မြန်မာနိုင်ငံသားတဦးအပါအဝင် လူ ၂ ဦးကို သေနတ်တွေ၊ လက်ပစ်ဗုံးတွေနဲ့အတူ ဘင်္ဂလားဒေ့ရှ် နယ်ခြားစောင့်တပ် (BGB) က ဖမ်းဆီးခဲ့တဲ့အကြောင်း BSS သတင်းမှာ ဖော်ပြပါတယ်။
ဘင်္ဂလားဒေ့ရှ် နယ်ခြားစောင့်တပ် (BGB) အမှတ် ၂ တက္ကနတ်ဖ်တပ်ရင်း ကွပ်ကဲရေးမှူး ဒု ဗိုလ်မှူးကြီး မိုဟီရူဒင် အာမက်ဒ်က ဂျာလီရာပါရာဒေသက အသက် ၅၅ နှစ်အရွယ် ရှဖီးလ် အလမ်ကို ရိုင်ဖယ်သေနတ် ကျည်တောင့် ၂၄၀၊ ရော့ကက်ဗုံး ၁ လုံး၊ လက်ပစ်ဗုံး ၂ လုံးနဲ့ သံလိုက်အိမ်မြှောင် ၁ လုံးတို့ကို သီးခြားအိတ် ၂ လုံးစီနဲ့ အောက်တိုဘာ ၂၀ ရက် မနက်အစောပိုင်းမှာ ဖမ်းမိခဲ့တယ်လို့ ပြောပါတယ်။
သူ့ကို စစ်ဆေးမေးမြန်းချိန်မှာတော့ အဆိုပါ လက်နက်ခဲယမ်းတွေကို လွန်ခဲ့တဲ့ ရက်အနည်းငယ်လောက်တုန်းကမှ မြန်မာနိုင်ငံဘက်ကနေ ခိုးသွင်းလာခဲ့ကြောင်း ဝန်ခံခဲ့ပြီးနောက် တက္ကနတ်ဖ်ရဲစခန်းကို လွှဲပြောင်းထားခဲ့ပြီဖြစ်တယ်လို့ သတင်းမှာ ဖော်ပြပါတယ်။
ဒါ့အပြင် တရက်တည်းမှာပဲ ဂျင်ဂလာဘာရီနယ်စပ်ဒေသမှာ အသက် ၂၀ အရွယ် မြန်မာ နိုင်ငံသားတဦးကို BGB က ဖမ်းဆီးနိုင်ခဲ့တယ်လို့ သိရပါတယ်။
သူ့ရဲ့ နာမည်ကိုတော့ အနီးဆူး ရာမန်လို့ ဖော်ပြပြီး မြန်မာနိုင်ငံ၊ မောင်တောဒေသက ဖြစ်ကာ ဘင်္ဂလားဒေ့ရှ်နိုင်ငံထဲကို လွန်ခဲ့တဲ့ ၇ နှစ်ကတည်းက ဝင်ရောက်လာခဲ့ပြီး ကော့ဇ်ဘဇား ဒုက္ခသည်စခန်းထဲမှာ နေထိုင်ခဲ့တယ်လို့ ဆိုပါတယ်။
အဲဒီနောက်တော့ သူဟာ အလုပ်ကောင်းတခုရဖို့အတွက် ဒုက္ခသည်စခန်းကနေ ထွက်ပြေးခဲ့တဲ့အကြောင်း စစ်ဆေးမေးမြန်းချိန်မှာ ဖြေကြားခဲ့တယ်လို့ ဆိုပါတယ်။
လက်ရှိမှာတော့ သူ့ကို ဂျန်တာပူရဲစခန်းကို ပို့ဆောင်ထားခဲ့တယ်လို့ BGB ထုတ်ပြန်ချက်မှာ ဖော်ပြထားပြီး လက်နက်ခဲယမ်းတွေနဲ့ ဆက်စပ်ပတ်သက်တဲ့အကြောင်း တစုံတရာကိုတော့ သတင်းမှာ ဖော်ပြထားခြင်း မရှိပါဘူး။
