မန္တလေးတိုင်း၊ မဟာအောင်မြေမြို့နယ်၊ စိန်ပန်းရပ်ကွက်၊ ဂေါဝိန်ဆိပ်ကမ်းမှာ အောက်တိုဘာ ၁၄ ရက် နေ့လယ် ၁ နာရီခွဲဝန်းကျင်က ကုန်တင်သင်္ဘောတစီး မီးလောင်ခဲ့တယ်လို့ သိရပါတယ်။

မြို့ခံတယောက်က “ကုန်တင်သင်္ဘောကြီး မီးလောင်တာဗျ။ သင်္ဘောပေါ်မှာ ဂဟေဆော်တာကနေ ဆီပေပါတွေ ကွဲကုန်ပြီး လောင်တာလို့တော့ ပြောနေကြတယ်။ ဆန်အိတ်တွေ၊ ဘိလပ်မြေအိတ်တွေ၊ ဆီပေပါတွေ တင်ထားတယ်လို့တော့ သိရတယ်။ မီးလောင်တဲ့အချိန်က ကြာတယ်ဗျ” လို့ ပြောပါတယ်။

အဆိုပါ သင်္ဘောမီးလောင်ကျွမ်းချိန်ဟာ ၁ နာရီခွဲနီးပါး ကြာမြင့်ပြီး ညနေ ၃ နာရီဝန်းကျင်မှာ မီးငြှိမ်းသတ်နိုင်ခဲ့တယ်လို့ မဟာအောင်မြေမြို့နယ် မီးသတ်ဦးစီးဌာနကနေ သိရပါတယ်။

မဟာအောင်မြေမြို့နယ် မီးသတ်ဦးစီးဌာနရဲ့ တာဝန်ကျ မီးသတ်ဝန်ထမ်းတယောက်က “သင်္ဘောမီးလောင်တဲ့နေရာကို Level 1 ယာဥ်အုပ်စု ထွက်ခွာပြီး မီးငြှိမ်းသတ်ခဲ့ပါတယ်။ ပြည်သူတွေနဲ့ တခြားပရဟိတအဖွဲ့တွေကလည်း ကူညီဆောင်ရွက်ပေးကြပါတယ်။ လူထိခိုက်တာတော့ မရှိပါဘူး။ မီးလောင်တဲ့အကြောင်းရင်းနဲ့ ပျက်စီးဆုံးရှုံးမှု တန်ဖိုးကိုတော့ စုံစမ်းနေဆဲပါဗျ” လို့ DVB ကို ပြောပါတယ်။

အဆိုပါကုန်တင်သင်္ဘောဟာ ပြည်တွင်းကို ရေကြောင်းကနေ ကုန်ပစ္စည်းတွေ သယ်ယူပို့ဆောင်ပေးနေတဲ့ ပုဂ္ဂလိကပိုင်သင်္ဘော ဖြစ်တယ်လို့လည်း သူက ဆက်ပြောပါတယ်။

ပြီးခဲ့တဲ့ အောက်တိုဘာ ၁ ရက် မနက်အစောပိုင်းကလည်း မန္တလေးမြို့၊ အထွေထွေရောဂါကု ဆေးရုံမှာရှိတဲ့ နှလုံးအထူးကုစင်တာ (အထက်မြန်မာပြည်) မှာ မီးလောင်ကျွမ်းမှု ဖြစ်ပွားခဲ့ပါသေးတယ်။