အိန္ဒိယအတိုက်အခံ အမျိုးသားရေးဝါဒီ ကွန်ဂရက်ပါတီက နိုင်ငံရေးသမား ဘာဘာ ဆစ်ဒစ်ဟာ အောက်တိုဘာ ၁၂ ရက်က အိန္ဒိယ စီးပွားရေးမြို့တော် မွမ်ဘိုင်းမှာ သေနတ်နဲ့ ပစ်သတ်ခံရပြီး သေဆုံးခဲ့ပါတယ်။
ဒေသစံတော်ချိန် ည ၉ နာရီခွဲဝန်းကျင်မှာ ဘယ်သူမှန်းမသိရတဲ့လူတွေက သားဖြစ်သူ နိုင်ငံရေးသမားရဲ့ ရုံးခန်းနားမှာ သူ့ကားကို ပစ်ခတ်ခဲ့ကြတာလို့ ဒေသခံရဲတပ်ဖွဲ့က ပြောပါတယ်။
ဆစ်ဒစ်ကို လီလာဗတီဆေးရုံနဲ့ သုတေသနစင်တာဆီ အမြန်ပို့ခဲ့ပြီး အဲဒီဆေးရုံမှာ လူရာချီ စုရုံးခဲ့ကြပါတယ်။
အဲဒီနောက် သူ့အလောင်းကို ဒေါက်တာ အာရ်အန် ကူးပါး မြူနီစီပယ် အထွေထွေဆေးရုံဆီ ရွှေ့ပြောင်းခဲ့ပြီး ရင်ခွဲစစ်ဆေးမှာ ဖြစ်ပါတယ်။
ဒီအမှုနဲ့ပတ်သက်လို့ လူ ၂ ယောက်ကို ဖမ်းထားပြီး တတိယမြောက် သံသယရှိသူကို ရှာနေပါတယ်။
သံသယရှိသူတွေက သူတို့ဟာ နာမည်ဆိုးနဲ့ ကျော်ကြားတဲ့ ရာဇဝတ်ကောင် လောရန့်စ် ဘစ်ရှ်နွိုင် ဦးစီးတဲ့ ဂိုဏ်းကဖြစ်ကြောင်း ပြောခဲ့တယ်လို့ အိန္ဒိယ မီဒီယာတချို့က ဖော်ပြပါတယ်။
ဘစ်ရှ်နွိုင်ဟာ ၂၀၂၂ ခုနှစ်က အိန္ဒိယ ရက်ပ်ပါ ဆီဒူမုစ် ဝါလာကို သတ်မှု အပါအဝင် လူသိရှင်ကြား လူသတ်မှု အများအပြားမှာ ပါဝင်ပတ်သက်မှုအတွက် လက်ရှိမှာ ထောင်ဒဏ် ကျခံနေရပါတယ်။
သတ်မယ်ဆိုတဲ့ ခြိမ်းခြောက်မှုတွေကြောင့် ဆစ်ဒစ်ရဲ့ လုံခြုံရေး အသေးစိတ်ကို အဆင့်မြှင့်တင်ပြီးနောက် လပိုင်းအကြာမှာ ခုလို ပစ်ခတ်လုပ်ကြံခံရတာ ဖြစ်ပါတယ်။
ဝါရင့်နိုင်ငံရေးသမားနဲ့ မဟာရတ်ရှ်ထျာပြည်နယ်ရဲ့ ဝန်ကြီးဟောင်းဖြစ်သူ ဆစ်ဒစ်ဟာ ၁၉၇၇ ခုနှစ်ကစပြီး အိန္ဒိယ အဓိကအတိုက်အခံပါတီဖြစ်တဲ့ အိန္ဒိယအမျိုးသားကွန်ဂရက်ရဲ့ အဖွဲ့ဝင်ဖြစ်ခဲ့သူပါ။
၂၀၂၄ ဖေဖော်ဝါရီမှာတော့ ဘက်ပြောင်းခဲ့ပြီး လက်ရှိအာဏာရ BJP ပါတီရဲ့ ညွန့်ပေါင်း မဟာမိတ် အမျိုးသားရေးကွန်ဂရက်ပါတီကို ဝင်ရောက်ခဲ့ပါတယ်။
Source-Reuters
