Home
နိုင်ငံတကာ
ရွေးကောက်ပွဲ ရှုံးနိမ့်ပါက ထပ်မပြိုင်တော့ဟု ထရမ့်ပ်ပြော
DVB
·
September 23, 2024
Photo-Reuters

ရီပတ်ဘလီကန် သမ္မတလောင်း ဒေါ်နယ်ထရမ့်ပ်က နိုဝင်ဘာ သမ္မတရွေးကောက်ပွဲမှာသာ အရေးနိမ့်ခဲ့ရင် ၂၀၂၈ မှာ ထပ်ပြိုင်မှာ မဟုတ်တော့ဘူးလို့ ပြောလိုက်ပါတယ်။

အသက် ၇၈ နှစ်ရှိပြီဖြစ်တဲ့ ထရမ့်ပ်ဟာ သမ္မတရွေးကောက်ပွဲ ၃ ကြိမ်ဆက်တိုက် ရီပတ်ဘလီကန်ပါတီ ကိုယ်စားပြု သမ္မလောင်းအဖြစ် ယှဉ်ပြိုင်ခွင့်ရခဲ့သူဖြစ်ပြီး ၈ နှစ်တာအတွင်း ပါတီရဲ့မူဝါဒကို ပြန်လည်ပုံသွင်းရမှာ အဓိကကျခဲ့သူလည်း ဖြစ်ပါတယ်။

ဆင်ကလဲယားမီဒီယာနဲ့ အင်တာဗျူးတခုမှာ အကယ်၍ ဒီမိုကရက်သမ္မတလောင်း ကမ်မလာ ဟားရစ်ကိုသာ ရှုံးခဲ့ရင် နောက်တကြိမ် ထပ်ပြိုင်ဦးမှာလားလို့ မေးခွန်းထုတ်ခံခဲ့ရပါတယ်။

အဲဒီမှာ ထရမ့်ပ်က “နိုးပါ၊ ထပ်မပြိုင်တော့ပါဘူး။ အဲဒီလိုပဲထင်ပါတယ်။ … ဒီလိုပဲဖြစ်မှာပါ။ ဘယ်လိုမှ မဖြစ်နိုင်တော့ပါဘူး” လို့ ဖြေကြားခဲ့ပါတယ်။

ဒါပေမဲ့ “ကျုပ်တို့ အကြီးအကျယ် အောင်ပွဲခံနိုင်မယ်လို့ မျှော်လင့်ကြောင်း” လည်း ထရမ့်ပ်က ပြောခဲ့ပါတယ်။

အမေရိကန်ဥပဒေအရ သမ္မတတယောက်ဟာ ဆက်တိုက်ဖြစ်စေ၊ သီးခြားစီဖြစ်စေ သက်တမ်း ၂ ကြိမ်ထက်ပိုပြီး ထမ်းဆောင်ခွင့်မရှိတာကြောင့် ထရမ့်ပ်ဟာ အခုရွေးကောက်ပွဲနိုင်လည်း  ၂၀၂၈ မှာ ထပ်ပြိုင်လို့ရမှာ မဟုတ်ပါဘူး။

အရင်တုန်းကတော့ ထရမ့်ပ်ဟာ ရှုံးနိုင်ခြေအကြောင်း ဝန်ခံလေ့မရှိပေမဲ့ အခုတော့ ၄ ရက်အတွင်း ရှုံးရင်ဆိုတဲ့ကိစ္စကို ၂ ကြိမ်မြောက် ထုတ်ပြောတာလည်း ဖြစ်ပါတယ်။

အစ္စရေး-အမေရိကန်ကောင်စီက လုပ်တဲ့ပွဲမှာ အကယ်၍ သူသာရှုံးရင် ဂျူးမဲဆန္ဒရှင်တွေကြောင့် ဖြစ်မယ်လို့ ထရမ့်ပ်က ပြောကြားခဲ့ပါတယ်။

အ‌ေမရိကန်ဂျူး ၄၀ ရာခိုင်နှုန်းကသာ သူ့ကိုထောက်ခံတယ် ဆိုတာကြောင့် ကျန်တဲ့ ၆၀ က ရန်သူကို ထောက်ခံတယ်လို့ ဆိုလိုရာရောက်ကြောင်း ထရမ့်ပ်က ပြောခဲ့တာဖြစ်ပါတယ်။

CBS ရုပ်သံနဲ့ NBC ရုပ်သံတွေက ပြုလုပ်တဲ့ နောက်ဆုံးစစ်တမ်းတွေအရတော့ ကမ်မလာ ဟားရစ်က ထရမ့်ပ်ကို အသာရနေပါတယ်။

ဒါပေမဲ့ စီးပွားရေး၊ လူနေမှုစရိတ်နဲ့ ရွှေ့ပြောင်းအရေးတို့မှာ ထရမ့်ပ်ကို ဟားရစ်ထက်ပိုပြီး ယုံကြည်မှုရှိတယ်လို့လည်း စစ်တမ်းတွေက ဖော်ပြပါတယ်။

Source-Reuters

Live

About DVB

The Democratic Voice of Burma (DVB) publishes daily independent news and information across Myanmar and around the world by satellite TV and the internet. DVB was founded in 1992 and is registered as a non-profit association in Thailand.

Follow Us

© Democratic Voice of Burma 2024