ဧရာဝတီတိုင်း၊ ကျောင်းကုန်းမြို့နယ်မှာ ဖေ့စ်ဘွတ်ခ်ပေါ် လက်သုံးချောင်းထောင်တဲ့ နိုင်ငံရေးနဲ့ ပတ်သက်တဲ့ပို့စ်ကို မျှဝေတာကြောင့်ဆိုပြီး အသက် ၁ နှစ်အရွယ် ကလေး အပါအဝင် ဒေသခံ မိသားစုဝင် ၃ ယောက်ကို စစ်ကောင်စီတပ်နဲ့ ပြည်သူ့စစ်တွေက ဖမ်းဆီးထားတယ်လို့ သိရပါတယ်။
စစ်ကောင်စီတပ်ရဲ့ ဖမ်းဆီးခံရတဲ့သူတွေကတော့ ကျောင်းကုန်းမြို့နယ်၊ တာကောက်ကျေးရွာက ဇနီးမောင်နှံ ၂ ယောက်ဖြစ်ပြီး စစ်ကောင်စီတပ်၊ ပြည်သူစစ်နဲ့ ရဲတွေက စက်တင်ဘာ ၆ ရက်က ဖမ်းဆီးခဲ့တာလို့ သိရပါတယ်။
အဖမ်းခံရသူတွေနဲ့ နီးစပ်သူတယောက်က “ကိုမောင်တူးနဲ့ သူ့မိန်းမ မအောင်စုတင်တို့ကို စကစတပ်နဲ့ ပြည်သူ့စစ်တွေက ဖမ်းတာ။ လူမှုစာမျက်နှာပေါ်မှာ လက်သုံးချောင်းထောင်တဲ့ပို့စ် ဝေမျှတယ်ဆိုပြီး တိုင်ကြားမှုကြောင့် ဖမ်းတာတဲ့။ အသက်တနှစ်အရွယ် သူတို့ရဲ့ကလေးပါ ခေါ်သွားတာ။ ဒီလောက်ပဲ သိရသေးတယ်” လို့ ပြောပါတယ်။
စစ်ကောင်စီတပ်နဲ့ နီးစပ်သူတယောက်က “အဖမ်းခံရတဲ့ လင်မယား ၂ ယောက်နဲ့ ကလေးကို ကျောင်းကုန်းရဲစခန်းမှာ ချုပ်နှောင်ထားတယ်လို့ သိရတယ်။ ရဲစခန်းက အကြမ်းဖက်ပုဒ်မတွေနဲ့ အမှုဖွင့်ပြီး စစ်ဆေးနေတယ်။ ဖေ့စ်ဘွတ်ခ်မှာ တင်ထားတဲ့ပို့စ်ကိစ္စနဲ့ ဖမ်းတာပါ။ ဖုန်းကိုလည်း သိမ်းထားတယ်” လို့ ပြောပါတယ်။
ဖမ်းဆီးခံရတဲ့ ဇနီးမောင်နှံ ၂ ယောက်ကို ကျောင်းကုန်းရဲစခန်းမှာ ဖမ်းဆီးထိန်းသိမ်းထားပြီး အကြမ်းဖက်မှုတိုက်ဖျက်ရေး ဥပဒေပုဒ်မ ၅၂(က)၊ ရာဇသတ်ကြီးပုဒ်မ ၁၂၄-(က) နဲ့ ပုဒ်မ ၅၀၅-က၊ အီလက်ထရောနစ် ဆက်သွယ်ဆောင်ရွက်ရေး ဥပဒေပုဒ်မ ၃၃(က) တို့နဲ့ အမှုဖွင့် စစ်ဆေးနေတယ်လို့ သိရပါတယ်။
