မနေ့ညက ကန်သွားတဲ့ ကာရာဘောင်လိဂ်ဖလား ပွဲစဉ်မှာ မန်ချက်စတာယူနိုက်တက် အသင်းက လိဂ်ဝမ်းကလပ်အသင်း ဘန်စလေအသင်းကို (၇-၀) ဂိုးနဲ့ ဂိုးပြတ်အနိုင်ရပြီး နောက်တဆင့်ကို တက်ရောက်သွားပါတယ်။
မန်ယူအတွက် အဖွင့်ဂိုးကိုတော့ ပွဲချိန် ၁၆ မိနစ်မှာ ဂါနာချိုကန်တင်ပေးတဲ့ ဘောလုံးကို ရက်ရှ်ဖို့ဒ် က ဂိုးဧရိယာထဲကို ဆွဲယူသွားပြီး ဂိုးသမားနဲ့ အနီးကပ် ကန်သွင်းယူသွားခဲ့တာဖြစ်ပါတယ်။
ဒုတိယ ဂိုးကိုတော့ ဘရာဇီးတောင်ပံကစားသမား အန်တိုနီက ပင်နယ်တီကနေတဆင့် ကန်သွင်းပေးခဲ့တာဖြစ်ပြီး ပွဲချိန် ၄၅ မိနစ်အပြီး နာကျင်အချိန်ပို ၂ မိနစ်မှာ ဂါနာချိုက သွင်းယူပေးခဲ့လို့ ပထမပိုင်းအပြီးမှာကတည်းက မန်ယူအသင်းက ၃ ဂိုးနဲ့ ဦးဆောင်နေခဲ့ပါတယ်။
ဒုတိယပိုင်း ၄၉ မိနစ်မှာ ဂါနာချိုက နောက်ထပ် တဂိုးသွင်းယူပေးခဲ့ပြီး ၅၈ မိနစ်မှာ ရက်ရှ်ဖို့ဒ်က တဂိုးနဲ့ ပွဲချိန် ၈၁ မိနစ်နဲ့ ၈၅ မိနစ်တွေမှာ အဲရစ်ဆင်က ၂ ဂိုးဆက်တိုက်သွင်းယူခဲ့လို့ ပွဲအပြီးမှာ မန်ယူအသင်းက ၇ ဂိုးပြတ်နဲ့ အနိုင်ရသွားခဲ့တာဖြစ်ပါတယ်။
ဒါဟာ မန်ယူအသင်းအနေနဲ့ နည်းပြတန်ဟတ်ဂ်လက်ထက်မှာ ဂိုးကွာခြားချက် ၇ ဂိုးနဲ့ နိုင်ရခဲ့တဲ့ ပွဲစဉ်တခုဖြစ်ပြီး ၂၀၂၁ ခုနှစ်ဖေဖော်ဝါရီလတုန်းက ဆောက်သမ်ပတန်အသင်းကို (၉-၀) ဂိုးနဲ့ အနိုင်ရပြီးနောက် ဂိုးအများဆုံးသွင်းယူနိုင်ခဲ့တဲ့ ပွဲလည်းဖြစ်ပါတယ်။
မန်ယူနည်းပြတန်ဟတ်ဂ်က “အသင်းအတွက်တော့ ပြီးပြည့်စုံတဲ့ညဖြစ်တယ်၊ ကျနော်တို့ စီစဉ်ထားတဲ့အတိုင်း အကုန်လုပ်နိုင်ခဲ့တယ်၊ နောက်တဆင့်တက်ဖို့ အနိုင်ရခဲ့တယ်၊ အရမ်းကောင်းတဲ့ ဂိုးတချို့သွင်းယူနိုင်ခဲ့တယ်၊ ပရိတ်သတ်တွေကို ဖျော်ဖြေမှုပေးနိုင်ခဲ့ပြီး ကျနော်တို့ရဲ့ ကစားတဲ့ပုံစံအတိုင်း လုပ်နိုင်ခဲ့လို့ ကျနော်တို့ အရမ်းပျော်ပါတယ်”လို့ ပွဲအပြီးမှာ ပြောပါတယ်။
ဒီပွဲမှာ ဂါနာချို ၂ ဂိုးသွင်း ၂ ဂိုးဖန်တီးပေးပြီးခြေစွမ်းပြကစားနိုင်ခဲ့သလို ပြီးခဲ့တဲ့ရာသီက သွင်းဂိုးနည်းလို့ ဝေဖန်ခံနေရတဲ့ တိုက်စစ်မှူးရက်ရှ်ဖို့ဒ်ဟာလည်း ၂ ဂိုးသွင်းယူနိုင်ခဲ့ပြီး ၂ ပွဲဆက်တိုက် သွင်းဂိုးတွေရရှိခဲ့ပါတယ်။
