စက်တင်ဘာ ၁ ရက်က ထွက်သွားတဲ့ ဆုကြေး ဘတ်ငွေ ၆ သန်းတန် ထိုင်းထီပထမဆု ပေါက်ဂဏန်း ၁၉၉၆၀၆ ကို ထိုင်းနိုင်ငံ အထည်ချုပ်စက်ရုံတခုမှာ အလုပ်လုပ်နေတဲ့ မြန်မာလုပ်သားဇနီးမောင်နှံက ကံထူးရှင်အဖြစ် ဆွတ်ခူးရရှိသွားပါတယ်။
သူတို့ဇနီးမောင်နှံဟာ မန္တလေးတိုင်း မြင်းခြံခရိုင်ကနေ ထိုင်းနိုင်ငံ နွန်ထပူရီခရိုင် အထည်ချုပ်စက်ရုံမှာ လာလုပ်နေတာ ၈ နှစ်ရှိသွားပြီဖြစ်ပြီး ထီအမြဲထိုးခဲ့ကြောင်း၊ ဒီတခေါက်မှာလည်း ဘတ် ၁၀၀၀ ဖိုးနဲ့ ထီ ၁၀ စောင်ဝယ်ပြီး ကံစမ်းတာမှာ ၁ စောင်က ပထမဆုပေါက်သွားတာလို့ မြန်မာအလုပ်သမားအရေး ကူညီဆောင်ရွက်ပေးနေတဲ့ M.H.A.C မဟာမိတ်အဖွဲ့မှ ကိုရဲမင်းက ဒီဗွီဘီကို ပြောပါတယ်။
“ထီထွက်တော့ သူတို့တိုက်ကြည့်တယ်၊ ထီပေါက်တာလည်းသိရော တခြားမယုံကြည်ရတဲ့သူတွေကို ပြောမိရင် အလိမ်ခံရမှာစိုးလို့ ကျနော်တို့ဆီ ဖုန်းဆက်ပြီး အကူအညီတောင်းခဲ့တယ်။ ကျနော်တို့ M.H.A.C မဟာမိတ်အဖွဲ့က သူတို့ လုံခြုံရေးကိုပါ တာဝန်ယူပေးပြီး ဒီနေ့ စက်တင်ဘာ ၂ ရက် နေ့လယ်ပိုင်းကပဲ ဘဏ်မှာ ဆုငွေတွေ နေ့ချင်းပြီး ရအောင် ထုတ်ပေးလိုက်ပါပြီ။”
မြန်မာအလုပ်သမားကူညီရေးမဟာမိတ်အဖွဲ့အနေနဲ့ ထီပေါက်တဲ့ မြန်မာလုပ်သားတွေ ဘေးကင်းလုံခြုံစွာ ဆုငွေထုတ်နိုင်ရေး လိုက်လံကူညီဆောင်ရွက်ပေးနေတာမှာ ၁၀ နှစ်ကျော် ကာလအတွင်း နှစ်စောင်တွဲ ကံထူးရှင် ၆ ဦး အပါအဝင် ၅၂ ဦးရှိသွားပြီလို့ ဆိုပါတယ်။
