ ဒီနှစ်ရာသီ ပရီးမီးယားလိဂ်ပြိုင်ပွဲ ၉ ပွဲကစားအပြီးမှာ ရမှတ် ၁၁ မှတ်နဲ့ အဆင့် ၁၄ နေရာအထိ ကျဆင်းသွားပြီးနောက် အသင်းရဲ့ နည်းပြ ထုတ်ပယ်ခံခဲ့ရတာပါ။

အသင်းနည်းပြနေရာကို အစားမထိုးနိုင်သေးခင်အချိန်မှာ လက်ရှိ လက်ထောက်နည်းပြဖြစ်တဲ့ နစ္စတယ်ရွိုင်းဟာ အသင်းရဲ့ ယာယီနည်းပြအဖြစ် တာဝန်ယူသွားမယ်လို့ ကလပ်အသင်းရဲ့ ထုတ်ပြန်ချက်မှာ ဖော်ပြထားပါတယ်။ 

အသက် ၅၄ နှစ်အရွယ် နယ်သာလန်သား တန်ဟတ်ဂ်ဟာ ပြီးခဲ့တဲ့နှစ်က ပရီးမီးယားလိဂ်မှာ မန်ယူအသင်းရဲ့ သမိုင်းအဆိုးဝါးဆုံး ရလဒ်ဖြစ်တဲ့ အဆင့် ၈ နေရာနဲ့သာ အဆုံးသတ်ခဲ့တာကြောင့် ထုတ်ပယ်ခံရနိုင်တယ်လို့ ထင်ကြေးပေးခံရမှုတွေလည်း ရှိခဲ့တာပါ။ 

ဒါပေမဲ့ အံ့အားသင့်ဖွယ် ရလဒ်အဖြစ် FA ဖလားဗိုလ်လုပွဲမှာ မန်စီးတီးကို အနိုင်ရခဲ့သလို အသင်းရဲ့ ဒဏ်ရာရလူစာရင်းတွေကို အပြစ်တင်ခဲ့တဲ့ တန်ဟတ်ဂ်အတွက် နောက်ထပ်အခွင့်အရေး ရရှိခဲ့တာပါ။ 

၂၀၂၆ ခုနှစ်အထိ စာချုပ်သစ် သက်တမ်းတိုး ချုပ်ဆိုခဲ့ပြီး ပရီးမီးယားလိဂ် အကြိမ် ၂၀ မြောက်ဆွတ်ခူးနိုင်ခဲ့တဲ့ မန်ယူအသင်းကို ပြန်လည်တည်ထောက်ရေးအတွက် အခွင့်အရေး ထပ်မံရရှိခဲ့တာပါ။ ဒီနှစ်အစောပိုင်းကာလတွေမှာတော့ တန်ဟတ်ဂ်ဟာ မျှော်မှန်းထားတဲ့ အောင်မြင်မှုမျိုးရမှာ မဟုတ်ဘူးလို့ ထင်ကြေးပေးခံရမှုတွေလည်း ရှိခဲ့ပါတယ်။

မန်ယူအသင်းဟာ ပရီးမီးယားလိဂ် ၉ ပွဲမှာ တပွဲသာ အနိုင်ရထားပြီး ပြီးခဲ့သီတင်းပတ်ကုန်က ဝက်စ်ဟမ်းအသင်းကို (၂-၁)  ဂိုးနဲ့ ရှုံးခဲ့ပြီးနောက် တန်ဟတ်ဂ် နည်းပြရာထူးကနေ ဖယ်ရှားလိုက်တာပါ။

ဝက်စ်ဟမ်းနဲ့ပွဲ မတိုင်ခင်မှာကတည်းက ရလဒ်ဆိုးဝါးနေတဲ့ မန်ချက်စတာယူနိုက်တက်အသင်းဟာ နည်းပြတန်ဟတ်ဂ် နေရာမှာ အစားထိုး တခြားနည်းပြ အများအပြားနဲ့ လျှို့ဝှက် ဆွေးနွေးမှုတွေ လုပ်ဆောင်နေတယ်လို့ သတင်းတွေ ထွက်ခဲ့ပါတယ်။

မန်ယူအသင်းဟာ ဘာစီလိုနာ နည်းပြဇာဗီကို စပိန်နိုင်ငံအထိ သွားရောက် တွေ့ဆုံဆွေးနွေးခဲ့သလို ဒေါ့မွန်နည်းပြဟောင်းတာဇစ်၊ စပို့တင်းလစ္စဘွန်းနည်းပြ အာမိုရင်၊ ဘရန့်ဖို့ဒ်နည်းပြ သောမက်စ်ဖရန့်ခ် တို့အပါအဝင် တခြားနည်းပြတွေကိုလည်း ကြိုတင်ချိတ်ဆက်ထားတယ်လို့ ဒေးလီးမေးလ်သတင်းမှာ ဖော်ပြပါတယ်။

မန်ယူအသင်းဟာ နည်းပြတန်ဟတ်ဂ်နဲ့ သက်တမ်းမတိုးခင်ပြီးခဲ့တဲ့ နွေရာသီတုန်းကလည်း သောမက်စ်တူဟယ်၊ ကီရန်မက်ကမ်နာ၊ မာကိုဆေးလ်ဗား အစရှိတဲ့နည်းပြတွေနဲ့ စကားပြောဆို ခဲ့ပါတယ်။

မန်ချက်စတာယူနိုက်တက်ရဲ့ ဂန္ထဝင်နည်းပြ ဆာအဲလက်စ်ဖာဂူဆန် အနားယူပြီးနောက်ပိုင်း မန်ယူမှာ ဘယ်နည်းပြမှ ၃ ရာသီပြည့်အောင် တာဝန်မယူနိုင်ကြသေးပါဘူး။