ရှမ်းပြည်နယ်မြောက်ပိုင်း ကျောက်မဲနဲ့ နောင်ချိုမြို့နယ်ရှိ စစ်ကောင်စီ တောင်ခမ်း အမြောက်စခန်းကွပ်ကဲမှုဌာနချုပ် (မစခ ၉၀၂) ကို တိုက်ခိုက်သိမ်းပိုက်ခဲ့ရာမှာ စစ်ကောင်စီတပ်သား အများအပြားသေဆုံးပြီး လက်နက်ခဲယမ်းတွေ သိမ်းဆည်းရရှိခဲ့တယ်လို့ TNLA က စက်တင်ဘာ ၄ ရက်မှာ ထုတ်ပြန်ပါတယ်။
တောင်ခမ်းကျေးရွာရှိ စစ်ကောင်စီအမြောက်တပ်တွေဖြစ်တဲ့ ၂၀၆၊ ၃၅၄၊ ၄၀၆၊ ၉၀၂ တပ်တွေကို တိုက်ခိုက်သိမ်းပိုက်နိုင်ဖို့အတွက် တအာင်းအမျိုးသားလွတ်မြောက်ရေးတပ်မတော် (TNLA) က စစ်တပ်သံချပ်ကာတွေကို အသုံးပြုခဲ့ပြီး လက်နက်နဲ့အလောင်းတွေ သိမ်းဆည်းရရှိခဲ့တဲ့ ဗီဒီယို မှတ်တမ်းကို ထုတ်ပြန်ခဲ့ပါတယ်။
အဲ့ဒီ တောင်ခမ်းတပ်စခန်းတိုက်ပွဲကို TNLA က စစ်ဦးစီးမှူး ဒုတိယဗိုလ်မှူးကြီး တားမဝေါနဲ့ တပ်မဟာမှူး (၆) ဒုတိယဗိုလ်မှူးကြီး တာမောရှန်တို့ဦးဆောင်ပြီး သြဂုတ် ပထမပတ်က စတင်ကာ တိုက်ခိုက်ခဲ့တာလို့ ဆိုပါတယ်။
တောင်ခမ်းကျေးရွာရှိ အမြောက်တပ်ရင်း ၄ ခုအနက် အမြောက်တပ် ၄၀၆ နဲ့ ၂၀၆ တို့ကို ပြီးခဲ့တဲ့သြဂုတ် ၂၈ ရက်မှာ TNLA က အပြီးသတ်သိမ်းပိုက်နိုင်ခဲ့ပြီး အမြောက်တပ် ၉၀၂ တပ်ကို ထပ်မံသိမ်းပိုက်ခဲ့တာပါ။
ကျန်ရှိနေတဲ့ အမြောက်တပ် ၃၅၄ ကို ဆက်လက် တိုက်ခိုက်နေကြောင်း TNLA က သတင်းထုတ်ပြန်ထားပါတယ်။
ရှမ်းပြည်နယ်တောင်ပိုင်း၊ ရပ်စောက်မြို့နယ်၊ ကျောက်ဂူဘက်မှ နောင်ချိုမြို့နယ်အတွင်းကို စစ် အင်အားဖြည့်တင်းဖို့ စစ်ကောင်စီတပ်က ထိုးစစ်ဆင်လာတာဖြစ်ပြီး လေကြောင်းနဲ့လည်း လက်နက်ခဲယမ်းတွေအပြင် ရိက္ခာများချပေးတာနဲ့ ပစ်ကူပေးတာတွေကို လုပ်ဆောင်ခဲ့တယ်လို့ ဆိုပါတယ်။
အမြောက်စခန်းကွပ်ကဲမှုဌာနချုပ် (မစခ ၉၀၂) သိမ်းပိုက်ခံရတာနဲ့ ပတ်သက်ပြီး စစ်ကောင်စီက သတင်းထုတ်ပြန်တာ မရှိသေးပါဘူး။
