ဆူဒန်နိုင်ငံ မြို့တော်ခါတွမ်မှာရှိတဲ့ ဆူဒန်ဆိုင်ရာ UAE သံအမတ်ကြီးနေအိမ်ကို ဆူဒန် စစ်လေယာဉ် တစီးက တိုက်ခိုက်ခဲ့ပြီး ဒါဟာ နိုင်ငံတကာဥပဒေကို ထင်ထင်ရှားရှား ချိုးဖောက်မှုအဖြစ် ရှုတ်ချတယ်လို့ UAE အစိုးရက စက်တင်ဘာ ၃၀ ရက်မှာ ပြောလိုက်ပါတယ်။

ဆူဒန်စစ်တပ်ကတော့ စွပ်စွဲချက်ကို ပယ်ချခဲ့ပြီး တိုက်ခိုက်မှုအတွက် အရန်အမြန်ထောက်ပံ့ရေးတပ်ဖွဲ့ (RSF) ကို အပြစ်တင်ခဲ့ပါတယ်။

စက်တင်ဘာ ၂၉ ရက်က ခါတွန်မြို့က UAE နိုင်ငံ သံအမတ်ကြီးရဲ့ အိမ်ကို ဆူဒန်စစ်တပ်က ပြောင်ပြောင်တင်းတင်း တိုက်ခိုက်မှုဟာ နိုင်ငံတကာ သဘောတူညီချက်တွေနဲ့ စံနှုန်းတွေ၊ အထူးသဖြင့် သံတမန်ဆက်ဆံရေးဆိုင်ရာ ဗီယင်နာကွန်ဗင်းရှင်းတို့ကို ပြောင်ပြောင်တင်းတင်း ချိုးဖောက်တာပဲလို့ UAE နိုင်ငံခြားရေးဝန်ကြီး ရှိတ်ခ်ရှာဘွတ်ခ်အယ်လ်နာဟီယံ အယ်လ်နာဟီယံက နယူးယောက်မြို့မှာ ကျင်းပနေတဲ့ ကုလသမဂ္ဂ အထွေထွေညီလာခံမှာ ပြောခဲ့ပါတယ်။

ဆူဒန်ရဲ့ ၁၇ လကြာ စစ်ပွဲမှာ RSF ကို UAEက လက်နက်နဲ့ အထောက်အပံ့တွေ ပေးနေတယ်လို့  ဆူဒန်စစ်တပ်က အကြိမ်ကြိမ် စွပ်စွဲခဲ့ဖူးပြီး UAE က စွပ်စွဲချက်တွေကို ငြင်းဆိုထားပါတယ်။ ယူအေအီးဟာ RSF ကို စစ်ရေးအရ ပံ့ပိုးပေးခဲ့တယ်လို့ ယုံကြည်ရလောက်တဲ့ စွပ်စွဲချက်တွေကို ကုလသမဂ္ဂရဲ့ ပိတ်ဆို့အရေးယူမှု စောင့်ကြည့်သူတွေက ဖော်ပြခဲ့ကြပါတယ်။

သံအမတ်ကြီး နေအိမ်ကို တိုက်ခိုက်မှုကြောင့် အဆောက်အအုံ အများအပြား ပျက်စီးသွားခဲ့တယ်လို့ UAE နိုင်ငံခြားရေး ဝန်ကြီးဌာနက ကြေညာချက် ထုတ်ပြန်ထားပါတယ်။

လွတ်လပ်တဲ့ရွေးကောက်ပွဲဆီ အသွင်ကူးပြောင်းရေးနဲ့ ပတသက်ပြီး ဆူဒန်စစ်တပ်နဲ့ RSF တို့ကြား ပြီးခဲ့တဲ့နှစ် ဧပြီလမှာ စစ်ပွဲဖြစ်ပွားခဲ့တာပါ။ ဆူဒန်လူဦးရေရဲ့ ထက်ဝက်နီးပါးက အကူအညီတွေ လိုအပ်နေပြီး လူပေါင်း ၂၅ သန်းနီးပါး အငတ်ဘေး ကြုံနေရပါတယ်။ လူ ၈ သန်းလောက် အိုးအိမ်စွန့်ခွာ ထွက်ပြေးခဲ့ရတယ်လို့ ကုလသမဂ္ဂက ပြောပါတယ်။ 

ဆူဒန်က ကာလကြာရှည် ပဋိပက္ခဟာနိုင်ငံရဲ့ ရေနံလုပ်ငန်းကိုလည်း ဆိုးဆိုးရွားရွား ထိုးနှက်ခဲ့လို့ ရေနံချက်စက်ရုံတချို့ကို ပိတ်ခဲ့ရတာပါ။ မနှစ်က နှစ်လယ်ကစပြီး နယ်မြေ အများအပြားမှာ ဓာတ်ငွေ့နဲ့ ဒီဇယ် ကျယ်ကျယ်ပြန့်ပြန့် ပြတ်လပ်နေပြီး စျေးနှုန်း ၃ ဆအထိ မြင့်တက်ခဲ့ပါတယ်။

ဒါကြောင့် နိုင်ငံတလွှား လျှပ်စစ်ဓာတ်အား ပြတ်လပ်နေပြီး နယ်မြေအများအပြားမှာ နေ့တိုင်း နာရီ အတော်တော်များများ ကြာအောင် လျှပ်စစ်ဓာတ်အား ပြတ်တောက်တာကို ရင်ဆိုင်နေရပါတယ်။

Source-Reuters