ဟေတီသမ္မတဟောင်း မစ်ချဲ့ ဂျိုးဇက်မာတယ်လီဟာ မူးယစ်မှောင်ခိုကူးရင်း နိုင်ငံထဲမှာ ဖြစ်နေတဲ့ အကျပ်အတည်းကို ဆက်ရှိအောင်လုပ်ဖို့ အရေးပါတဲ့ အခန်းကဏ္ဍကနေ ပါဝင်နေတယ်လို့ အမေရိကန်ပြည်ထောင်စုက စွပ်စွဲရင်း သြဂုတ် ၂၀ ရက်မှာ ပိတ်ဆို့အရေးယူမှုတွေ ချမှတ်ခဲ့ပါတယ်။

မာတယ်လီဟာ အမေရိကန်ပြည်ထောင်စုအတွက် ရည်မှန်းထားတဲ့ ကိုကင်း အပါအဝင် အန္တရာယ်ရှိတဲ့ မူးယစ်ဆေးဝါးတွေ ရောင်းဝယ်ဖောက်ကားရာမှာ လွယ်ကူချောမွေ့စေဖို့ သူ့ရဲ့သြဇာကို အလွဲသုံးစားလုပ်ခဲ့တယ်လို့ အမေရိကန်ဘဏ္ဍာရေးဌာနက ကြေညာချက် ထုတ်ပြန်ပါတယ်။

မာတယ်လီဟာ ဟေတီမူးယစ်ဆေး မှောင်ခိုရောင်းဝယ်သူတွေနဲ့လည်း လက်တွဲလုပ်ဆောင်ခဲ့ပြီး ဂိုဏ်းအများအပြားကို ပံ့ပိုးကူညီရင်း တရားမဝင် မူးယစ်ဆေးဝါး လုပ်ငန်းစဉ်က ခဝါချမှုမှာ ပါဝင်ပတ်သက်နေတယ်လို့ ကြေညာချက်က ဆိုပါတယ်။

အင်္ဂါနေ့က လုပ်ဆောင်ချက်ဟာ မာတယ်လီရဲ့ အမေရိကန်နိုင်ငံအတွင်း ပိုင်ဆိုင်မှုမှန်သမျှကို ရပ်တန့်စေပြီး ယေဘုယျအားဖြင့် အမေရိကန်ပြည်သူတွေကို သူ့ကို မဆက်ဆံဖို့ တားမြစ်ထားပါတယ်။

အုပ်စုဖွဲ့ စစ်ပွဲတွေဟာ ဟေတီနိုင်ငံသား ၅၈၀,၀၀၀ နီးပါးကို အိုးအိမ်မဲ့ဖြစ်စေခဲ့တာပါ။ လူဦးရေ ၁၁ ဒသမ ၇ သန်းရဲ့ ထက်ဝက်နီးပါးဖြစ်တဲ့ ပြည်သူ ၅ သန်းနီးပါး ငတ်မွတ်ခေါင်းပါးမှုနဲ့ ရင်ဆိုင်နေရပြီး သူတို့ထဲက ၁ ဒသမ ၆ သန်းဟာ အပြင်းအထန် ဆာလောင်မွတ်သိပ်နေတာကို ရင်ဆိုင်နေရတယ်လို့ ကုလသမဂ္ဂက ပြောပါတယ်။

လက်နက်ကိုင်ဂိုဏ်းတွေဟာ သတ်ဖြတ်ခြင်း၊ ပြန်ပေးဆွဲခြင်းနဲ့ လိင်ပိုင်းဆိုင်ရာ အကြမ်းဖက်မှုတွေကို ကျယ်ကျယ်ပြန့်ပြန့် လုပ်ဆောင်ရင်း ကျယ်ပြန့်တဲ့ မဟာမိတ်အဖွဲ့ကို ဖွဲ့စည်းခဲ့ပါတယ်။

Source-Reuters