တနင်္သာရီတိုင်း၊ ထားဝယ်မြို့မှာ တနင်္သာရီတိုင်း နယ်လုံဝန်ကြီး လိုက်ပါလာတဲ့ကားကို ပြည်သူ့ကာကွယ်ရေးတပ်ဖွဲ့တွေက တိုက်ခိုက်ခဲ့တာကြောင့် စစ်ကောင်စီတပ်သား ၃ ဦး သေဆုံးပြီး ၃ ဦး ဒဏ်ရာရရှိခဲ့တယ်လို့ ရေဖြူပြည်သူ့ကာကွယ်ရေးတပ်ဖွဲ့ (YPPDF) က ပြောပါတယ်။
စစ်ကောင်စီအင်အား ၁၀ ယောက်ကျော်နဲ့ တနင်္သာရီတိုင်း နယ်လုံဝန်ကြီး ဗိုလ်မှူးကြီးမင်းမင်းလတ် လိုက်ပါလာတဲ့ Vigo အဖြူရောင်ကားကို ထားဝယ်မြို့ ဆင်ဆိပ်ရပ်ကွက်၊ ရေးလမ်းမပေါ်မှာ တော်လှန်ရေးပူးပေါင်းတပ်တွေက ပြောက်ကျားစနစ်နဲ့ တိုက်ခိုက်ခဲ့ပါတယ်။
တိုက်ခိုက်မှုကြောင့် နယ်လုံဝန်ကြီး ဗိုလ်မှူးကြီးမင်းမင်းလတ် ထိခိုက်ဒဏ်ရာ မရခဲ့ပေမဲ့ စစ်ကောင်စီတပ်သား ၃ ဦး သေဆုံးပြီး ၃ ဦး ဒဏ်ရာရရှိခဲ့ပါတယ်။
YPPDF ပြန်ကြားရေးတာဝန်ခံက “ကားက vigo အဖြူ၊ ဘေးဘက် သံပြားတွေကာထားတဲ့ အိမ်စီးကားပါ။ နယ်လုံဝန်ကြီးက အရှေ့ဘက်မှာထိုင်တာပါ။ ကျနော်တို့ပစ်လိုက်တာ နောက်ဘက်ပဲ မီလိုက်တာ။ နောက်က အင်အား ၁၀ လောက်ပါတာ။ ၃ ဦးသေပြီး ၃ ဦး ဒဏ်ရာရတယ်။ စစ်ရေးပစ်မှတ်ကို ထိပေမဲ့ ထိထိရောက်ရောက် မဖြစ်သွားတာမျိုးပါ” လို့ ပြောပါတယ်။
တော်လှန်ရေးအဖွဲ့တွေ တိုက်ခိုက်ပြီးနောက် စစ်ကောင်စီတပ်သားတွေက အနီးနားအိမ်တွေနဲ့ တော်လှန်ရေးတပ်ဖွဲ့တွေ ရှိရာဘက်ကို ရမ်းသန်းပြီးပစ်ခတ်ပေမဲ့ တော်လှန်ရေး တပ်ဖွဲ့ဝင်တွေကော အရပ်သားတွေပါ ထိခိုက်မှုမရှိဘူးလို့ ဆိုပါတယ်။
တိုက်ခိုက်မှုကို ရေဖြူပြည်သူ့ကာကွယ်ရေးတပ်ဖွဲ့ (YPPDF) နဲ့ ဓဝယ်လွတ်မြောက်ရေးတပ်တော် (DNLA) တပ်ခွဲ ၁ တို့ ပူးပေါင်းဆောင်ရွက်ခဲ့ပါတယ်။
ဗိုလ်မှူးကြီးမင်းမင်းလတ်ဟာ အရင်နယ်လုံဝန်ကြီး ဗိုလ်မှူးကြီးသိန်းလင်း အဖမ်းခံရပြီးနောက် ၂၀၂၃ ခုနှစ် ဩဂုတ် ၁၅ ရက်မှာ စတင်တာဝန်ယူခဲ့ပါတယ်။
