စစ်ကိုင်းတိုင်း၊ မုံရွာမြို့နယ်၊ ထနောင်းတောကျေးရွာနဲ့ အောင်သာရွာမှာ စစ်ကောင်စီတပ်ဖွဲ့က ဩဂုတ် ၁၃ ရက် မနက် ၁၁ နာရီနဲ့ ညနေ ၄ နာရီလောက်မှာ လက်နက်ကြီးရဲ့ ရမ်းသန်းပစ်ခတ်တာကြောင့် ပြညသူ ၁၀ ဦး သေဆုံးပြီး ၁၁ ဦး ဒဏ်ရာပြင်းထန်ရရှိခဲ့တယ်လို့ ဒေသခံတွေက ပြောပါတယ်။
“ကျနော်တို့ ထနောင်းတောရွာက မနက်ခင်း ဈေးရှိတယ်။ ဈေးမှာ လူစီနေတဲ့အချိန်ကို ပစ်တာ။ ဈေးဆိုတော့ အနီးပတ်ဝန်းကျင်က လာရောင်းချတဲ့ ဈေးသည်တွေ၊ ဈေးဝယ်တွေ အစုံရှိတာပေါ့။ ဘယ်ရွာက ဘယ်သူဆိုတာတော့ အတိအကျမသိဘူး။ သေဆုံးတာက နေရာတင် ၉ ဦး သေဆုံးတယ်၊ ဆေးရုံရောက်မှ တဦး ထပ်မံ သေဆုံးတယ်။ ၁၁ ဦးကတော့ ဒဏ်ရာပြင်ထန်ရတယ်ဗျ။ မုံရွာက စစ်တပ်နဲ့လည်းနီးနေတော့ သေဆုံး၊ ဒဏ်ရာရသူတွေရဲ့ လုံခြုံရေးနဲ့ မိသားစုဝင်တွေရဲ့ လုံခြုံရေးအရ အသေးစိတ်ကို ပြောမပြတော့ဘူး။”
တိုက်ပွဲမဖြစ်ပွားဘဲ စစ်တပ်ဘက်က ပစ်ခတ်တာလို့လည်း ဒေသခံ နောက်တဦးက ပြောပါတယ်။
“ကျနော်တို့ အောင်သာရွာကိုတော့ ညနေ ၄ နာရီကနေ ပစ်ခတ်တာဗျ။ ပြည်သူအမျိုးသားတဦး နေရာတင် သေဆုံးတယ်။ တဦး ဒဏ်ရာပြင်းထန်ရတယ်ဗျ။ ဒဏ်ရာရရှိတဲ့သူကတော့ ဆေးရုံ ပို့ပေးနေပါတယ်။”
စစ်တပ်ဘက်က အဆိုပါကျေးရွာ ၂ ရွာကို ၈၁ မမ လက်နက်ကြီး ၂ လုံးနဲ့ ပစ်ခတ်ခဲ့တာလို့ ဆိုပါတယ်။
မုံရွာပကဖ ဒုတာဝန်ခံက “အကြောင်းမဲ့ကို ပြည်သူတွေရှိတဲ့နေရာကို ပစ်ခတ်တာ။ ကျနော်တို့ဆီ တော့ အဲသတင်း ရောက်နေပြီဗျ။ အသေးစိတ်ကိုတော့ စိစစ်နေတယ်ဗျ။ အတိအကျ စာရင်းရောက်ရင် ပို့ပေးထားလိုက်ပါမယ်” လို့ ပြောပါတယ်။
ဩဂုတ် ၁၂ ရက် မနက်ကလည်း မအူစစ်ဆေးရေးဂိတ်ကနေ မုံရွာတောင်နယ်ဘက်က ကျေးရွာတွေကို လက်နက်ကြီးနဲ့ အခုလိုပစ်ခတ်ခဲ့တာကြောင့် ပြည်သူ ၂ ဦးသေဆုံးခဲ့သလို ၉ ဦး ထိခိုက်ဒဏ်ရရှိခဲ့တယ်လို့ သိရပါတယ်။
