ရှမ်းပြည်နယ်မြောက်ပိုင်း၊ နောင်ချိုမြို့နယ် တောင်ခမ်းကျေးရွာရှိ စစ်ကောင်စီ အမြောက်တပ်ရင်း ၂ ခု ဖြစ်တဲ့ အမတ (၄၀၆)နဲ့ အမတ (၂၀၆)တို့ကို သြဂုတ် ၂၈ ရက် ညပိုင်းမှာ သိမ်းပိုက်နိုင်ခဲ့ကြောင်း တအာင်းအမျိုးသားလွတ်မြောက်ရေးတပ်မတော်(TNLA)က ထုတ်ပြန် ပါတယ်။

နောင်ချိုမြို့နယ် တောင်ခမ်းကျေးရွာရှိ စစ်ကောင်စီ (၉၀၂) တပ်စခန်း၊  ၃၄၅ တပ်စခန်းအနီး တဝိုက်နဲ့ မကျီးရေရွာဘုန်းကြီးကျောင်းတို့မှာလည်း သြဂုတ် ၂၉ ရက်က TNLA နဲ့ စစ်ကောင်စီတပ်တို့အကြား တိုက်ပွဲတွေ ဖြစ်ပွားခဲ့တယ်​လို့ ထုတ်ပြန်ချက်မှာ ပါရှိပါတယ်။

တောင်ခမ်းကျေးရွာရှိ စစ်ကောင်စီ ၉၀၂ တပ်စခန်းကို သြဂုတ် ၂၉ ရက် မနက် ၇ နာရီ ၂၀မိနစ်မှာတကြိမ်၊ ၃၄၅ တပ်စခန်းကို ညနေ ၅ နာရီ မိနစ် ၄၀ မှာတကြိမ်နဲ့ မကျီးရေရွာ ဘုန်းကြီးကျောင်းတို့မှာ နှစ်ဖက်တိုက်ပွဲဖြစ်ပွားခဲ့ရာ စစ်ကောင်စီဘက်က Y12 နဲ့ (၃)ကြိမ် ၊ ဗုံး (၁၅၀) လုံး၊ လေကြောင်း ပစ်ကူပေး တိုက်ခိုက်ခဲ့ကြောင်း မြေပြင်သတင်းရင်းမြစ်ထံက သိရပါတယ်။

ရှမ်းပြည်နယ်တောင်ပိုင်း ရပ်စောက်မြို့နယ် ကျောက်ဂူမှ နောင်ချိုမြို့နယ်အတွင်းကို စစ်အင်အား ပြန်လည်ဖြည့်တင်းဖို့ ကြိုးပမ်းနေတဲ့ စစ်ကောင်စီတပ်က ထိုးစစ်ဆင်လာတာကြောင့် နှစ်ဖက် တိုက်ပွဲ ဖြစ်ပွားခဲ့ကြောင်း TNLA ထုတ်ပြန်ချက်အရ သိရပါတယ်။