စစ်ကိုင်းတိုင်း၊ ယင်းမာပင်မြို့နယ်မှာ စစ်ကောင်စီတပ်က လက်နက်ကြီးနဲ့ ပစ်ခတ်လို့ ဒေသခံ ၁ ယောက် နှလုံးရပ်သေဆုံးပြီး ရွာ ၁၀ ရွာက ပြည်သူတွေ နေရပ်စွန့်ခွာတိမ်းရှောင်နေရသလို ရွာ ၂ ရွာကို လည်း မီးရှို့ဖျက်ဆီးခံခဲ့ရပါတယ်။

ယင်းမာပင်မြို့နယ် အရှေ့မြောက်ခြမ်းက  ကျေးရွာတွေကို ဩဂုတ် ၇ ရက်ကစပြီး ၉ ရက်နေ့ ညနေပိုင်းပိုင်းအထိ စစ်တပ်က လက်နက်ကြီးတွေနဲ့ အကြိမ်ရေအများကြီး ပစ်တာကြောင့် ရေကြည်ပင်ရွာ၊ မြရိတ်ရွာ၊ ထန်းတောကြီးရွာ၊ စုန်းချောင်းရွာ၊ ကွေ့ချောင်းရွာ၊ သိကြားစက်ရွာ၊ နဘူးတောရွာ၊ ဘန့်ဘွေးမြောက်ရွာ၊ ထန်းဇင်ရွာနဲ့ ကံစုရွာက ပြည်သူ ထောင်နဲ့ချီ နေရပ်စွန့်ခွာ နေကြရတယ်လို့လည်း သိရပါတယ်။

ကွေ့ချောင်းရွာ ဒေသခံပြည်သူတယောက်က “ကျနော်တို့ရွာဆီကိုတော့ ၈ ရက်နေ့ညက စစ်ကောင်စီတပ်က ၈၀ မမ လက်နက်ကြီးနဲ့ ပစ်ခတ်လို့ အိမ်တလုံး မီးလောင်တယ်ဗျ။ အိမ်ရှင်ကတော့ လက်နက်ကြီးကျပြီး ကြောက်လန့် နှလုံးရပ်သေဆုံးတာရှိတယ်ဗျ။ အမည်က အောင်သိုက် အသက်က ၃၁ ဝန်းကျင်ပါဗျ။ ဩဂုတ်လ ၉ ရက်နေ့ ညနေ ၄ နာရီခန့်ကလည်း ကျနော်တို့ရွာထဲကို လက်နက်ကြီး ၆ လုံး ကျပေါက်ကွဲတယ်ဗျ။ လူနေအိမ် ၁၀ လုံးခန့် ပျက်စီးတယ်။ အရပ်သားပြည်သူ ၄ ဦးလည်း ထိခိုက်ဒဏ်ရာရရှိတယ်ဗျ။ မဂူဂူး  အသက် ၁၈ နှစ်နဲ့ မင်းညီခန့် အသက် ၁၃ နှစ် က ဒဏ်ရာများပြီး အသက်အခြေအနေစိုးရိမ်ရတယ်ဗျ။ ဦးရွှေမြိုင် အသက် ၅၀ ကျော်၊ မဝင်းဆန်း အသက် ၅၀ ကျော်ကတော့ သိပ်မစိုးရိမ်ရဘူး” လို့ ပြောပါတယ်။

အောင်ဇေယျမြို့သစ်မှာရှိတဲ့ စစ်တပ်က ပစ်ခတ်တာလို့ ဒေသခံတွေက ပြောပြီး ဩဂုတ် ၉ ရက်နေ့ကလည်း ဘန့်ဘွေးမြောက်ရွာအနီး မယ်စောတောတိုက်ဘက်ကို ၁၂၀ မမ ၂ လုံးကျရောက်ပေါက်ကွဲတာကြောင့် အသက် ၇ နှစ်နဲ့ ၁၂ နှစ်အရွယ် မိန်းကလေးငယ် ၂ ယောက် ဒဏ်ရာရပြီး အိမ် ၂ လုံးလည်း ပျက်စီးခဲ့တယ်လို့ ဒေသခံအမျိုးသမီးတယောက်က ပြောပါတယ်။

ဩဂုတ် ၇ ရက်နေ့ ညနေပိုင်းက အောင်ဇေယျကနေ ပစ်ခတ်တဲ့ လက်နက်ကြီး ကျရောက်ပေါက်ကွဲလို့ ထန်းတောကြီးကျေးရွာက ပြည်သူ ၄ ယောက် သေဆုံးပြီး အများအပြားဒဏ်ရာရခဲ့တယ်လို့ သိရပါတယ်။

ဩဂုတ် ၈ ရက် မနက်ပိုင်းကလည်း ဘန့်ဘွေးမြောက်ရွာနဲ့ ထန်းဇင်ရွာကို ဘန့်ဘွေးရွာမက ထွက်လာတဲ့ စစ်ကောင်စီတပ်နဲ့ ပျူစောထီးတွေက မီးရှို့ဖျက်ဆီးခဲ့တယ်လို့ ဒေသခံတွေက ပြောပါတယ်။

ထန်းဇင်ရွာခံအမျိုးသမီးတယောက်က “ကျမတို့ရွာနဲ့ ဘန့်ဘွေးရွာမနဲ့က မုံရွာ-ယာကြီး- ကလေးဝ လမ်းကြီးပဲ ခြားထားတာ။ သူတို့ရွာက လမ်းအနောက်ဘက်က ကျမတို့ရွာက လမ်းအရှေ့ဘက်ကပါရှင့်။ ရွာကို ဘာလို့မီးရှို့တာလဲဆိုတော့ အရင်ဩဂုတ် ၇ ရက်နေ့ ညနေပိင်းကတော့ ပြည်သူ့ ကာကွယ်ရေးတပ်နဲ့ ဘန့်ဘွေးရွာမက စစ်တပ်တို့ တိုက်ပွဲဖြစ်ကြသေးတယ်။ တိုက်ပွဲဖြစ်ပြီး စစ်ရှုံးလို့လားမသိဘူး။ ကျမတတို့ရွာကို မဆီမဆိုင် မီးရှို့သွားတယ်။ မီးလောင်ပြာကျတဲ့အိမ်က ၄၀ ကျော်တယ်” လို့ ပြောပါတယ်။

ထန်းဇင်ရွာက အိမ် ၂၅ လုံးနဲ့ ဘန့်ဘွေးမြောက်ရွာက အိမ် ၁၉ လုံး မီးလောင်သွားတယ်လို့ သိရပြီး ပြီးခဲ့တဲ့ ဩဂုတ် ၆ ရက်နေ့ကလည်း ဘန့်ဘွေးရွာအနောက်မြောက်ဘက်မှာရှိတဲ့ ရေသောက်ကန်တောပြင်က ပြည်သူနေအိမ် ၆ လုံးကို စစ်တပ်က မီးရှို့ပြီး ဆိုင်ကယ်နဲ့ ထော်လာဂျီတစင်းကို သိမ်းယူသွားခဲ့တယ်လို့ ဒေသခံတွေက ပြောပါတယ်။