မကွေးတိုင်း၊ ငဖဲမြို့နယ်၊ ပဒါန်း-အမ်းကားလမ်းပိုင်းမှာ ဩဂုတ် ၂၉ ရက်က စစ်ကောင်စီ စစ်ကြောင်းနဲ့ စစ်ယာဉ်တန်းကို ၂ ကြိမ် တိုက်ခိုက်ခဲ့လို့ ကပစ ၁၄ က ဗိုလ်ကြီးမျိုးကျော်သူ အပါအဝင် ၁၅ ဦးနီးပါးသေဆုံးပြီး အများအပြားဒဏ်ရာရရှိသွားကြတယ်လို့ PRA Magway ဆီကနေ သိရပါတယ်။
PRA Magway ရဲ့ စစ်ရေးတာ၀န်ခံတဦးက “ပဒါန်းအမြောက်စစ်ဆင်ရေးကွပ်ကဲမှု ဌာနချုပ် (မစခ ၉၀၅) ကနေ ဖောကား ၂ စီးနဲ့ ရခိုင်ဘက်ကို သွားမယ်လို့ယူဆရပြီး အင်အား ၆၀ လောက်ပါတဲ့ စစ်ယာဥ်တန်းကို ကြိုတင်သတင်းရလို့ ပဒါန်း-အမ်းလမ်းပေါ်က စပ်စီရွာနားမှာ စောင့်ပြီးမိုင်းဆွဲ ပစ်ခတ်တိုက်ခိုက်ခဲ့တာပါ။ မိုင်းဆွဲပြီးတော့ သူတို့ဘက်ကလည်းပြန်ပစ်လို့ အပြန်အလှန်ပစ်ခတ်မှု က နာရီ၀က်လောက်ဖြစ်ခဲ့တယ်”လို့ DVB ကို ပြောပါတယ်။
အဆိုပါတိုက်ခိုက်မှုကို ဩဂုတ် ၂၉ ရက် မနက် ၅ နာရီ၀န်းကျင်မှာတိုက်ခိုက်ခဲ့တာဖြစ်ပြီး ထိခိုက် သေဆုံးတဲ့စစ်ကောင်စီတပ်သားတွေကို FAW ကားနဲ့ ပဒါန်းဘက်ကို သယ်ဆောင်သွားစဥ် မနက် ၁၀ နာရီလောက်မှာ ထပ်မံမိုင်းဆွဲတိုက်ခိုက်ခဲ့သေးတယ်လို့ ဆိုပါတယ်။
PRA Magway ရဲ့တာ၀န်ခံတဦးက “အဲ့ဒိ တိုက်ခိုက်မှု ၂ ကြိမ်မှာ နာမည်ဆိုးနဲ့ကျော်ကြားနေတဲ့ ကပစ ၁၄ က ဗိုလ်ကြီးမျိုးကျော်သူ အပါအ၀င် ၁၅ ဦးနီးပါးသေဆုံးတယ်လို့ မြေပြင်ကနေ သတင်းပေးပို့လာပါတယ်။ သူတို့ဆီက ကား တစီးကတော့ သုံးမရအောင် ပျက်စီးသွားပါတယ်” လို့ ပြောပါတယ်။
စစ်ကောင်စီတပ်သားတွေဟာ သြဂုတ် ၂၉ ရက် ညနေပိုင်းအထိ မိုင်းဆွဲ တိုက်ခိုက်ခံရတဲ့နေရာ မှာရှိနေပြီး ဘေးပတ်၀န်းကျင်ကို လက်နက်ကြီး၊ လက်နက်ငယ်တွေနဲ့ ရမ်းပစ်ခတ်နေတယ်လို့ ဆိုပါတယ်။
အဆိုပါတိုက်ခိုက်မှုတွေကို PRA Magway က တိုက်ခိုက်ခဲ့တာဖြစ်ပြီး ဩဂုတ် ၁၁ ရက် မနက် ၉ နာရီ၀န်းကျင်ကလည်း စစ်ကောင်စီတပ်ရဲ့ နတ်ရေကန်လေကြောင်းရန်ကာကွယ်ရေး ရေဒါစခန်းထဲကို PRA Magway က ကိုယ်ပိုင်ထုတ်လုပ်တဲ့ 60 mm Rocket ၁၀ လုံးနဲ့ ပစ်ခတ် တိုက်ခိုက်ခဲ့ ပါတယ်။
အဆိုပါတိုက်ခိုက်မှုတွေနဲ့ ပတ်သက်ပြီး စစ်ကောင်စီဘက်က သတင်းထုတ်ပြန်တာ မရှိသေးသလို သေဆုံးဒဏ်ရာရသူ အရေအတွက်နဲ့ ပတ်သက်ပြီးလည်း သီးခြား အတည်ပြုနိုင်ခြင်း မရှိသေးပါဘူး။
