စစ်ကိုင်းတိုင်း၊ ကနီမြို့နယ်က ချင်းတွင်းမြစ်အတွင်း သွားလာနေတဲ့ ပြည်သူပိုင် ရေယာဥ်တွေကို ယာယီသွားလာခြင်းမပြုဖို့ စက်တင်ဘာ ၁၆ ရက်မှာ ကနီမြို့နယ် ပြည်သူ့အုပ်ချုပ်ရေးအဖွဲ့က သတိပေး တားမြစ်ထားပါတယ်။
ကနီမြို့နယ် ပြည်သူ့အုပ်ချုပ်ရေးအဖွဲ့ တာဝန်ရှိသူတယောက်က “စစ်ကောင်စီရေယာဥ်တွေ စုန်ဆင်းလာနေတာဖြစ်လို့ ပြည်သူပိုင်ရေယာဥ်တွေ အစုန်အဆန်သွားလာတာ မလုပ်ကြဖို့ ဒီမနက် ၆ နာရီကစလို့ တားမြစ်ရတာ ဖြစ်ပါတယ်။ အဲဒီစစ်ရေယာဥ်တွေ ဒီမြို့နယ်အတွင်းကနေ လွတ်ကင်းသွားတဲ့အချိန်ရောက်ရင်တော့ ပြန်လည်ခွင့်ပြုပေးသွားမှာပါ” လို့ ပြောပါတယ်။
ချင်းတွင်းမြစ်အတွင်း စစ်ကောင်စီရေယာဥ်တွေဟာ အစုန်အဆန် သွားလာတိုင်း မြစ်ကမ်းဘေးဝဲယာတွေကို ပစ်ခတ်လေ့ရှိတဲ့အတွက် ပြည်သူတွေ ထိခိုက်သေဆုံးခဲ့ရတာတွေ ရှိခဲ့တာကြောင့် အခုလို တားမြစ်ရတာလို့ ဆိုပါတယ်။
ကနီမြို့နယ်က ချင်းတွင်းမြစ်ကမ်းဘေးမှာ နေထိုင်ကြတဲ့ ပြည်သူတွေအနေနဲ့ မြစ်ကမ်းနဲ့ ၃ မိုင်ပြင်ပအထိ ယာယီရွှေ့ပြောင်းပေးကြဖို့လည်း ကနီမြို့နယ် ပြည်သူ့ကာကွယ်ရေးတပ်ဖွဲ့ ပြောရေးဆိုခွင့်ရှိသူတယောက်က ပြောပါတယ်။
“သူတို့ ရေယာဥ်တွေ ဖြတ်သန်းတဲ့အချိန် မြစ်ကမ်းဘေးဝဲယာတွေကို ပစ်ခတ်တာတွေရှိသလို တပ်ပေါင်းစုတွေကလည်း ကြားဖြတ်တိုက်ခိုက်တာတွေ ရှိတယ်။ မြစ်ကမ်းဘေးမှာနေတဲ့ ပြည်သူတွေ မထိခိုက်စေချင်တာကြောင့် အခုလို ကြိုတင်ရွှေ့ပြောင်းခိုင်းရတာပါ” လို့ ပြောပါတယ်။
ချင်းတွင်းမြစ်အတိုင်း မော်လိုက်မြို့နယ်ကနေ စုန်ဆင်းလာတဲ့ စစ်ရေယာဥ် ၉ စီးဟာ ကလေးဝမြို့နယ်၊ ပလူဇဝကျေးရွာကို ရောက်ရှိနေပြီး အဲဒီကနေ မင်းကင်းနဲ့ ကနီမြို့နယ်တို့ကို မြစ်ကြောင်းအတိုင်း ဖြတ်သန်းသွားမယ်လို့လည်း သိရပါတယ်။
