ဧရာဝတီတိုင်း၊ ကြံခင်းမြို့နယ်မှာ ဖမ်းဆီးခံထားရတဲ့ ရခိုင်ကစစ်ဘေးရှောင်အမျိုးသမီး အပါအဝင် ၄ ယောက်ကို စစ်ကောင်စီက အကြမ်းဖက်ဥပဒေတွေနဲ့ အမှုဖွင့်လိုက်တယ်လို့ ဖမ်းဆီးခံရသူတွေနဲ့ နီးစပ်သူတွေဆီက သိရပါတယ်။
ကြံခင်မြို့နယ်ကို စစ်ဘေးရှောင်ဖို့ရောက်နေတဲ့ ရခိုင်ပြည်နယ်၊ စစ်တွေမြို့နဲ့ အမ်းမြို့က အရပ်သား အမျိုးသား ၃ ယောက်နဲ့ အမျိုးသမီး တယောက်ကို စစ်ကောင်စီတပ်က အောက်တိုဘာ ၁၁ ရက်မှာ ဖမ်းဆီးခဲ့တာဖြစ်ပြီး အောက်တိုဘာ ၂၅ ရက် မနေ့က အမှုဖွင့်လိုက်တာလို့ သိရပါတယ်။
ကြံခင်းမြို့နယ်ရဲတပ်ဖွဲ့နဲ့ နီးစပ်တဲ့သူတယောက်က “ဖမ်းဆီးခံရတဲ့ အမျိုးသမီးတယောက်နဲ့ အမျိုးသား ၄ ယောက်လုံးကို ရဲစခန်းမှာထားပြီး စစ်ကြောရေးလုပ်နေတယ်။ သူတို့ကို အကြမ်းဖက်မှုတိုက်ဖျက်ရေး ဥပဒေပုဒ်မ ၅၂(က)၊ ရာဇသတ်ကြီး ပုဒ်မ ၁၂၄ (က)နဲ့ ပုဒ်မ ၅၀၅(က) စတဲ့ ပုဒ်မတွေနဲ့ မနေ့က အမှုဖွင့်ထားတယ်လို့ သိရတယ်” လို့ ပြောပါတယ်။
အဖမ်းခံရတဲ့သူတွေနဲ့ နီးစပ်သူတယောက်ကလည်း အဲဒီစစ်ရှောင်တွေဟာ သတင်းပေးတွေကြောင့် PDF တွေလို့ စွပ်စွဲအဖမ်းခံခဲ့ရတာလို့ ပြောပါတယ်။
စစ်ကောင်စီတပ်က ဖမ်းဆီးထားသူ ၄ ယောက်ဟာ စစ်ကောင်စီတပ်နဲ့ ရက္ခိုင့်တပ်တော် AA တို့ ရက်ဆက် ဖြစ်ပွားနေတဲ့တိုက်ပွဲတွေကြောင့် တိမ်းရှောင်လာတဲ့သူတွေဖြစ်ပြီး အသက် ၁၉ နှစ် ကျော် လူငယ်အမျိုးသား ၂ ယောက်၊ အသက် ၃၀ ကျော်အရွယ် အမျိုးသား ၁ ယောက်နဲ့ အသက် ၂၇ ဝန်းကျင် အမျိုးသမီး ၁ ယောက်တို့ ဖြစ်ပါတယ်။
သူတို့တွေဟာ ရခိုင်ပြည်နယ်မှာ လယ်ယာလုပ်ငန်း၊ ဆိုင်ကယ်ကယ်ရီဆွဲတဲ့လုပ်ငန်း၊ ဈေးရောင်းတဲ့လုပ်ငန်း စတာတွေကို လုပ်ကိုင်နေသူတွေဖြစ်တယ်လို့လည်း နီးစပ်သူတွေက ပြောပါတယ်။
ဧရာဝတီတိုင်းနဲ့ ရခိုင်ပြည်နယ်အစပ် ရေနံ့သာစစ်ဆေးရေးဂိတ်မှာလည်း ပြီးခဲ့တဲ့ အောက်တိုဘာ ၆ ရက်နေ့က ရခိုင်စစ်ဘေးရှောင် ၅ ယောက်ကို စစ်ကောင်စီက ဖမ်းဆီးခဲ့ပြီး အဲဒီထဲက အမျိုးသား ၁ ယောက်ကို အောက်တိုဘာ ၁၄ ရက်မှာ ရေကြည်တရားရုံးက ထောင်ဒဏ် ၆ နှစ်ချမှတ်ခဲ့ပါတယ်။
