ထိုင်းနိုင်ငံတောင်ပိုင်း၊ ဖူးကက်ခရိုင်တွင်းရှိ ပင်လယ်ပြင်ထဲမှာ ဩဂုတ် ၁၂ ရက် မနက်က မြန်မာလုပ်သားတွေပါတဲ့ ငါးဖမ်းစက်လှေတစီး နစ်မြုပ်သွားတယ်လို့  Thai post  သတင်းမှာ ဖော်ပြပါတယ်။ 

ဩဂုတ် ၁၂ ရက် မနက် ၇ နာရီခွဲလောက်က ဖူးကက်ဆိပ်ကမ်း ဆာရဆင်တံတား အနောက်တောင်ဘက် ရေမိုင် ၇ မိုင်အကွာအဝေးမှာ ငါးဖမ်းလှေတစီး မတော်တဆ နစ်မြုပ်သွားကြောင်း ဖူးကက်ဆိပ်ကမ်းလုံခြုံရေးစင်တာ CCTC က အကြောင်းကြားလာတယ်လို့ အမှတ် ၃ ဒေသ အမျိုးသားရေးကြောင်း အကျိုးစီးပွား ထိန်းသိမ်းစောင့်ရှောက်ရေး တာဝန်ရှိသူက သတင်းထောက်ကို ပြောပါတယ်။ 

ရနောင်းခရိုင် ထဝီလပ် ၇ အမည်ရ အဆိုပါ ငါးဖမ်းစက်လှေပေါ်မှာ ထိုင်းလူမျိုး လှေဦးစီးတဦး၊ စက်ပြင်ဆရာတဦးနဲ့ မြန်မာရေလုပ်သား ၆ ဦး စုစုပေါင်း ၈ ဦး ပါရှိတယ်၊ အမြန်ဆုံး သွားရောက်ကူညီကယ်ဆယ်ဖို့ အဆိုပါဧရိယာနဲ့ အနီးဆုံးရှိ အခြားငါးဖမ်းလှေတွေကို ဆက်သွယ်အကြောင်းကြားခဲ့တယ်လို့ အမှတ် ၃ ရေကြောင်းထိန်းသိမ်းရေးဌာနက  ပြောပါတယ်။ 

အဲဒီနောက် မနက် ၈ နာရီချိန်မှာ ဘွန်းချွန်း အမှတ် ၂ စက်လှေက လှေနစ်မြုပ်ရာမှာ ပါဝင်သူ ၅ ဦးနဲ့  ဆပ်ကျန်ထရာ ၁၉ စက်လှေက လှေဦးစီး၊ စက်ပြင်ဆရာနဲ့ လှေထိုးသား ၁ ဦး ပေါင်း ၃ ဦးတို့ကို ရေထဲကနေ ရှာဖွေကယ်တင်နိုင်ခဲ့တယ်။ 

နေ့ခင်း ၁ နာရီလောက်မှာ လိုမ့်ဒိန်ဥဒုမ်းချိုင်း ၁၃ အမည်ရှိ လှေက သူတို့ ၈ ဦးလုံးကို ကယ်တင်ထားတဲ့ လှေတွေပေါ်ကနေ သွားရောက်တင်ဆောင်လာခဲ့ပြီး ဖန်ငခရိုင်၊ ထိုင်မိုင်းမြို့နယ် ထပ်လမုကမ်းခြေကို ပို့ဆောင်ပေးခဲ့ပါတယ်။ 

လှေဦးစီးရဲ့ ပြောပြချက်အရ ဩဂုတ် ၁၁ ရက် ညက ပင်လယ်ထဲမှာ မုန်တိုင်းမိပြီး  လှေအမြီးပိုင်းဘက်ကို ရေတွေစဝင်လာခဲ့တယ်။ မိုးသည်းထန်တဲ့အတွက် စက်လှေက ရေတွေ အလျဉ်မီ မစုပ်ထုတ်နိုင်တော့ဘဲ  နစ်မြုပ်သွားရတာလို့ တာဝန်ရှိသူတွေကို ပြောသွားပါတယ်။ 

Source: thaipost.net