စစ်ကိုင်းတိုင်း၊ မုံရွာမြို့မှာ အောက်တိုဘာ ၈ ရက် မနက် ၁၀ နာရီ၀န်းကျင်က သန်းခေါင် စာရင်းကောက်ဖို့ ထွက်လာတဲ့အဖွဲ့ကို မိုင်းဆွဲတိုက်ခိုက်ခဲ့တဲ့အတွက် ရဲတပ်ဖွဲ့၀င် ၂ ယောက် သေဆုံးပြီး ၄ ယောက်ထက်မနည်း ဒဏ်ရာရရှိသွားကြတယ်လို့ သိရပါတယ်။

ဘာမထီတော်လှန်ရေးတပ်ဖွဲ့ရဲ့ ပြန်ကြားရေးတာ၀န်ခံတယောက်က “ဌာနစုံအင်အား ၁၀၀ နီးပါးလောက်ပါတဲ့ သန်းခေါင်စာရင်းကောက်ဖို့ လမ်းလျှောက်ပြီး ထွက်လာတာကို ကြိုသတင်းရလို့ နတ်လူထိပ်ပန်ရပ်ကွက်နားကလမ်းပေါ်မှာ ပဒေသာမိုင်းတွဲ ၅ လုံးကို တပွိုင့်ကြိုဆင်ပြီး ဆွဲခဲ့တာပါ” လို့ ပြောပါတယ်။

မိုင်းဆွဲတိုက်ခိုက်ခဲ့တာကြောင့် သန်းခေါင်စာရင်းကောက်တဲ့အဖွဲ့ထဲမှာပါတဲ့ ရဲတပ်ဖွဲ့၀င် ၂ ယောက် သေဆုံးကာ ၄ ယောက်ထက်မနည်း ဒဏ်ရာရရှိသွားကြတယ်လို့ ဆိုပါတယ်။

“ရဲ ၂ ယောက်သေတယ်။ ဒဏ်ရာရတဲ့သူတွေကလည်း ၄၊ ၅ ယောက်ရှိတယ်။ သူတို့ကိုစစ်တပ်က အိမ်စီးကားတွေနဲ့သယ်ပြီး ဆေးရုံပို့လိုက်တယ်။ အဲဒီအဖွဲ့လည်း ဆက်မသွားနိုင်တော့ဘူး” လို့ မြို့ခံတယောက် DVB ကို ပြောပါတယ်။

မိုင်းဆွဲတိုက်ခိုက်ခံရပြီးနောက် သန်းခေါင်စာရင်းကောက်တဲ့အဖွဲ့ထဲမှာ ပါ၀င်ကြတဲ့ စစ်ကောင်စီ တပ်သားတွေနဲ့ ရဲတပ်ဖွဲ့၀င်တွေဟာ သေနတ်နဲ့ပတ်၀န်းကျင်ကို ပြန်လည်ပစ်ခတ်တာတွေ ပြုလုပ်ခဲ့သေးတယ်လို့ ဆိုပါတယ်။

ဘာမထီတော်လှန်ရေးတပ်ဖွဲ့ရဲ့တာ၀န်ခံတယောက်က “ရဲ ၂ ကောင်ကတော့ နေရာမှာတင် သေတာလို့ မြေပြင်သတင်းပေးတွေဆီကနေ သိရတယ်။ သူတို့ဘက်က အထိနာတော့ ကျနော်တို့ ရဲဘော်တွေကို ဂန်းနဲ့လှမ်းပစ်တာ ရဲဘော်တွေ အပြေးမြန်လို့ အထိအခိုက်မရှိခဲ့ဘူး။ ပြည်သူတွေ လည်း မထိခိုက်ခဲ့ဘူး” လို့ ပြောပါတယ်။

အဆိုပါတိုက်ခိုက်မှုကို ဘာမထီတော်လှန်ရေးတပ်ဖွဲ့နဲ့အတူ Yinmarbin District No.9 Regiment အဖွဲ့တို့ ပူးပေါင်းလုပ်ဆောင်ခဲ့ကြတာလို့ သိရပါတယ်။

မိုင်းဆွဲတိုက်ခိုက်ခံရလို့ စစ်ကောင်စီလက်အောက်ခံရဲတပ်ဖွဲ့၀င် ၂ ဦးသေဆုံးတာနဲ့ပတ်သက်ပြီး အတည်ပြုနိုင်ဖို့ DVB အနေနဲ့ မုံရွာမြို့မရဲစခန်းကို ဖုန်းနဲ့အကြိမ်ကြိမ်ဆက်သွယ်ခဲ့ပေမဲ့ လက်ခံဖြေ ဆိုတာ မရှိခဲ့ပါဘူး။